ଚାମ୍ପିଅନ୍ସ ଟ୍ରଫି ୨୦୨୫ ରେ ଜସପ୍ରୀତ ବୁମ୍ରାଙ୍କ ଅନୁପସ୍ଥିତିରେ ମଧ୍ୟ ଭାରତୀୟ ଦଳର ବୋଲରମାନେ ପ୍ରତିପକ୍ଷ ବ୍ୟାଟରଙ୍କୁ କଡ଼ା ଟକ୍କର ଦେଇଥିଲେ। ଏହି ଚାମ୍ପିୟନ୍ ବ୍ୟାଟରମାନଙ୍କର ଭାରତୀୟ ବୋଲରଙ୍କ ଆଗରେ ରାଜୁତି ଚାଲିନଥିଲା। ଗତ ଦଶନ୍ଧି ମଧ୍ୟରେ ଭାରତୀୟ ଦଳର ବୋଲିଂ ଅତ୍ୟନ୍ତ ଆକ୍ରମଣାତ୍ମକ ହୋଇପଡିଛି। ଯାହାର ସମସ୍ତ ଶ୍ରେୟ ଦଳର ସମସ୍ତ ବୋଲର ଏବଂ ଅଧିନାୟକକୁ ଯାଉଅଛି। କିନ୍ତୁ ବାରମ୍ବାର ଘରୋଇ କ୍ରିକେଟରେ ଭଲ ପ୍ରଦର୍ଶନ ସତ୍ତ୍ୱେ ଏହି ୩ ଜଣ ବୋଲରଙ୍କର ଭବିଷ୍ୟତ ବର୍ତ୍ତମାନ ଅନ୍ଧକାର ମଧ୍ୟକୁ ଠେଲି ହୋଇଯାଇଛି।

୧. ଭୁବନେଶ୍ୱର କୁମାର:- ଟିମ୍ ଇଣ୍ଡିଆ ପାଇଁ ଚମତ୍କାର ସ୍ୱିଙ୍ଗ୍ ବୋଲିଂ କରିଥିବା ଭୁବନେଶ୍ୱର କୁମାର ଟିମ୍ ଇଣ୍ଡିଆରୁ ବାଦ୍ ପଡିଛନ୍ତି। ସେ ୨୦୨୨ ମସିହାରେ ନ୍ୟୁଜିଲ୍ୟାଣ୍ଡ ବିପକ୍ଷରେ ଶେଷ ଟି-୨୦ ମ୍ୟାଚ ଖେଳିଥିଲେ ଯାହା ପରଠାରୁ ସେ ଦଳରୁ ବାଦ୍ ପଡିଛନ୍ତି। ୨୦୨୦ ମସିହାରେ, ଭୁବି ଆଘାତର ଶିକାର ହୋଇଥିଲେ, ତା’ପରେ ଖରାପ ଫର୍ମ କାରଣରୁ ଦଳରୁ ବାଦ୍ ପଡିଛନ୍ତି।

କିନ୍ତୁ ୨୦୨୨ ବର୍ଷ ପରେ ସେ ଭାରତୀୟ ଦଳରେ ଖେଳିବାର ସୁଯୋଗ ପାଇନାହାଁନ୍ତି। ଭୁବନେଶ୍ୱର ଟିମ୍ ଇଣ୍ଡିଆ ପାଇଁ ୨୧ ଟି ଟେଷ୍ଟ, ୧୨୧ ଟି ଏକଦିବସିୟ ଏବଂ ୮୭ ଟି-୨୦ ମ୍ୟାଚ୍ ଖେଳିଛନ୍ତି। ଯେଉଁଥିରେ ସେ ଟେଷ୍ଟରେ ୬୩ ୱିକେଟ୍, ଏକଦିବସିୟ ରେ ୧୪୧ ୱିକେଟ୍ ଏବଂ ଟି-୨୦ ରେ ୯୦ ୱିକେଟ୍ ନେଇଛନ୍ତି। ଆଇପିଏଲରେ ବୋଲର ଭାବରେ ସେ ୧୭୬ ଟି ମ୍ୟାଚରେ ୧୮୧ ୱିକେଟ୍ ନେଇଛନ୍ତି। 

୨. ଶାର୍ଦ୍ଦୁଲ ଠାକୁର:- ଭାରତୀୟ ଅଲରାଉଣ୍ଡର ଶାର୍ଦ୍ଦୁଲ ଠାକୁର ମଧ୍ୟ ଦୀର୍ଘ ଦିନ ଧରି ଟିମ୍ ଇଣ୍ଡିଆରୁ ବାଦ୍ ପଡିଛନ୍ତି। ଏହି ଖେଳାଳି ତାଙ୍କର ଭଲ ପ୍ରଦର୍ଶନ ଆଧାରରେ ଦଳରେ ପ୍ରବେଶ କରିଥିଲେ। କିନ୍ତୁ ତାଙ୍କର ଅନିୟମିତ ପ୍ରଦର୍ଶନ ଯୋଗୁଁ ତାଙ୍କୁ ଦଳରୁ ବାଦ୍ ଦିଆଯାଇଥିଲା। ଯଦିଓ ଘରୋଇ କ୍ରିକେଟ୍ ରେ ସେ ବଲ୍ ଏବଂ ବ୍ୟାଟ୍ ସହିତ ନିଜର ଜବରଦସ୍ତ ପ୍ରଦର୍ଶନ ଦ୍ୱାରା ଚୟନକର୍ତ୍ତାଙ୍କ ଦୃଷ୍ଟି ଆକର୍ଷଣ କରିଥିଲେ, କିନ୍ତୁ ତାଙ୍କୁ ଜାତୀୟ ଦଳରେ ସୁଯୋଗ ମିଳିପାରୁନାହିଁ।

ଶାର୍ଦ୍ଦୁଲ ଠାକୁର ସେହି ଅଲରାଉଣ୍ଡରଙ୍କ ତାଲିକାରେ ଆସିଛନ୍ତି, ଯେଉଁମାନେ କେବଳ ବଲ୍‌ରେ ନୁହେଁ ବରଂ ସମୟ ଆସିଲେ ବ୍ୟାଟ୍‌ରେ ମଧ୍ୟ ନିଜକୁ ପ୍ରମାଣ କରିବାର କ୍ଷମତା ରଖିଛନ୍ତି। ଅଷ୍ଟ୍ରେଲିଆ ଗସ୍ତ ସମୟରେ ମଧ୍ୟ ସେ ଗୁରୁତ୍ୱପୂର୍ଣ୍ଣ ଟେଷ୍ଟ ମ୍ୟାଚରେ ଏହା କରିଛନ୍ତି। ଟିମ୍ ଇଣ୍ଡିଆରେ ଶାର୍ଦ୍ଦୁଲ ଠାକୁରଙ୍କ ଅବଦାନ ବିଷୟରେ କହିବାକୁ ଗଲେ ସେ ଏପର୍ଯ୍ୟନ୍ତ ୧୧ ଟି ଟେଷ୍ଟ, ୪୭ ଟି ଏକଦିବସିୟ ଏବଂ ୨୫ ଟି-୨୦ ମ୍ୟାଚ୍ ଖେଳିଛନ୍ତି। ଯେଉଁଥିରେ ସେ ଟେଷ୍ଟରେ ୩୧ ୱିକେଟ୍, ଏକଦିବସିୟରେ ୬୫ ୱିକେଟ୍ ଏବଂ ଟି-୨୦ ରେ ୩୩ ୱିକେଟ୍ ନେଇଛନ୍ତି। ଆଇପିଏଲରେ ସେ ୯୫ ଟି ମ୍ୟାଚରେ ୯୪ଟି ୱିକେଟ୍ ନେଇଛନ୍ତି।

୩. ଦୀପକ ଚହର:- ଭାରତୀୟ ଦଳର ବୋଲର ଭୂବନେଶ୍ୱର କୁମାରଙ୍କ ପରି ଦୀପକ ଚହର ମଧ୍ୟ ଆହତ କାରଣରୁ ଦୀର୍ଘ ସମୟ ଖେଳରୁ ଦୂରେଇ ରହିଥିଲେ ଏବଂ ପରେ ଜାତୀୟ ଦଳରୁ ଦୂରେଇ ଯାଇଥିଲେ। ବର୍ତ୍ତମାନ ଦୀପକ ଚହର ମଧ୍ୟ ଦଳକୁ ଫେରିବା ପାଇଁ ସଂଘର୍ଷ କରୁଛନ୍ତି। ଏହି ଖେଳାଳି ତାଙ୍କ ବୋଲିଂରେ ବହୁତ ପ୍ରଭାବିତ କରିଥିଲେ। ଏପରିକି ବ୍ୟାଟିଂ ସହିତ ସେ ଏକ ଚମତ୍କାର ପ୍ରଦର୍ଶନ କରି ରାତାରାତି ସୁପରଷ୍ଟାର ହୋଇ ଯାଇଥିଲେ। 

ଦୀପକ ଚହର ଏପର୍ଯ୍ୟନ୍ତ ଭାରତ ପାଇଁ ୧୩ ଟି ଏକଦିବସିୟ ଏବଂ ୨୫ ଟି-୨୦ ମ୍ୟାଚ୍ ଖେଳିଛନ୍ତି। ଯେଉଁଥିରେ ସେ ଏକଦିବସିୟରେ ୧୬ ୱିକେଟ୍ ଏବଂ ଟି-୨୦ ରେ ୩୧ ୱିକେଟ୍ ନେଇଛନ୍ତି। ଅନ୍ୟପକ୍ଷରେ ଯଦି ଆମେ ଆଇପିଏଲ୍ ବିଷୟରେ କଥା ହେବା, ସେ ୮୧ ଆଇପିଏଲ୍ ମ୍ୟାଚ୍ ରେ ୭୭ ୱିକେଟ୍ ନେଇଛନ୍ତି।