ବର୍ଡର-ଗାଭାସ୍କର ଟ୍ରଫି ୨୦୨୪-୨୫ ସିରିଜର ଦ୍ଵିତୀୟ ଟେଷ୍ଟ ମ୍ୟାଚ୍ ପୂର୍ବରୁ କ୍ୟାନବେରାରେ ପ୍ରଶଂସକଙ୍କ ସହ ଭାରତର ଅଧିନାୟକ ରୋହିତ ଶର୍ମା ମିଶୁଥିବା ଦେଖିବାକୁ ମିଳିଛି। ଅଟୋଗ୍ରାଫ୍ ଏବଂ ସେଲଫି ଖୋଜୁଥିବା ସମର୍ଥକମାନେ ରୋହିତ ଶର୍ମାଙ୍କୁ ଘେରି ରହିଥିଲେ। ତେବେ ଏହାରି ମଧ୍ୟରେ ରୋହିତ ଏଭଳି ଏକ ରିଆକ୍ସନ ଦେଇଥିଲେ ଯାହାକି ସୋସିଆଲ ମିଡିଆରେ ଭାଇରାଲ ହେଉଛି।

ପର୍ଥ ଟେଷ୍ଟ ମ୍ୟାଚ୍ ସମୟରେ ୩୭ ବର୍ଷୀୟ କ୍ରିକେଟର ଭାରତୀୟ ଦଳରେ ଯୋଗ ଦେଇଥିଲେ। ଶର୍ମା ତାଙ୍କର ଦ୍ୱିତୀୟ ସନ୍ତାନର ଜନ୍ମ ହେତୁ ବର୍ଡର-ଗାଭାସ୍କର ଟ୍ରଫିର ପ୍ରଥମ ଟେଷ୍ଟ ମ୍ୟାଚରେ ଖେଳିପାରିନଥିଲେ। ପରେ ସେ କ୍ୟାନବେରାର ମନୁକା ଓଭାଲ ଠାରେ ଅଷ୍ଟ୍ରେଲୀୟ ଏକାଦଶ ବିପକ୍ଷ ଅଭ୍ୟାସ ମ୍ୟାଚରେ ଭାଗ ନେଇଥିଲେ। ଏହି ସମୟରେ ମନୁକା ଓଭାଲ ଠାରେ କିଛି ସମୟ ମଧ୍ୟରେ ରୋହିତଙ୍କ ଅଟୋଗ୍ରାଫ୍ ଏବଂ ସେଲଫି ଖୋଜୁଥିବା ପ୍ରଶଂସକମାନେ ପହଞ୍ଚି ଯାଇଥିଲେ। ସେଲଫି ଏବଂ ଅଟୋଗ୍ରାଫ୍ ପ୍ରଦାନ କରୁଥିବାବେଳେ ପ୍ରଶଂସକଙ୍କୁ ରୋହିତ ଏଭଳି ଏକ ରିଆକ୍ସନ ଦେଇଥିଲେ ଯାହାକି ବର୍ତ୍ତମାନ ଭାଇରାଲ୍ ହେଉଛି।

ଭାରତୀୟ ଟେଷ୍ଟ ଅଧିନାୟକ କ୍ରିକେଟ୍ ବଲରେ ଅଟୋଗ୍ରାଫ ଦେଉଥିବାବେଳେ ଅନ୍ୟମାନେ ସେଲଫି ମାଗିଥିଲେ। ପ୍ରଶଂସକଙ୍କ କ୍ରମାଗତ ହଙ୍ଗାମା ପରେ ରୋହିତ ହିନ୍ଦୀରେ ଉତ୍ତର ଦେଇଥିଲେ। କ୍ରମାଗତ ବିଶୃଙ୍ଖଳା ମଧ୍ୟରେ ସେ ହାସ୍ୟାସ୍ପଦ ଭାବରେ ପରିସ୍ଥିତିକୁ ସମ୍ବୋଧିତ କରି ଜଣେ ପ୍ରଶଂସକଙ୍କୁ କହିଥିଲେ ଯେ,“ଏକ୍ ସମୟ ପର୍ ଏକ୍ ହି କାମ ହୋ ସକତା ହୈ”(ଗୋଟିଏ ଥରରେ କେବଳ ଗୋଟିଏ କାର୍ଯ୍ୟ ହିଁ କରାଯାଇପାରିବ)।

ଅନ୍ୟପକ୍ଷରେ ଅଷ୍ଟ୍ରେଲିଆ ଏକାଦଶ ବିପକ୍ଷ ମ୍ୟାଚରେ ରୋହିତ ଶର୍ମା ଚତୁର୍ଥ ନମ୍ବରରେ ବ୍ୟାଟିଂ କରିଥିଲେ। ପର୍ଥ ଟେଷ୍ଟରୁ କେ.ଏଲ୍ ରାହୁଲ ଏବଂ ଯଶସ୍ୱୀ ଜୟସୱାଲ ସେମାନଙ୍କର ସଫଳ ଓପନିଂ ଭାଗିଦାରୀ ଜାରି ରଖିଥିଲେ। ତେବେ ଏହି ଅଭ୍ୟାସ ମ୍ୟାଚରେ ରୋହିତ ଶସ୍ତାରେ ଆଉଟ ହୋଇ ଯାଇଥିଲେ। ଡିସେମ୍ବର ୬ ତାରିଖରୁ ଆଡିଲେଡ୍ ଓଭାଲ ଠାରେ ଦ୍ୱିତୀୟ ଟେଷ୍ଟ ଅନୁଷ୍ଠିତ ହେବାକୁ ଯାଉଛି।