ଚାମ୍ପିଅନ୍ସ ଟ୍ରଫି ୨୦୨୫ ଫେବୃଆରୀ ୧୯ ତାରିଖରୁ ଆରମ୍ଭ ହେବ, ଯେଉଁଥିପାଇଁ ବିସିସିଆଇ ଜାନୁଆରୀ ୧୮ ରେ ୧୫ ଜଣିଆ ଦଳ ଘୋଷଣା କରିଥିଲା। ମୁଖ୍ୟ ଦ୍ରୁତ ବୋଲର ଜସପ୍ରୀତ ବୁମ୍ରାଙ୍କୁ ମଧ୍ୟ ଚାମ୍ପିଅନ୍ସ ଟ୍ରଫି ଦଳରେ ସାମିଲ କରାଯାଇଛି, କିନ୍ତୁ ଟୁର୍ନାମେଣ୍ଟ ପୂର୍ବରୁ ଫିଟ୍ ହେବା ତାଙ୍କ ପାଇଁ କଷ୍ଟସାଧ୍ୟ ମାନେହେଉଛି। ଅନ୍ୟପକ୍ଷରେ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଟିମ୍ ଇଣ୍ଡିଆ ଘୋଷଣା କରିଥିଲେ, ସେତେବେଳେ ବୁମରା ପ୍ରଥମ ଦୁଇଟି ଦିନିକିଆରୁ ବାଦ୍ ପଡିବେ ବୋଲି କୁହାଯାଇଥିଲା। ସେ ତୃତୀୟ ଏକଦିବସିୟ ରେ ପ୍ରତ୍ୟାବର୍ତ୍ତନ କରିପାରନ୍ତି, କିନ୍ତୁ ଇଂଲଣ୍ଡ ବିପକ୍ଷ ଏକଦିବସିୟ ସିରିଜ୍ ଆରମ୍ଭ ପୂର୍ବରୁ ବିସିସିଆଇ ଏକ ନୂତନ ଦଳ ଘୋଷଣା କରିଥିଲା ​​ଯେଉଁଥିରେ ବୁମ୍ରା ତୃତୀୟ ଦିନିକିଆରୁ ମଧ୍ୟ ବାଦ୍ ପଡ଼ିଥିଲେ। ବର୍ତ୍ତମାନ ଜସପ୍ରୀତ ବୁମ୍ରାଙ୍କ ଫିଟନେସ ବିଷୟରେ ଏକ ବଡ ଅପଡେଟ୍ ସାମ୍ନାକୁ ଆସିଛି।

ଅଷ୍ଟ୍ରେଲିଆ ବିପକ୍ଷ ଅନ୍ତିମ ଟେଷ୍ଟର ପ୍ରଥମ ଇନିଂସରେ ୧୦ ଓଭର ବୋଲିଂ କରିବା ପରେ ମୁଖ୍ୟ ଦ୍ରୁତ ବୋଲର ଜସପ୍ରୀତ ବୁମ୍ରା ଆହତ ହୋଇଥିଲେ। ବ୍ୟାକ ଷ୍ଟ୍ରେନର ଶିକାର ହେବା ପରେ ତାଙ୍କୁ ତୁରନ୍ତ ସ୍କାନ ପାଇଁ ନିଆଯାଇଥିଲା, ଯାହା ପରେ ସେ ଦ୍ୱିତୀୟ ଇନିଂସରେ ଗୋଟିଏ ବଲ ବୋଲିଂ କରିପାରିନଥିଲେ। ଯଦିଓ ଇଂଲଣ୍ଡ ବିପକ୍ଷ ଏକଦିବସିୟ ସିରିଜ୍ ପୂର୍ବରୁ ବୁମରା ସମ୍ପୂର୍ଣ୍ଣ ଫିଟ୍ ହେବ ବୋଲି ଆଶା କରାଯାଇଥିଲା, କିନ୍ତୁ ବର୍ତ୍ତମାନ ତାଙ୍କ ଫିଟନେସ ଉପରେ ଏକ ବଡ ପ୍ରଶ୍ନବାଚି ସୃଷ୍ଟି ହୋଇଛି। 

ଟାଇମ୍ସ ଅଫ୍ ଇଣ୍ଡିଆ ରିପୋର୍ଟ ଅନୁଯାୟୀ, ବିସିସିଆଇ ମେଡିକାଲ ଦଳର ତତ୍ତ୍ବଧାନରେ ଜସପ୍ରୀତ ବୁମ୍ରାଙ୍କ ପିଠିରେ ଆଘାତ ସ୍କାନ କରାଯାଇଛି ଏବଂ ତାଙ୍କ ରିପୋର୍ଟ ଉପରେ ଆଲୋଚନା ହେଉଛି। ରିପୋର୍ଟ ଅନୁଯାୟୀ, ବୁମରା ଆସନ୍ତା ୨୪ ରୁ ୪୮ ଘଣ୍ଟା ମଧ୍ୟରେ ଜିମ୍ ଏବଂ ହାଲୁକା ବୋଲିଂ ଆରମ୍ଭ କରିପାରିବେ। ଏଥିସହିତ ବେଙ୍ଗାଲୁରୁର ଜାତୀୟ କ୍ରିକେଟ୍ ଏକାଡେମୀରେ ତାଙ୍କର ରିହ୍ୟାବ ଆରମ୍ଭ ହେବାକୁ ଯାଉଛି।

ଚାମ୍ପିଅନ୍ସ ଟ୍ରଫି ଫେବୃଆରୀ ୧୯ ତାରିଖରେ ପାକିସ୍ତାନରେ ଆରମ୍ଭ ହେଉଥିବାବେଳେ ଟିମ୍ ଇଣ୍ଡିଆ ଫେବୃଆରୀ ୨୦ ତାରିଖରୁ ଦୁବାଇରେ ବାଂଲାଦେଶ ବିପକ୍ଷରେ ଅଭିଯାନ ଆରମ୍ଭ କରିବ। ଏହାପୂର୍ବରୁ, ଦୁବାଇ ସମୟ ୧୧ ଫେବୃଆରୀ ମଧ୍ୟରାତ୍ରି ପର୍ଯ୍ୟନ୍ତ ସମସ୍ତ ୮ ଟି ଦେଶକୁ ସେମାନଙ୍କ ଦଳରେ ପରିବର୍ତ୍ତନ କରିବାକୁ ଅନୁମତି ଦିଆଯିବ। ଏକ ସୂତ୍ରରୁ ଜଣାଯାଇଛି ଯେ, ଯଦି ଟୁର୍ନାମେଣ୍ଟ ପୂର୍ବରୁ ବୁମ୍ରା ଶତ ପ୍ରତିଶତ ଫିଟ୍ ହେବାର ଆଶା ରହିଥାଏ, ତେବେ ବିସିସିଆଇ ଅପେକ୍ଷା କରିବ। ବିସିସିଆଇ ଏକଦିବସିୟ ବିଶ୍ୱକପ ୨୦୨୩ ରେ ହାର୍ଦ୍ଦିକ ପାଣ୍ଡ୍ୟାଙ୍କ ସହ ସମାନ କାର୍ଯ୍ୟ କରିଥିଲା। ଯଦି ବୁମରା ନିଜର ଫିଟନେସ୍ ପ୍ରମାଣିତ କରିବାକୁ ବିଫଳ ହୁଅନ୍ତି ତେବେ ତାଙ୍କ ପାଇଁ ବଦଳ ଖେଳାଳିଙ୍କୁ ସାମିଲ କରାଯିବ।