ଚାମ୍ପିଅନ୍ସ ଟ୍ରଫି ୨୦୨୫ ରେ ଟିମ୍ ଇଣ୍ଡିଆ ନିଜର ଉଭୟ ମ୍ୟାଚ୍ ସହଜରେ ଜିତି ନେଇଛି। ପ୍ରଥମ ମ୍ୟାଚରେ ଶୁଭମାନ ଗିଲ ଏକ ଶତକ ହାସଲ କରିଥିଲେ ଏବଂ ଦ୍ୱିତୀୟ ମ୍ୟାଚରେ ବିରାଟ କୋହଲି ଏକ ଶତକ ହାସଲ କରିଛନ୍ତି। କିନ୍ତୁ ବର୍ତ୍ତମାନ ଟିମ୍ ଇଣ୍ଡିଆ ନ୍ୟୁଜିଲ୍ୟାଣ୍ଡ ସହିତ ମ୍ୟାଚ୍ ଖେଳିବ। ଅତୀତରେ ଭାରତ ଯେଉଁ ଭୁଲ ଗୁଡିକ କରିଛି ତାହାକୁ ନ ସୁଧାରିଲେ ଏହା ଦଳର ପରାଜୟର କାରଣ ସାଜିପାରେ।

ବାଂଲାଦେଶ ବିପକ୍ଷରେ ଟିମ୍ ଇଣ୍ଡିଆ ଭଲ ବୋଲିଂ କରିଥିଲା। ଦ୍ରୁତ ବୋଲରମାନେ ୧୦ ୱିକେଟ୍ ମଧ୍ୟରୁ ୮ଟି ନେଇଥିଲେ। କିନ୍ତୁ ଦ୍ରୁତ ବୋଲିଂ ପାକିସ୍ତାନ ବିପକ୍ଷରେ କୌଣସି ଧାର ଦେଖାଇ ପାରିନଥିଲା। ପାକିସ୍ତାନ ବିପକ୍ଷରେ ୧୦ ଟି ୱିକେଟ୍ ମଧ୍ୟରୁ ୩ ଟି ଦ୍ରୁତ ବୋଲରଙ୍କ ନିକଟକୁ ଯାଇଥିଲା।  ଏଥି ସହିତ ଦ୍ରୁତ ବୋଲରମାନଙ୍କର ଲାଇନ ଏବଂ ଲେନ୍ଥ ମଧ୍ୟ ଭଲ ରହିନାହିଁ। ଗତ ମ୍ୟାଚରେ ପାୱାରପ୍ଲେ ସମୟରେ ଜସପ୍ରୀତ ବୁମ୍ରାଙ୍କ ଅଭାବ ଦୃଶ୍ୟମାନ ହୋଇଥିଲା। ନ୍ୟୁଜିଲ୍ୟାଣ୍ଡ ବିପକ୍ଷରେ ଏହି ଭୁଲ ଟିମ୍ ଇଣ୍ଡିଆ ପାଇଁ ମହଙ୍ଗା ସାବ୍ୟସ୍ତ ହୋଇପାରେ। ପ୍ରଶଂସକମାନେ ଅର୍ଶଦୀପ ସିଂଙ୍କୁ ଦଳରେ ସ୍ଥାନ ନଦେବା ନେଇ ବାରମ୍ବାର ପ୍ରଶ୍ନ ଉଠାଉଛନ୍ତି। 

ମହମ୍ମଦ ଶାମି ୫ ୱିକେଟ୍ ନେଇ ବାଂଲାଦେଶ ବିପକ୍ଷରେ ଚମତ୍କାର ପ୍ରତ୍ୟାବର୍ତ୍ତନ କରିଥିଲେ। କିନ୍ତୁ ପାକିସ୍ତାନ ବିପକ୍ଷରେ ସେ ପୂରା ୧୦ ଓଭର ବୋଲିଂ କରିପାରିନଥିଲେ।  ଇନିଂସର ପ୍ରଥମ ଓଭରରେ ଶାମି ୱାଇଡ୍ ବଲ ବୋଲିଂ କରି ୧୧ ଟି ବଲ ବୋଲିଂ କରିଥିଲେ। ଏଥିସହ ଶାମି ମାତ୍ର ତିନି ଓଭର ବୋଲିଂ କରିବା ପରେ ପଡ଼ିଆ ଛାଡିଥିଲେ। ତୃତୀୟ ଓଭର ମଝିରେ ନିଜ ବୋଲିଂ ମାର୍କକୁ ଫେରିବାବେଳେ ଶାମି ଫିଜିଓଙ୍କୁ ଡାକିଥିଲେ। ଏହା ଦେଖି ଅନୁମାନ କରାଯାଉଛି ଯେ ତାଙ୍କର ଡାହାଣ ଗୋଡ଼ରେ କିଛି ଅସୁବିଧା ରହିଛି। ତା’ପରେ ଓଭର ସରିବା ପରେ ସେ ତୁରନ୍ତ ପଡ଼ିଆ ଛାଡି ଚାଲି ଯାଇଥିଲେ। ଶାମିଙ୍କ ଆଘାତ ସମସ୍ୟା ଦଳକୁ ଅସୁବିଧାରେ ପକାଇପାରେ। ଶାମି ୮ ଓଭରରେ ୪୩ ରନ୍ ଦେଇଥିବା ବେଳେ କୌଣସି ୱିକେଟ ନେଇପାରିନଥିଲେ।

ଗ୍ରୁପ୍-ଏରେ ନ୍ୟୁଜିଲ୍ୟାଣ୍ଡ ଦଳ ଅନ୍ୟତମ ଶକ୍ତିଶାଳୀ ଦଳ ଅଟେ। ଚାମ୍ପିଅନ୍ସ ଟ୍ରଫିର ପ୍ରଥମ ମ୍ୟାଚରେ ନ୍ୟୁଜିଲ୍ୟାଣ୍ଡ ଆୟୋଜକ ଦଳକୁ ୬୦ ରନରେ ପରାସ୍ତ କରିଥିଲା। ନ୍ୟୁଜିଲ୍ୟାଣ୍ଡର ବୋଲରମାନେ ପାକିସ୍ତାନକୁ ପୁରା ଓଭର ଖେଳିବାକୁ ଦେଇନଥିଲେ। ଏଥିସହିତ ବାଂଲାଦେଶ ସାମ୍ନାରେ ମଧ୍ୟ ଦଳ ଚମତ୍କାର ପ୍ରଦର୍ଶନ କରିଥିଲା। କିୱି ବୋଲର ଗ୍ଲେନ୍ ଫିଲିପ୍ସ, ମାଇକେଲ ବ୍ରେସୱେଲ ଏବଂ ମିଚେଲ ସାଣ୍ଟନର୍ ବର୍ତ୍ତମାନ ଭଲ ଫର୍ମରେ ଅଛନ୍ତି, ଯାହା ଟିମ୍ ଇଣ୍ଡିଆ ପାଇଁ ଏକ ସମସ୍ୟା ହୋଇପାରେ।