ଆଇପିଏଲ୍ ୨୦୨୪ ରେ ମୁମ୍ବାଇ ଇଣ୍ଡିଆନ୍ସକୁ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ପରାଜୟର ସମ୍ମୁଖୀନ ହେବାକୁ ପଡିଛି। ୱାନଖେଡେ ଷ୍ଟାଡିୟମରେ ମୁମ୍ବାଇ ପାଇଁ ପୂର୍ବତନ ଅଧିନାୟକ ରୋହିତ ଶର୍ମା ଶତକ ହାସଲ କରିଥିଲେ ହେଁ ଦଳକୁ ପରାଜୟରୁ ରକ୍ଷା କରି ପାରିନାହାଁନ୍ତି। ଓପନିଂ ବ୍ୟାଟିଂ କରିବାକୁ ଆସିଥିବା ରୋହିତ ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ଏହା ସତ୍ତ୍ୱେ ମୁମ୍ବାଇ ଦଳ ମ୍ୟାଚ ଜିତି ପାରି ନଥିଲା। 

ମୁମ୍ବାଇ ଇଣ୍ଡିଆନ୍ସ ପାଇଁ ଏହା ଏକ ବଡ ଝଟକା ଅଟେ, ହ୍ୟାଟ୍ରିକ୍ ପରାଜୟ ପରେ ଲଗାତାର ଦୁଇଟି ବିଜୟ ସହ ଟ୍ରାକକୁ ଫେରିଥିବା ଏହି ଦଳ ପୁଣିଥରେ ପରାଜୟ ବରଣ କରିଛି। ଚେନ୍ନାଇ ସୁପର କିଙ୍ଗ୍ସ ପାଇଁ ୪ଟି ୱିକେଟ୍ ନେଇ ମାଥିଶା ପଥିରାନା ବିଜୟର ହିରୋ ସାଜିଥିଲେ। ଋତୁରାଜ ଗାଇକୱାଡ ଏବଂ ଶିବମ ଦୁବେଙ୍କ ପରେ ମହେନ୍ଦ୍ର ସିଂ ଧୋନି ବ୍ୟାଟିଂରେ ଚମତ୍କାର ପ୍ରଦର୍ଶନ କରିଥିଲେ।  

କିନ୍ତୁ ମ୍ୟାଚର ଟର୍ନିଂ ପଏଣ୍ଟ ଆଉ କିଛି ଥିଲା। ଶେଷ ୬ ଓଭରରେ ଜିତିବା ପାଇଁ ମୁମ୍ବାଇକୁ ୭୭ ରନ୍ ଆବଶ୍ୟକ ରହିଥିଲା। ଦଳର ୭ ଟି ୱିକେଟ୍ ବାକି ଥିଲା ଏବଂ ଏହି ଲକ୍ଷ୍ୟ ସହଜରେ ହାସଲ ହୋଇପାରିଥାନ୍ତା। କିନ୍ତୁ ଚେନ୍ନାଇ କ୍ରମାଗତ ଦୁଇଟି ଓଭରରେ ମାତ୍ର ୫ ରନ୍ ଦେଇ ଗୋଟିଏ ୱିକେଟ୍ ନେଇଥିଲା। ଚେନ୍ନାଇ ସୁପର କିଙ୍ଗ୍ସ ପାଇଁ ଶାର୍ଦ୍ଦୁଲ ଠାକୁର ୧୫ ତମ ଓଭର ବୋଲିଂ କରିଥିଲେ। ସେ କ୍ରମାଗତ ଭାବରେ ୱାଇଡ୍ ଲାଇନ ଉପରେ ଆକ୍ରମଣ କରିଥିଲେ। ରୋହିତ ଶର୍ମା ପ୍ରଥମ ତିନୋଟି ବଲରେ ମାତ୍ର ଗୋଟିଏ ରନ୍ ସ୍କୋର କରିପାରିଥିଲେ।

ତା’ପରେ ହାର୍ଦ୍ଦିକ ପାଣ୍ଡ୍ୟା ମଧ୍ୟ ପରବର୍ତ୍ତୀ ତିନୋଟି ବଲରେ କେବଳ ଗୋଟିଏ ରନ୍ ସ୍କୋର କରିଥିଲେ। ପରବର୍ତ୍ତୀ ଓଭରରେ ମୁମ୍ବାଇ ପାଇଁ ଘରୋଇ କ୍ରିକେଟ୍ ଖେଳୁଥିବା ତୁଶାର ଦେଶପାଣ୍ଡେ ବୋଲିଂ କରିଥିଲେ। ଏହି ଓଭରରେ ସେ ମାତ୍ର ଦୁଇ ରନ୍ ଦେଇଥିଲେ ଏବଂ ହାର୍ଦ୍ଦିକ ପାଣ୍ଡ୍ୟାଙ୍କ ୱିକେଟ୍ ମଧ୍ୟ ନେଇଥିଲେ। ଏହି ଦୁଇ ଓଭର ପରେ ମୁମ୍ବାଇକୁ ୨୪ ବଲରେ ୭୨ ରନ୍ ଆବଶ୍ୟକ ଥିଲା, ଯାହା ଅତ୍ୟନ୍ତ କଷ୍ଟକର ରହିଥିଲା।

ରୋହିତ ୬୩ ବଲରୁ ଅପରାଜିତ ୧୦୫ ସ୍କୋର କରିଥିଲେ, କିନ୍ତୁ ତାଙ୍କର ଚମତ୍କାର ଇନିଂସ ପର୍ଯ୍ୟାପ୍ତ ରହିନଥିଲା। ଚେନ୍ନାଇ ପାଇଁ ରୁତୁରାଜ ଗାଇକୱାଡ (୬୯), ଶିବମ ଦୁବେ (୬୬*) ଏବଂ ମହେନ୍ଦ୍ର ସିଂ ଧୋନିଙ୍କ ଚାରୋଟି ବଲରେ ୨୦ ରନ୍ ସଂଗ୍ରହ କରିଥିଲେ। ଯାହାଫଳରେ ଚେନ୍ନାଇ ଦଳ ୨୦୬ ରନ୍ ସଂଗ୍ରହ କରିଥିଲା। ପରେ ମୁମ୍ବାଇ ଇଣ୍ଡିଆନ୍ସ ୨୦ ଓଭରରେ ୧୮୬ ରନ କରିବାରେ ସକ୍ଷମ ରହିଥିଲା।