ବାଂଲାଦେଶ ବିପକ୍ଷରେ ଖେଳାଯାଉଥିବା ୩ ମ୍ୟାଚ୍ ବିଶିଷ୍ଟ ଟି-୨୦ ସିରିଜରେ ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ପ୍ରଦର୍ଶନ ଆଶ୍ଚର୍ଯ୍ୟଜନକ ରହିଛି। ପ୍ରଥମ ଦୁଇଟି ମ୍ୟାଚ୍‌ରେ ସେ ବ୍ୟାଟ୍ସମ୍ୟାନ୍ ଭାବରେ ଉତ୍କୃଷ୍ଟ ଫର୍ମରେ ରହିଛନ୍ତି। ଏଥିସହିତ ବୁଧବାର ଦିଲ୍ଲୀ ଗ୍ରାଉଣ୍ଡରେ ଖେଳାଯାଇଥିବା ମ୍ୟାଚରେ ହାର୍ଦ୍ଦିକ ପାଣ୍ଡ୍ୟା ବାଂଲାଦେଶ ବ୍ୟାଟ୍ସମ୍ୟାନ୍ ଋଷଦ ହୁସେନ୍‌ଙ୍କ ଅବିଶ୍ୱସନୀୟ କ୍ୟାଚ୍ ନେଇ ସମସ୍ତଙ୍କୁ ଆଶ୍ଚର୍ଯ୍ୟ ଚକିତ କରିଦେଇଛନ୍ତି। ତାଙ୍କର କ୍ୟାଚ୍ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ଦ୍ୱିତୀୟ ମ୍ୟାଚ୍ ଦିଲ୍ଲୀର ଅରୁଣ ଜେଟଲୀ କ୍ରିକେଟ୍ ଷ୍ଟାଡିୟମରେ ଖେଳାଯାଇଥିଲା। ସୂର୍ଯ୍ୟକୁମାର ଯାଦବଙ୍କ ଯୁବ ବ୍ରିଗେଡ୍ ପୁଣି ଥରେ ଚମତ୍କାର ପ୍ରଦର୍ଶନ କରି ଏକ ଚମତ୍କାର ବିଜୟ ହାସଲ କରିଛି। ବ୍ୟାଟ୍ସମ୍ୟାନଙ୍କ ପରେ ବୋଲରମାନେ ମଧ୍ୟ ସେମାନଙ୍କ ପ୍ରତିଭା ପ୍ରଦର୍ଶନ କରିଥିଲେ। ଏହି ସମୟରେ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଏକ ଅବିଶ୍ୱସନୀୟ କ୍ୟାଚ୍ ଦ୍ୱାରା ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଥିଲେ।

ସେ ବାଂଲାଦେଶୀ ବ୍ୟାଟ୍ସମ୍ୟାନ୍ ଋଷଦ ହୁସେନଙ୍କ କ୍ୟାଚ ଧରି ଭାରତକୁ ଏକ ବଡ଼ ସଫଳତା ଦେଇଥିଲେ। ୧୪ ତମ ଓଭରରେ ବୋଲିଂ କରିବାକୁ ଭାରତୀୟ ସ୍ପିନର ବରୁଣ ଚକ୍ରବର୍ତ୍ତୀ ଆସିଥିଲେ। ଏହି ଓଭରର ତୃତୀୟ ବଲରେ ଋଷଦ ହୁସେନ ଏକ ବଡ଼ ସଟ୍ ଖେଳିବାକୁ ପ୍ରୟାସ କରିଥିଲେ। ପ୍ରଥମେ ଏହି ଛକା ହେବା ପରି ମନେ ହେଉଥିବା ବେଳେ କିନ୍ତୁ ହାର୍ଦ୍ଦିକ ପାଣ୍ଡ୍ୟା ତାଙ୍କ ବାମ ପଟକୁ ଦୌଡ଼ିଯାଇ ଏକ ଚମତ୍କାର କ୍ୟାଚ୍ ନେଇଥିଲେ। ସେ ପ୍ରାୟ ୨୭ ମିଟର ଦୌଡ଼ିବା ସହିତ ଏକ ଲମ୍ଫ ପ୍ରଦାନ କରି କ୍ୟାଚ୍ ଧରିବାରେ ସଫଳ ହୋଇଥିଲେ। ହାର୍ଦ୍ଦିକ ପାଣ୍ଡ୍ୟା ଧରିଥିବା ଏହି କ୍ୟାଚର ଭିଡିଓ ସୋସିଆଲ ମିଡିଆରେ ଅଧିକ ଭାଇରାଲ ହେବାରେ ଲାଗିଛି।

ଋଷଦ ହୁସେନ୍‌ଙ୍କ ୱିକେଟ୍ ନେବା ପରେ ହାର୍ଦ୍ଦିକ ପାଣ୍ଡ୍ୟା ତାଙ୍କ ନାମରେ ଏକ ବଡ଼ ରେକର୍ଡ ସ୍ଥାପନ କରିଛନ୍ତି। ବାସ୍ତବରେ ସେ ଟି-୨୦ ଅନ୍ତର୍ଜାତୀୟ କ୍ରିକେଟରେ ସର୍ବାଧିକ କ୍ୟାଚ୍ ନେଇଥିବା ତୃତୀୟ ଭାରତୀୟ ଖେଳାଳି ହୋଇ ପାରିଛନ୍ତି। ସେ ଏହି ଫର୍ମାଟରେ ଏପର୍ଯ୍ୟନ୍ତ ୫୨ ଟି କ୍ୟାଚ୍ ନେଇଛନ୍ତି। ରୋହିତ ଶର୍ମା ଏବଂ ବିରାଟ କୋହଲି ଯଥାକ୍ରମେ ୬୫ ଏବଂ ୫୪ଟି କ୍ୟାଚ୍ ନେଇଛନ୍ତି।  ଯେହେତୁ ହିଟମ୍ୟାନ୍ ଏବଂ କିଙ୍ଗ କୋହଲି ଟି-୨୦ କ୍ରିକେଟରୁ ଅବସର ନେଇ ସାରିଛନ୍ତି, ବର୍ତ୍ତମାନ ହାର୍ଦ୍ଦିକ ପାଣ୍ଡ୍ୟାଙ୍କ ପାଖରେ ଏହି ରେକର୍ଡ ଭାଙ୍ଗିବା ପାଇଁ ଏକ ସୁବର୍ଣ୍ଣ ସୁଯୋଗ ରହିଛି।