ଅଷ୍ଟ୍ରେଲିଆକୁ ହରାଇବା ପରେ ଭାରତୀୟ ଡ୍ରେସିଂ ରୁମରେ ହେଲା ବଡ଼ ସେଲିବ୍ରେସନ! ଭାଇରାଲ ହେଉଛି ଭିଡିଓ….
ଭାରତ ସେମିଫାଇନାଲରେ ଅଷ୍ଟ୍ରେଲିଆକୁ ପରାସ୍ତ କରି ଚାମ୍ପିଅନ୍ସ ଟ୍ରଫି ୨୦୨୫ ର ଫାଇନାଲରେ ପ୍ରବେଶ କରିଛି। ଷ୍ଟିଭ ସ୍ମିଥଙ୍କ ଅଧିନାୟକତ୍ୱରେ ଥିବା କଙ୍ଗାରୁ ଦଳକୁ ୪ ଟି ୱିକେଟରେ ପରାସ୍ତ କରି ଭାରତ ଚାମ୍ପିଅନ୍ସ ଟ୍ରଫି ଟାଇଟଲର ନିକଟତର ହୋଇଛି। ଟାଇଟଲ୍ ମ୍ୟାଚ୍ ପୂର୍ବରୁ ଏହି ବିଜୟ ଭାରତ ପାଇଁ ଏକ ବହୁତ ବଡ ଏବଂ ଗୁରୁତ୍ୱପୂର୍ଣ୍ଣ ବିଜୟ ଥିଲା, ତେଣୁ ଭାରତୀୟ ଦଳ ଏହାକୁ ସମାନ ଢଙ୍ଗରେ ପାଳନ ମଧ୍ୟ କରିଥିଲା।
ସେମିଫାଇନାଲରେ ଅଷ୍ଟ୍ରେଲିଆକୁ ହରାଇବା ପରେ ବିରାଟ କୋହଲି ଏବଂ ଅଧିନାୟକ ରୋହିତ ଶର୍ମା ଡ୍ରେସିଂ ରୁମରେ ଜୋରଦାର୍ ସେଲିବ୍ରେସନ୍ କରିଥିଲେ, ଯାହାର ଭିଡିଓ ସୋସିଆଲ ମିଡିଆରେ ହଇଚଇ ସୃଷ୍ଟି କରୁଛି।
ଚାମ୍ପିଅନ୍ସ ଟ୍ରଫି ୨୦୨୫ ର ସେମିଫାଇନାଲରେ ଅଷ୍ଟ୍ରେଲିଆକୁ ପରାସ୍ତ କରିବା ପରେ ବିସିସିଆଇ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରିଛି ଯେଉଁଥିରେ ପୂର୍ବତନ ଅଧିନାୟକ ବିରାଟ କୋହଲି, ବର୍ତ୍ତମାନର ଅଧିନାୟକ ରୋହିତ ଶର୍ମାଙ୍କ ସମେତ ଅନେକ ଖେଳାଳି ଏହି ବିଜୟ ଉତ୍ସବ ପାଳନ କରୁଥିବା ଦେଖିବାକୁ ମିଳିଛି। ଭାରତ ପାଇଁ ଏହି ବିଜୟ କେତେ ବଡ ଥିଲା ବିରାଟ କୋହଲିଙ୍କ ମୁହଁରୁ ଜାଣି ହେଉଥିଲା କାରଣ କେଏଲ ରାହୁଲ ଅଷ୍ଟ୍ରେଲିଆ ବିପକ୍ଷରେ ବିଜୟ ଛକା ମାରିବା ପରେ ଡ୍ରେସିଂ ରୁମରେ ବିରାଟ କୋହଲି ଏକ ଭିନ୍ନ ଶୈଳୀ ଦେଖିବାକୁ ମିଳିଥିଲା ଯାହା ସାଧାରଣତଃ ଦେଖିବାକୁ ମିଳିନଥାଏ। ବିରାଟ କୋହଲି ଭାରତୀୟ ଅଧିନାୟକ ରୋହିତ ଶର୍ମାଙ୍କୁ ବାରମ୍ବାର ଆଲିଙ୍ଗନ କରୁଥିବା ଦେଖିବାକୁ ମିଳିଥିଲା।
ଅଷ୍ଟ୍ରେଲିଆ ଅଧିନାୟକ ଷ୍ଟିଭ୍ ସ୍ମିଥ୍ ଟସ୍ ଜିତି ପ୍ରଥମେ ଦୁବାଇର ମନ୍ଥର ପିଚ୍ ରେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ ଏବଂ ତାଙ୍କ ଦଳ ଭାରତ ପାଇଁ ୫୦ ଓଭରରେ ୨୬୫ ରନ୍ ଲକ୍ଷ୍ୟ ସ୍ଥିର କରିଥିଲା। ଜିତିବା ସହଜ ମନେ ହେଉଥିଲେ ମଧ୍ୟ ଏହି ଲକ୍ଷ୍ୟ ହାସଲ କରିବା ଭାରତ ପାଇଁ ଏକ ଚ୍ୟାଲେଞ୍ଜ ସଦୃଶ ରହିଥିଲା କାରଣ ଭାରତ ମାତ୍ର ୪୨ ରନରେ ଉଭୟ ଓପନରଙ୍କ ୱିକେଟ୍ ହରାଇଥିଲା। ଏହା ପରେ ଇନ୍-ଫର୍ମ ବ୍ୟାଟ୍ସମ୍ୟାନ୍ ଶ୍ରେୟସ୍ ଆୟରଙ୍କ ସହ ଚେଜ୍ ମାଷ୍ଟର ବିରାଟ କୋହଲି ଏକ ଶତକୀୟ ଭାଗିଦାରୀ ଗଢିଥିଲେ। ତେବେ ୧୩୪ ରନରେ ୪୫ ରନ୍ ସ୍କୋର କରିବା ପରେ ଆୟର୍ ଆଉଟ୍ ହୋଇଥିଲେ।
ଏହା ପରେ କୋହଲି ୫ ନମ୍ବରରେ ଆସି ଅକ୍ସର ପଟେଲଙ୍କ ସହ ଭାଗିଦାରୀ ଆରମ୍ଭ କରିଥିଲେ ଏବଂ ୪୪ ରନ୍ ଯୋଡିଥିଲେ। କିନ୍ତୁ ୧୭୮ ସ୍କୋରରେ ଅକ୍ଷର୍ ମଧ୍ୟ ୨୭ ରନ୍ ସ୍କୋର କରିବା ପରେ ଆଉଟ ହୋଇଯାଇଥିଲେ। ଏହା ପରେ ୬ ନମ୍ବରରେ କ୍ରିଜକୁ ଆସିଥିବା କେ.ଏଲ୍ ରାହୁଲ କୋହଲିଙ୍କୁ ଭଲ ଭାବରେ ସମର୍ଥନ କରିଥିଲେ ଏବଂ ଷଷ୍ଠ ୱିକେଟ୍ ପାଇଁ ୪୭ ରନ୍ ଯୋଡିଥିଲେ, ପରେ ବିରାଟ ଆଡାମ୍ ଝାମ୍ପାଙ୍କ ବଲରେ ଆଉଟ ହୋଇଥିଲେ ହେଁ ତାଙ୍କ ସ୍ଥାନରେ ଆସିଥିବା ହାର୍ଦ୍ଦିକ ପାଣ୍ଡ୍ୟା ଭାରତକୁ ବିଜୟ ଦ୍ବାରଦେଶକୁ ନେଇ ଯାଇଥିଲେ।