ଭାରତକୁ ନାଲିଆଖି ଦେଖାଉଛି ପାକିସ୍ତାନ! ଚାମ୍ପିଅନ୍ସ ଟ୍ରଫି ପାଇଁ ନ ଆସିଲେ ଏପରି କରିବାକୁ ଦେଲା ଧମକ….
ଆନ୍ତର୍ଜାତୀୟ କ୍ରିକେଟ୍ ପରିଷଦର କାର୍ଯ୍ୟସୂଚୀ ଅନୁଯାୟୀ ପାକିସ୍ତାନରେ ଚାମ୍ପିଅନ୍ସ ଟ୍ରଫି ୨୦୨୫ ଆୟୋଜିତ ହେବ। କିନ୍ତୁ, ୨୦୦୮ ପରଠାରୁ ଭାରତୀୟ ଦଳ ସୁରକ୍ଷା କାରଣରୁ ପାକିସ୍ତାନ ଯାଇନାହିଁ। ଗତ ବର୍ଷ ଅନୁଷ୍ଠିତ ଏସିଆ କପ୍ ୨୦୨୩ ଟୁର୍ନାମେଣ୍ଟରେ ଟିମ୍ ଇଣ୍ଡିଆ ପାକିସ୍ତାନ ଗସ୍ତ କରିନଥିଲା। ହାଇବ୍ରିଡ୍ ମଡେଲ୍ ଅନୁଯାଇ ଶ୍ରୀଲଙ୍କା ଏହି ଟୁର୍ନାମେଣ୍ଟ ଆୟୋଜନ କରିଥିଲା।
ବିସିସିଆଇ ପୁଣି ଥରେ ନିଜ ଦଳ ବିଷୟରେ ସ୍ପଷ୍ଟ କରିଛି ଯେ ଏହା ପରବର୍ତ୍ତୀ ଆଇସିସି ଇଭେଣ୍ଟ ପାଇଁ ପାକିସ୍ତାନକୁ ଯିବ ନାହିଁ ବରଂ ମ୍ୟାଚ୍ ଏକ ନିରପେକ୍ଷ ସ୍ଥାନରେ ଅନୁଷ୍ଠିତ କରିବାକୁ ବିସିସିଆଇ ଦାବି କରିଛି। କିନ୍ତୁ ପିସିବି ଏହାକୁ ଆଦୌ ଗ୍ରହଣ କରିବାକୁ ପ୍ରସ୍ତୁତ ନୁହେଁ, ତେଣୁ ଏହା ଧମକପୂର୍ଣ୍ଣ ସ୍ୱର ଗ୍ରହଣ କରିଛି। ଯଦି ଭାରତୀୟ ଦଳ ଚାମ୍ପିଅନ୍ସ ଟ୍ରଫି ପାଇଁ ପାକିସ୍ତାନ ଯିବାକୁ ମନା କରେ ତେବେ ଭାରତରେ ହେବାକୁ ଥିବା ଆଗାମୀ ଟି-୨୦ ବିଶ୍ୱକପ ପାଇଁ ପାକିସ୍ତାନ କ୍ରିକେଟ୍ ଦଳ ଆସିବ ନାହିଁ ବୋଲି ପିସିବି ପକ୍ଷରୁ କୁହାଯାଇଛି। ଯାହାର ଅର୍ଥ ବର୍ତ୍ତମାନ ଭାରତ ପାକିସ୍ତାନ ନ ଗଲେ ୨୦୨୬ ମସିହାରେ ଭାରତ ଏବଂ ଶ୍ରୀଲଙ୍କା ମିଳିତ ଭାବେ ଆୟୋଜନ କରିବାକୁ ଥିବା ଟି-୨୦ ବିଶ୍ୱକପରୁ ପାକିସ୍ତାନ ଓହରିପାରେ।
ତେବେ, ପିସିବିର ଏହି ଧମକ ଯୋଗୁଁ ଭାରତୀୟ କ୍ରିକେଟ୍ ବୋର୍ଡ କେଉଁ ନିଷ୍ପତ୍ତି ନେବ, ବର୍ତ୍ତମାନ ସମୟରେ ଏହା ବିଷୟରେ କିଛି କହିବା ସହଜ ହେବନାହିଁ। ପାକିସ୍ତାନର ନ୍ୟୁଜ୍ ଚ୍ୟାନେଲ ଜିଓ ନ୍ୟୁଜ୍ ରିପୋର୍ଟ ଅନୁଯାୟୀ, ପିସିବି ପାକିସ୍ତାନରେ ପୁରା ଚାମ୍ପିଅନ୍ସ ଟ୍ରଫି ୨୦୨୫ ଆୟୋଜନ କରିବାକୁ ଜିଦ୍ ଧରିଛି। ଜୁଲାଇ ୧୯ ରୁ ୨୨ ପର୍ଯ୍ୟନ୍ତ କଲମ୍ବୋରେ ଆୟୋଜିତ ହେବାକୁ ଥିବା ଆଇସିସି ବାର୍ଷିକ ସମ୍ମିଳନୀରେ ପିସିବି କୌଣସି ହାଇବ୍ରିଡ୍ ମଡେଲ୍ ପ୍ରସ୍ତାବକୁ ବିରୋଧ କରିବାକୁ ନିଷ୍ପତ୍ତି ନେଇଛି।
କୌତୁହଳର ବିଷୟ, ଏହି ଖବର ପାକିସ୍ତାନରୁ ବାହାରକୁ ଆସୁଛି ଯେଉଁ ସମୟରେ ଆଲୋଚନା ଚାଲିଛି ଯେ ଭାରତୀୟ ଦଳ ଚାମ୍ପିଅନ୍ସ ଟ୍ରଫି ୨୦୨୫ ପାଇଁ ପାକିସ୍ତାନ ଯିବ ନାହିଁ। ଏହା ଆଇସିସି ପାଇଁ ଏକ ବଡ ସମସ୍ୟା ସୃଷ୍ଟି କରିବାର ସମ୍ଭାବନା ଅଛି। ଏଠାରେ ଉଲ୍ଲେଖଯୋଗ୍ୟ ଯେ ୨୦୦୮ ରେ ମୁମ୍ବାଇରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଦୁଇ ଦେଶ ମଧ୍ୟରେ ରାଜନୈତିକ ସମ୍ପର୍କ ତିକ୍ତ ହୋଇଯାଇଥିଲା। ଏହି ଦୁଇ ଦଳ ମଧ୍ୟରେ ଦ୍ୱିପାକ୍ଷିକ ସିରିଜ୍ ମଧ୍ୟ ସ୍ଥଗିତ ରଖାଯାଇଛି। ୨୦୦୮ ରେ ଏସିଆ କପ୍ ପାଇଁ ଭାରତ ଶେଷ ଥର ପାଇଁ ପାକିସ୍ତାନ ଗସ୍ତ କରିଥିଲା। ଏହା ପରେ ସୁରକ୍ଷା କ୍ରିକେଟ୍ କାରଣରୁ ୨୦୦୮ ଏସିଆ କପ୍ ପରଠାରୁ ଭାରତୀୟ କ୍ରିକେଟ୍ ଦଳ ପାକିସ୍ତାନ ଗସ୍ତ କରି ନାହିଁ।
ଏଥର ମଧ୍ୟ ଚାମ୍ପିଅନ୍ସ ଟ୍ରଫି ପାଇଁ ହାଇବ୍ରିଡ ମଡେଲ ଲାଗୁ କରିବାକୁ ଆଇସିସିକୁ ଅନୁରୋଧ କରିବାକୁ ବିସିସିଆଇ ସୂଚିତ କରିଛି ଏବଂ ନିରପେକ୍ଷ ଦେଶରେ ଏହାର ମ୍ୟାଚ୍ ଖେଳିବାକୁ ଭାରତ ପକ୍ଷରୁ ଅନୁରୋଧ କରାଯାଇଛି। ଏସିଆ କପ୍ ୨୦୨୩ ସମୟରେ ମଧ୍ୟ ସମାନ ସମସ୍ୟା ସାମ୍ନାକୁ ଆସିଥିଲା। ଏପରିକି ସେତେବେଳେ ବିସିସିଆଇ ଟିମ୍ ଇଣ୍ଡିଆକୁ ପାକିସ୍ତାନ ପଠାଇବାକୁ ମନା କରିଦେଇଥିଲା। ତା’ପରେ ଏକ ହାଇବ୍ରିଡ୍ ମଡେଲ୍ ଗ୍ରହଣ କରାଯାଇଥିଲା। ଭାରତର ସମସ୍ତ ମ୍ୟାଚ୍ ଶ୍ରୀଲଙ୍କାରେ ଖେଳାଯାଇଥିଲା। ଏହି କାରଣରୁ ପାକିସ୍ତାନକୁ ସେମିଫାଇନାଲ ଏବଂ ଫାଇନାଲ ମ୍ୟାଚର ଆୟୋଜନ ହରାଇବାକୁ ପଡିଥିଲା। ଯେଉଁଥିପାଇଁ ଚାମ୍ପିଅନ୍ସ ଟ୍ରଫି ୨୦୨୫ କୁ ସମ୍ପୂର୍ଣ୍ଣ ଭାବରେ ପାକିସ୍ତାନୀ ମାଟିରେ ରଖିବା ପାଇଁ ପିସିବି ପକ୍ଷରୁ କଠୋର ଆଭିମୁଖ୍ୟ ଗ୍ରହଣ କରାଯାଇଛି।