ଟିମ୍ ଇଣ୍ଡିଆର ଶ୍ରୀଲଙ୍କା ଟୁର୍ ଆରମ୍ଭ ହେବା ପାଇଁ ମାତ୍ର ଅଳ୍ପ ଦିନ ବାକି ଅଛି। ତିନି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ପ୍ରଥମ ମ୍ୟାଚ୍ ଜୁଲାଇ ୨୭ ତାରିଖରେ ଖେଳାଯିବ। ଏହା ପରେ ଏକ ତିନି ମ୍ୟାଚ୍ ବିଶିଷ୍ଟ ଏକଦିବସିୟ ସିରିଜ୍ ମଧ୍ୟ ଖେଳାଯିବ। ବିସିସିଆଇ ପକ୍ଷରୁ ଶୀଘ୍ର ଶ୍ରୀଲଙ୍କା ବିପକ୍ଷ ଟି-୨୦ ଏବଂ ଦିନିକିଆ ସିରିଜ୍ ପାଇଁ ଦଳ ଘୋଷଣା କରାଯିବ। କିନ୍ତୁ ଏହାପୂର୍ବରୁ ଭାରତୀୟ ଟି-୨୦ ଦଳର ଅଧିନାୟକଙ୍କ ସମ୍ପର୍କରେ ଏକ ବଡ ଖବର ସାମ୍ନାକୁ ଆସିଛି। ଋଷଭ ପନ୍ତ, ହାର୍ଦ୍ଦିକ ପାଣ୍ଡ୍ୟା, କେ.ଏଲ୍ ରାହୁଲ ଏବଂ ଶ୍ରେୟସ୍ ଆୟରଙ୍କ ଭଳି ଖେଳାଳିଙ୍କୁ ଅଣଦେଖା କରି ବିସିସିଆଇ ଜଣେ ୩୩ ବର୍ଷୀୟ ଖେଳାଳିଙ୍କୁ ଟି-୨୦ ଦଳର ଅଧିନାୟକ ଭାବରେ ନିଯୁକ୍ତ କରିଛି।

ଜୁଲାଇ ୨୭ ତାରିଖରୁ ଆରମ୍ଭ ହେବାକୁ ଥିବା ତିନି ମ୍ୟାଚ୍ ବିଶିଷ୍ଟ ଟି-୨୦ ଏବଂ ଏକଦିବସୀୟ ସିରିଜ୍ ପାଇଁ ଟିମ୍ ଇଣ୍ଡିଆକୁ ଶ୍ରୀଲଙ୍କା ଟୁର୍ କରିବାକୁ ପଡିବ। କିନ୍ତୁ ଏହା ପୂର୍ବରୁ ଟି-୨୦ ଅଧିନାୟକଙ୍କ ବିଷୟରେ ଏକ ବଡ଼ ଖବର ଆସିଛି। ESPN ନିଜର ଏକ ରିପୋର୍ଟରେ ଦର୍ଶାଯାଇଛି ଯେ ବିସିସିଆଇ ଟି-୨୦ ଦଳର ଭାରକୁ ୩୩ ବର୍ଷୀୟ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବଙ୍କୁ ଦେଇପାରେ। ରିପୋର୍ଟରେ ଏହା ମଧ୍ୟ କୁହାଯାଇଛି ଯେ ସୂର୍ଯ୍ୟକୁମାର ଯାଦବଙ୍କ ଅଧିନାୟକତ୍ୱ ଆଇସିସି ଟି-୨୦ ବିଶ୍ୱକପ ୨୦୨୬ ପର୍ଯ୍ୟନ୍ତ ରହିବ। ତେବେ ଏହାପୂର୍ବରୁ ହାର୍ଦ୍ଦିକ ପାଣ୍ଡ୍ୟା ଟି-୨୦ ଦଳର ଅଧିନାୟକତ୍ୱ ପାଇଁ ଜଣେ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ଭାବରେ ବିବେଚିତ ହୁଅନ୍ତି। ଏହାରି ମଧ୍ୟରେ ଏହା ମଧ୍ୟ ଖବର ଆସିଛି ଯେ ହାର୍ଦ୍ଦିକ ପାଣ୍ଡ୍ୟା ଦିନିକିଆ ଫର୍ମାଟରୁ କିଛି ସମୟ ପାଇଁ ବିରତି ମାଗିଛନ୍ତି।

ବିସିସିଆଇର ଜଣେ ବରିଷ୍ଠ ସୂତ୍ର ନାମ ଗୋପନ ରଖିବା ସର୍ତ୍ତରେ ପିଟିଆଇକୁ କହିଛନ୍ତି ଯେ,“ରୋହିତ ଶର୍ମାଙ୍କ ନେତୃତ୍ୱରେ ହାର୍ଦ୍ଦିକ ପାଣ୍ଡ୍ୟା ଭାରତର ଟି-୨୦ ଦଳର ଉପ-ଅଧିନାୟକ ଥିଲେ।  ସେ ତିନି ମ୍ୟାଚ୍ ବିଶିଷ୍ଟ ଟି-୨୦ ଆନ୍ତର୍ଜାତୀୟ ସିରିଜ୍ ପାଇଁ ସମ୍ପୂର୍ଣ୍ଣ ଫିଟ୍ ଏବଂ ଉପଲବ୍ଧ ଅଟନ୍ତି। ସେ ଦଳର ନେତୃତ୍ୱ ନେବେ ବୋଲି ଆଶା କରାଯାଉଥିଲା, କିନ୍ତୁ ସୁର୍ଯ୍ୟକୁମାର ଯାଦବ କେବଳ ଶ୍ରୀଲଙ୍କା ସିରିଜ୍ ପାଇଁ ନୁହେଁ ବରଂ ୨୦୨୬ ଟି-୨୦ ବିଶ୍ୱକପ ପର୍ଯ୍ୟନ୍ତ ସମ୍ଭାବ୍ୟ ଅଧିନାୟକ ହେବେ ବୋଲି ଏକ ଦୃଢ ସମ୍ଭାବନା ରହିଛି”।

ନିଜର ବ୍ୟକ୍ତିଗତ କାରଣ ଦର୍ଶାଇ ହାର୍ଦ୍ଦିକ ଶ୍ରୀଲଙ୍କା ବିପକ୍ଷ ଦିନିକିଆ ସିରିଜରୁ ବିରତି ନେଇଛନ୍ତି। ତାଙ୍କର କୌଣସି ଫିଟନେସ୍ ସମସ୍ୟା ନାହିଁ। ESPN ର ରିପୋର୍ଟରେ ଏହା ମଧ୍ୟ ଦର୍ଶାଇ ଦିଆଯାଇଛି ଯେ ବିସିସିଆଇ ବୁଧବାର ଶ୍ରୀଲଙ୍କା ଗସ୍ତ ପାଇଁ ଦଳ ଘୋଷଣା କରିପାରେ। ଏହା ବ୍ୟତୀତ ଟିମ୍ ଇଣ୍ଡିଆର ଅନେକ ବରିଷ୍ଠ ଖେଳାଳି ଏକଦିବସୀୟ ସିରିଜ୍ ମାଧ୍ୟମରେ ପଡ଼ିଆକୁ ଫେରିପାରନ୍ତି ବୋଲି କୁହାଯାଉଛି। କେ.ଏଲ୍ ରାହୁଲ, ଋଷଭ ପନ୍ତ, ରବିନ୍ଦ୍ର ଜାଡେଜାଙ୍କ ଭଳି ଖେଳାଳିମାନେ ଏକଦିବସିୟ ସିରିଜର ଅଂଶ ହୋଇପାରନ୍ତି।