କ୍ରିକେଟ୍ ଖବର : ଆସନ୍ତା ଅକ୍ଟୋବର ୧୭ ତାରିଖରୁ ୟୁଏଇ ଏବଂ ଓମାନରେ ଆଇସିସି ଟି-୨୦ ବିଶ୍ୱକପ ଟୁର୍ଣ୍ଣାମେଣ୍ଟ ହେବାକୁ ଯାଉଛି। ଦର୍ଶକମାନେ ଟି-୨୦ ବିଶ୍ୱକପକୁ ନେଇ ବହୁତ ଉତ୍ସାହିତ ଅଛନ୍ତି କିନ୍ତୁ ଆଇସିସି ମଧ୍ୟ କିଛି ନିୟମ ପରିବର୍ତ୍ତନ କରି ଉତ୍ସାହକୁ ଦ୍ବିଗୁଣିତ କରି ଦେଇଛି। ଏହି ନୂତନ ନିୟମ ନକ୍ଆଉଟ୍ ମ୍ୟାଚ୍ ରେ ପ୍ରଯୁଜ୍ୟ ହେବ।

ଯଦି ବର୍ଷା ହୁଏ, ତେବେ ନୂଆ ନିୟମ ଲାଗୁ ହେବ :

ବର୍ଷା ଯୋଗୁଁ ପ୍ରଭାବିତ ହେଉଥିବା ନକ୍ଆଉଟ୍ ମ୍ୟାଚ୍ ପାଇଁ ଆଇସିସି ଏକ ନୂଆ ନିୟମ କରିଛି। ଡିଏଲ୍ଏସ୍ (ଡକୱର୍ଥ – ଲୁଇସ୍ – ଷ୍ଟର୍ନ ପଦ୍ଧତି) ନିୟମ ଅନୁଯାୟୀ ଯଦି ବର୍ଷା ଲିଗ୍ ପର୍ଯ୍ୟାୟ ମ୍ୟାଚରେ ବାଧା ସୃଷ୍ଟି କରେ ତେବେ ଉଭୟ ଦଳ ୫ ଓଭର ବ୍ୟାଟିଂ କରିବେ, କିନ୍ତୁ ସେମିଫାଇନାଲ ଏବଂ ଫାଇନାଲ ପାଇଁ ଆଇସିସି ଏହାକୁ ୧୦ ଓଭର ପର୍ଯ୍ୟନ୍ତ ବୃଦ୍ଧି କରିଛି। ବର୍ତ୍ତମାନ ବର୍ଷା ଯୋଗୁଁ ପ୍ରଭାବିତ ହୋଇଥିବା ମ୍ୟାଚରେ ଉଭୟ ଦଳକୁ ଅତି କମରେ ୧୦ ଓଭର ବ୍ୟାଟିଂ କରିବାକୁ ପଡିବ। ଆଉ ଏହି ୧୦ ଓଭର ମ୍ୟାଚ୍ ରେ ହିଁ ଉଭୟ ଦଳର ହାରଜିତ ଫଳ ବାହାରିବ।

ସୂଚନା ଅନୁଯାୟୀ, ଗତ ବର୍ଷ ଖେଳାଯାଇଥିବା ମହିଳା ଟି-୨୦ ବିଶ୍ୱକପରେ ଆଇସିସିର ଏହି ନିୟମ କାର୍ଯ୍ୟକାରୀ କରାଯାଇଛି। ଅଷ୍ଟ୍ରେଲିଆରେ ଅନୁଷ୍ଠିତ ଟି-୨୦ ବିଶ୍ୱକପ୍‌ର ସେମିଫାଇନାଲ ମ୍ୟାଚରେ ପ୍ରବଳ ବର୍ଷା ହୋଇଥିଲା। ଭାରତ ଏବଂ ଇଂଲଣ୍ଡ ମଧ୍ୟରେ ଖେଳାଯାଇଥିବା ସେମିଫାଇନାଲ ମ୍ୟାଚ ବର୍ଷା ହେତୁ ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା। ତେବେ ପୂର୍ବରୁ ଆଇସିସିର ଏହି ନିୟମ ସମସ୍ତ ମ୍ୟାଚ୍ ପାଇଁ ୫ ଓଭର ଥିଲା, କିନ୍ତୁ ବର୍ତ୍ତମାନ ଏହାକୁ ନକ୍ଆଉଟ୍ ପାଇଁ ୧୦ ଓଭରରେ ପରିବର୍ତ୍ତନ କରାଯାଇଛି।

ଆଇସିସିର କାର୍ଯ୍ୟକ୍ରମ ଅନୁଯାୟୀ ଅକ୍ଟୋବର ୧୭ ରୁ ଓମାନରେ ଟି-୨୦ ବିଶ୍ୱ ଆରମ୍ଭ ହେବ। ଯେଉଁଠାରେ, ପାପୁଆ ନ୍ୟୁ ଗିନି ଏବଂ ଓମାନ ପରସ୍ପରକୁ ମୁହାଁମୁହିଁ ହେବେ। ଯେଉଁଠାରେ ସୁପର୧୨ ରାଉଣ୍ଡ ଅଷ୍ଟ୍ରେଲିଆ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯିବ, ଯାହା ଆବୁଧାବିର ଶେଖ ଜାଏଦ ଷ୍ଟାଡିୟମରେ ଖେଳାଯିବ।