ଭାରତୀୟ କ୍ରିକେଟ୍ ଦଳ ବର୍ତ୍ତମାନ ଏହାର ପରବର୍ତ୍ତୀ ମିଶନ ପାଇଁ ପ୍ରସ୍ତୁତ ହେଉଛି। ଶ୍ରୀଲଙ୍କା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ପାଇଁ ଟିମ୍ ଇଣ୍ଡିଆ ଆଜି ଶ୍ରୀଲଙ୍କା ପହଞ୍ଚି ଯାଇଛି। ଏହି ସିରିଜ ପାଇଁ ଅନେକ ଯୁବ ଓ ନୂତନ ଖେଳାଳିଙ୍କୁ ସୁଯୋଗ ଦିଆଯାଇଛି। ବିଶେଷ କଥା ହେଉଛି ସୂର୍ଯ୍ୟକୁମାର ଯାଦବଙ୍କୁ ଏହି ସିରିଜ ପାଇଁ ଅଧିନାୟକ କରାଯାଇଛି। ତେବେ କୌତୁହଳର ବିଷୟ ହେଉଛି ସୂର୍ଯ୍ୟକୁମାର ଟି-୨୦ ଦଳର ଅଧିନାୟକ, କିନ୍ତୁ ସେ ଏକଦିବସିୟ ଦଳରେ ସ୍ଥାନ ମଧ୍ୟ ପାଇ ନାହାଁନ୍ତି।  

ଶ୍ରୀଲଙ୍କା ଯିବା ପୂର୍ବରୁ ଟିମ୍ ଇଣ୍ଡିଆର ମୁଖ୍ୟ ଚୟନକର୍ତ୍ତା ଅଜିତ ଅଗରକର ଗଣମାଧ୍ୟମ ସହ କଥା ହୋଇ ଏହି ଘଟଣାର ଖୁଲାସା କରିବାକୁ ଚେଷ୍ଟା କରିଥିଲେ। ଶ୍ରୀଲଙ୍କା ଗସ୍ତକୁ ଯିବା ପୂର୍ବରୁ ମୁମ୍ବାଇରେ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏବଂ ନୂତନ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କ ଏକ ସାମ୍ବାଦିକ ସମ୍ମିଳନୀ ଆୟୋଜିତ ହୋଇଥିଲା। ଏଥିରେ ଯେତେବେଳେ ସୂର୍ଯ୍ୟକୁମାର ଯାଦବଙ୍କ ବିଷୟରେ ପ୍ରଶ୍ନ ପଚରାଗଲା, ଅଜିତ ଅଗରକର ସ୍ପଷ୍ଟ ଭାବରେ କହିଥିଲେ ଯେ ଏକଦିବସିୟରେ ସୂର୍ଯ୍ୟକୁମାର ଯାଦବଙ୍କ ବିଷୟରେ ଅଧିକ ଆଲୋଚନା ହୋଇନାହିଁ।  

ସେ କହିଛନ୍ତି ଯେ ଶ୍ରେୟସ୍ ଆୟର୍ ଏକଦିବସିୟ ଦଳକୁ ଫେରୁଥିବାବେଳେ କେ.ଏଲ୍ ରାହୁଲ ମଧ୍ୟ ଏକଦିବସିୟ ଦଳର ଜଣେ ଗୁରୁତ୍ୱପୂର୍ଣ୍ଣ ସଦସ୍ୟ ଅଟନ୍ତି। ତେଣୁ ସୂର୍ଯ୍ୟକୁମାର ଯାଦବଙ୍କ ପାଇଁ ସ୍ଥାନ ନଥିଲା, ତେଣୁ ତାଙ୍କ ନାମ ଉପରେ ଆଲୋଚନା କରିବାର କୌଣସି ଆବଶ୍ୟକତା ନାହିଁ। କେବଳ ଏତିକି ନୁହେଁ, ଦୀର୍ଘ ବ୍ୟବଧାନ ପରେ ଋଷଭ ପନ୍ତ ମଧ୍ୟ ଏକଦିବସିୟ ଦଳକୁ ଫେରିବାକୁ ଯାଉଛନ୍ତି। 

ଏହାର ଅର୍ଥ, ଯଦିଓ ସୂର୍ଯ୍ୟକୁମାର ଯାଦବ ଦଳରେ ଅନ୍ତର୍ଭୁକ୍ତ ହୋଇଥିଲେ ମଧ୍ୟ ତାଙ୍କୁ ଏକାଦଶରେ ଖେଳିବାକୁ ସୁଯୋଗ ମିଳିନଥାନ୍ତା। ଏହି କାରଣ ହେତୁ ସୂର୍ଯ୍ୟକୁମାରଙ୍କୁ ଏକଦିବସୀୟ ଦଳରେ ସାମିଲ କରାଯାଇନାହିଁ। ଗତ କିଛି ବର୍ଷ ମଧ୍ୟରେ ସୁର୍ଯ୍ୟକୁମାର ଯାଦବ ଟି-୨୦ ରେ ଯେପରି ବ୍ୟାଟିଂ କରିଥିଲେ, ସେଠାରେ ତାଙ୍କ ସ୍ଥାନ ନିଶ୍ଚିତ ହୋଇ ଯାଇଛି। ସେ ମଧ୍ୟ ଦୀର୍ଘ ଦିନ ଧରି ଆଇସିସି ର଼୍ୟାଙ୍କିଙ୍ଗରେ ଏକ ନମ୍ବର ବ୍ୟାଟ୍ସମ୍ୟାନ୍ ରହିଆସିଛନ୍ତି।

କିନ୍ତୁ ଯଦି ଆମେ ଏକଦିବସିୟ ବିଷୟରେ କହିବା, ସୂର୍ଯ୍ୟକୁମାର ଯାଦବଙ୍କୁ ସେଠାରେ ଅନେକ ସୁଯୋଗ ଦିଆଯାଇଥିଲା, କିନ୍ତୁ ସେ ତାଙ୍କ ସ୍ଥାନକୁ ପକ୍କା କରିବାରେ ସଫଳ ହୋଇନଥିଲେ। ଏହା ଉପରେ ମଧ୍ୟ ପ୍ରଶ୍ନ ଉଠିଛି ଯେ ଯଦି ସୂର୍ଯ୍ୟଙ୍କ ଟି-୨୦ରେ ଦକ୍ଷତା ଅଛି ତେବେ ତାଙ୍କୁ କାହିଁକି ଏକଦିବସିୟ ଖେଳିବାକୁ ବାଧ୍ୟ କରାଯାଉଛି? ବର୍ତ୍ତମାନ ଅଜିତ ଅଗରକର ତାଙ୍କୁ କେବଳ ଟି-୨୦ ଦଳରେ ରଖିଛନ୍ତି, ଟି-୨୦ ଅନ୍ତର୍ଜାତୀୟ ସିରିଜ ଶେଷ ହେବା ପରେ ସେ ଭାରତକୁ ଫେରିବେ।