ବୋଲରଙ୍କ ଘାତକ ବୋଲିଂରେ ୮୦ ରନରେ ହାଇଦ୍ରାବାଦକୁ ପରାସ୍ତ କଲା କୋଲକତା...
କୋଲକାତା ନାଇଟ୍ ରାଇଡର୍ସ ଓ ସନ୍ ରାଇଜର୍ସ ହାଇଦ୍ରାବାଦ ମଧ୍ୟରେ ଆଇପିଏଲର ୧୫ତମ ମୁକାବିଲା ଇଡେନ ଗାର୍ଡେନରେ ଖେଳାଯାଇଥିଲା । ପ୍ରଥମେ ଟସ ଜିତି ବୋଲିଂ କରିବାର ନିର୍ଣ୍ଣୟ ନେଇଥିଲା ହାଇଦ୍ରାବାଦ ।
ତେବେ ନିର୍ଦ୍ଧାରିତ କୋଡିଏ ଓଭରରେ ୬ ଓ୍ବିକେଟ୍ ହରାଇ କେକେଆର୍ ୨୦୦ ରନ୍ କରିଥିଲା । ଫଳରେ ପ୍ୟାଟ୍ କମିନ୍ସଙ୍କ ହାଇଦ୍ରାବାଦକୁ ୨୦୧ ରନର ଟାର୍ଗେଟ୍ ମିଳିଥିଲା । କୋଲକାତା ପକ୍ଷରୁ ଯୁବ ତାରକା ରଘୁବଂଶୀ ଦମଦାର୍ ବ୍ୟାଟିଂ ଦେଖାଇଥିଲେ । ସେ ମାତ୍ର ୩୨ ବଲ୍ ଖେଳି ୫୦ ରନ୍ ସଂଗ୍ରହ କରିଥିଲେ । ଏହାପରେ ଭେଙ୍କଟେସ୍ ଆୟର ଓ ରିଙ୍କୁ ସିଂ ଏସଆରଏଚ ବୋଲରଙ୍କ ଉପରେ ପ୍ରହାର କରିଥିଲେ । ଆୟର ୨୯ଟି ବଲ୍ ଖେଳି ୨୦୬ ଷ୍ଟ୍ରାଇକ୍ ରେଟରେ ସର୍ବାଧିକ ୬୦ ରନ୍ ସଂଗ୍ରହ କରିଥିଲେ । ସେହିପରି ରିଙ୍କୁ ସିଂହ ୧୭ ବଲରେ ୩୨ ରନ କରିଛନ୍ତି । ହାଇଦ୍ରାବାଦ ପକ୍ଷରୁ ମହମ୍ମଦ ଶାମି, ପ୍ୟାଟ୍ କମିନ୍ସ, ଜିଶାନ ଅନସାରୀ, ହର୍ଷାଲ୍ ପଟେଲ ଓ କାମୁଣ୍ଡୁ ମେଣ୍ଡିସ୍ ଗୋଟିଏ ଲେଖାଏଁ ଓ୍ବିକେଟ୍ ନେଇଛନ୍ତି ।
ଏପଟେ ୨୦୧ ରନର ଟାର୍ଗେଟକୁ ପିଛା କରି ପଡ଼ିଆକୁ ଓହ୍ଲାଇଥିଲା ସନ୍ ରାଇଜର୍ସ ହାଇଦ୍ରାବାଦ । ଦୁଇ ଓପନର ଟ୍ରାବିସ୍ ହେଡ୍ ଓ ଅଭିଷେକ୍ ଶର୍ମା ବ୍ୟାଟିଂ ଆରମ୍ଭ କରିଥିଲେ । ମାତ୍ର ପ୍ରଥମ ଓଭରରେ ପ୍ରାରମ୍ଭିକ ଝଟକା ଦେଇଥିଲା କେକେଆର୍ । ହେଡ୍ଙ୍କୁ ପ୍ରଥମ ଓଭରରେ ଆଉଟ କରିଥିଲେ ବୈଭବ ଆରୋରା । ଏହା ପରେ ଦ୍ବିତୀୟ ଓଭରରେ ହର୍ଷିତ୍ ରାଣା ଅଭିଷେକ୍ ଆଉଟ୍ କରିଥିଲେ । ସେହିପରି ଇଶାନ କିଷାନ ମାତ୍ର ୫ଟି ବଲ୍ ଖେଳି ଆଉଟ୍ ହୋଇଥିଲେ । ଫଳରେ ଏସଆରଏଚ୍ ମେରୁଦଣ୍ଡ ଭାଙ୍ଗି ଯାଇଥିଲା ।
ମାତ୍ର ୧୬.୪ ଓଭର ଦଳ ୧୨୦ ରନ୍ କରି ସମସ୍ତ ଓ୍ବିକେଟ୍ ହରାଇଥିଲା ଦଳ । ଯାହା ଫଳରେ କୋଲକାତା ନାଇଟ୍ ରାଇଡର୍ସକୁ ୮୦ରନ୍ର ବଡ଼ ବିଜୟ ମିଳିଛି । ତିନୋଟି ଓ୍ବିକେଟ୍ ନେଇ ବୈଭବ ଆରୋରା ମ୍ୟାନ୍ ଅଫ୍ ଦି ପ୍ଲେୟାର ହୋଇଛନ୍ତି ।
ପ୍ରଥମେ ବ୍ୟାଟର ଓ ପରେ ବୋଲରଙ୍କ ଘାତକ ବୋଲିଂ ଘାଇଲା କରିଥିଲା ସନ୍ ରାଇଜର୍ସ ହାଇଦ୍ରାବାଦକୁ । ମାତ୍ର ୧୨୦ ରନରେ ଅଲଆଉଟ୍ ହୋଇଥିଲା ଦଳ । ବରୁଣ ଚକ୍ରବର୍ତ୍ତୀ ଓ ବୈଭବ ଆରୋରା ଜବରଦସ୍ତ ବୋଲିଂ କରିଥିଲେ । ଉଭୟଙ୍କୁ ୩ଟି ଲେଖାଏଁ ଓ୍ବିକେଟ୍ ମିଳିଥିଲା । ଚଳିତ ଆଇପିଏଲରେ କୋଲକାତା ନାଇଟ ରାଇଡର୍ସର ଏହା ଦ୍ବିତୀୟ ବିଜୟ ।