ରୋହିତ ଶର୍ମାଙ୍କ ନେତୃତ୍ୱରେ ଭାରତୀୟ ଦଳ ଟି-୨୦ ବିଶ୍ୱକପ ୨୦୨୪ ରେ ଭାଗ ନେବାକୁ ପ୍ରସ୍ତୁତ ହେଉଛି। ଶନିବାର, ବାଂଲାଦେଶ ବିପକ୍ଷରେ ଖେଳାଯାଇଥିବା ଅଭ୍ୟାସ ମ୍ୟାଚରେ ଟିମ୍ ଇଣ୍ଡିଆ ଏକ ଚମତ୍କାର ବିଜୟ ହାସଲ କରିଥିଲା। ଯେଉଁଥିରେ ଭାରତ ୬୦ ରନରେ ମ୍ୟାଚ ଜିତିଥିଲା। ବର୍ତ୍ତମାନ ଭାରତୀୟ ଦଳକୁ ଏହି ଗ୍ରାଉଣ୍ଡରେ ଗ୍ରୁପ୍ ପର୍ଯ୍ୟାୟର ପ୍ରଥମ ମ୍ୟାଚ୍ ଖେଳିବାକୁ ପଡିବ। ତେବେ ଏହି ମ୍ୟାଚ୍ ପୂର୍ବରୁ ଭାରତୀୟ ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ ତାଙ୍କ ଖେଳାଳିଙ୍କୁ ଭଲ ଉପଦେଶ ଦେଇଛନ୍ତି।  ସେ ପିଚ୍ ସମ୍ପର୍କରେ ଏକ ବଡ଼ ବିବୃତ୍ତି ମଧ୍ୟ ଦେଇଛନ୍ତି।

ବାଂଲାଦେଶ ବିପକ୍ଷରେ ଖେଳାଯାଇଥିବା ମ୍ୟାଚରେ ପିଚରେ ଉଭୟ ଗତି ଏବଂ ବାଉନ୍ସ ଦେଖିବାକୁ ମିଳିଥିଲା।  କିନ୍ତୁ ଏହା ସତ୍ତ୍ୱେ ଦଳର କିଛି ବ୍ୟାଟ୍ସମ୍ୟାନ୍ ଭଲ ପ୍ରଦର୍ଶନ କରିଥିଲେ। ଋଷବ ପନ୍ତ ୩୨ ବଲରେ ୫୩ ରନର ଇନିଂସ ଖେଳିଥିଲେ ଏବଂ ପାଣ୍ଡ୍ୟା ୨୩ ବଲରେ ୪୦ ରନ୍ ସ୍କୋର କରିବାରେ ସକ୍ଷମ ହୋଇଥିଲେ।  ବୋଲିଂରେ ଅର୍ଶଦୀପ ସିଂ ଏବଂ ଶିବମ୍ ଦୁବେଙ୍କୁ ୨-୨ ସଫଳତା ମିଳିଥିଲା।

ହାର୍ଦ୍ଦିକ ପାଣ୍ଡ୍ୟା, ମହମ୍ମଦ ସିରାଜ, ଅକ୍ଷର ପଟେଲ ଏବଂ ଶିବମ ଦୁବେ ପ୍ରତ୍ୟେକଙ୍କୁ ଗୋଟିଏ ଲେଖାଏଁ ସଫଳତା ମିଳିଥିଲା। ତେବେ ମ୍ୟାଚ ଜିତିବା ପରେ ମଧ୍ୟ କୋଚ ଦ୍ରାବିଡ ପିଚରେ ଅସନ୍ତୁଷ୍ଟ ମନେ ହେଉଛନ୍ତି। ଭାରତୀୟ ଦଳ ନସାଉ କ୍ରିକେଟ୍ ଗ୍ରାଉଣ୍ଡରେ ଏହାର ତିନୋଟି ଲିଗ୍ ପର୍ଯ୍ୟାୟ ମ୍ୟାଚ୍ ଖେଳିବ। ପିଚ୍ ବିଷୟରେ କହୁଥିବା ବେଳେ ରାହୁଲ ଦ୍ରାବିଡ ବିସିସିଆଇ ଦ୍ୱାରା ପ୍ରକାଶିତ ଏକ ଭିଡିଓରେ କହିଛନ୍ତି ଯେ, “ଗ୍ରାଉଣ୍ଡ ଟିକେ ନରମ ଅଛି ଏବଂ ଖେଳାଳିମାନଙ୍କ ହାମଷ୍ଟ୍ରିଙ୍ଗ୍ ଏବଂ କାଫ୍ ଉପରେ ଏହାର ପ୍ରଭାବ ପଡିବ। ତେଣୁ, ଆମେ ଏହା ଉପରେ ଧ୍ୟାନ ଦେବା ଉଚିତ ଏବଂ ଖେଳାଳିମାନେ ସେମାନଙ୍କର ଯତ୍ନ ନେବା ଉଚିତ୍। ବେଳେବେଳେ ପିଚ୍ ଟିକେ ସ୍ପଞ୍ଜୀ ରହିଥାଏ। କିନ୍ତୁ ମୁଁ ଭାବୁଛି ଆମେ ଏହାକୁ ବହୁତ ଭଲ ସଂଯୋଜନା କରିଛୁ। ଆମେ ଏଠାରେ ଭଲ ବ୍ୟାଟିଂ କରି ଆଶା କରାଯାଉଥିବା ଠାରୁ ଅଧିକ ସ୍କୋର କରିଥିଲୁ।  ପରେ ଆମେ ଭଲ ବୋଲିଂ କରିଥିଲୁ”। 

ଆମେରିକା ଏବଂ ୱେଷ୍ଟଇଣ୍ଡିଜ୍ ଦ୍ୱାରା ଆୟୋଜିତ ବିଶ୍ୱକପ୍ ୨୦୨୪ ଆରମ୍ଭ ହୋଇଛି। ଭାରତୀୟ ଦଳ ଆୟର୍ଲାଣ୍ଡ ବିପକ୍ଷରେ ଜୁନ୍ ୫ ତାରିଖ ଠାରୁ ଅଭିଯାନ ଆରମ୍ଭ କରିବ। ଜୁନ୍ ୯ ତାରିଖରେ ପାକିସ୍ତାନ ବିପକ୍ଷରେ ମ୍ୟାଚ୍ ଖେଳାଯିବ, ଜୁନ୍ ୧୨ ତାରିଖରେ ଟିମ୍ ଇଣ୍ଡିଆ ଆମେରିକା ବିପକ୍ଷରେ ଖେଳିବ, ଜୁନ୍ ୧୫ ରେ କାନାଡା ବିପକ୍ଷରେ ମ୍ୟାଚ ଖେଳାଯିବ।  ଭାରତ ସୁପର ୮ ରେ ପହଞ୍ଚିବା ପାଇଁ ସମସ୍ତ ତିନୋଟି ମ୍ୟାଚ୍ ଗୁରୁତ୍ୱପୂର୍ଣ୍ଣ ରହିବ।