ରଣଜୀ ମ୍ୟାଚ୍: ରଣଜୀରେ ଫେଲ୍ ମାରିଲେ ରୋହିତ୍, ଜୈସ୍ୱାଲ, ପନ୍ତ, ଗିଲ୍। ଟେଷ୍ଟରେ ଲଗାତାରେ ଫେଲ୍ ହେବା ପରେ ଏବେ ଘରୋଇ ଟୁର୍ଣ୍ଣାମେଣ୍ଟରେ ବି ନିରାଶ କରିଛନ୍ତି ଷ୍ଟାର୍ ଖେଳାଳି । ଦୀର୍ଘ ବର୍ଷ ପରେ ଘରୋଇ ରଣଜୀ ମ୍ୟାଚ୍ ଖେଳିବାକୁ ଓହ୍ଲାଇଥିବା ରୋହିତ ଶର୍ମା, ରିଷଭ ପନ୍ତ ଏବଂ ଶୁଭମନ ଗିଲ୍ ଶସ୍ତାରେ ଆଉଟ୍ ହୋଇ ଫେରିଛନ୍ତି । ଦିଲ୍ଲୀ ବିପକ୍ଷ ମ୍ୟାଚ୍‌ରେ ରବିନ୍ଦ୍ର ଜାଡେଜା ୫ଟି ୱିକେଟ୍ ନେଇ ଷ୍ଟାର ସାଜିଛନ୍ତି ।

ଅଷ୍ଟ୍ରେଲିଆରେ ୧-୩ ସିରିଜ୍ ହାରିବା ପରେ ବିସିସିଆଇ ଘରୋଇ କ୍ରିକେଟରେ ଚୁକ୍ତିଭିତ୍ତିକ ଖେଳାଳିଙ୍କ ଅଂଶଗ୍ରହଣକୁ ବାଧ୍ୟତାମୂଳକ କରିଥିଲା । ଏହା ପରେ ନିଜ ଫର୍ମ ଫେରି ପାଇବା ପାଇଁ ରଣଜୀ ମ୍ୟାଚ୍ ଖେଳିବାକୁ ନିଷ୍ପତ୍ତି ନେଇଥିଲେ ରୋହିତ୍ ଶର୍ମା । ଡିଫେଣ୍ଡିଂ ଚାମ୍ପିୟନ ପାଇଁ ପ୍ରାୟ ୧୦ ବର୍ଷ ପରେ ଓପନିଂ କରିବାକୁ ଆସିଥିବା ରୋହିତ୍ ମାତ୍ର ୩ ରନ୍ କରି କ୍ୟାଚ୍ ଆଉଟ୍ ହୋଇଥିଲେ । ଚାମ୍ପିଅନ୍ସ ଟ୍ରଫି ପୂର୍ବରୁ ରଣଜୀରେ ଭଲ ରନ୍ କରିବାର ତାଙ୍କ ଆଶାକୁ ଜାମ୍ମୁ କାଶ୍ମୀର ବୋଲର ଉମର ନାଜିର ଧୂଳିସାତ କରିଥିଲେ । ସେହିପରି ମୁମ୍ୱାଇ ପାଇଁ ଖେଳୁଥିବା ଭାରତୀୟ ଟିମର ଅନ୍ୟ ଜଣେ ଯୁବ ଷ୍ଟାର ଖେଳାଳି ଯଶସ୍ୱୀ ଜୈୱାଲ ୪ ରନ୍‌ରେ ଆଉଟ୍ ହୋଇଥିଲେ ।

ଚାମ୍ପିଅନ୍ସ ଟ୍ରଫି ପାଇଁ ଘୋଷଣା ହୋଇଥିବା ଭାରତୀୟ ଟିମର ସଦସ୍ୟ ଥିବା ଶ୍ରେୟସ ଆୟର ମଧ୍ୟ ଆଜି ଫେଲ୍ ମାରିଛନ୍ତି । ଶ୍ରେୟସ ଆୟର କେବଳ ୧୧ ରନ୍ କରି ଆଉଟ୍ ହୋଇଥିଲେ । ଜାମ୍ମୁ କାଶ୍ମୀର ବିପକ୍ଷରେ ମୁମ୍ୱାଇ ଟିମ୍ ପ୍ରଥମ ଇନିଂସରେ ୩୩.୨ ଓଭର ଖେଳି ମାତ୍ର ୧୨୦ ରନ୍ କରିବାରେ ସଫଳ ହେଲା । ସେହିପରି ୨୦୧୭-୧୮ ସିଜିନ ପରେ ପ୍ରଥମ ଥର ଦିଲ୍ଲୀ ପାଇଁ ରଣଜୀ ଖେଳିଥିବା ରିଷଭ ପନ୍ତ ମଧ୍ୟ ନିରାଶ କରିଛନ୍ତି ।

ରିଷଭ ପନ୍ତ ୧୦ ବଲ ଖେଳି କେବଳ ୧ ରନ୍ କରି ଆଉଟ୍ ହୋଇଥିଲେ । ସୋରାଷ୍ଟ୍ର ପାଇଁ ଦୀର୍ଘ ବର୍ଷରୁ ଖେଳୁଥିବା ବାମହାତୀ ସ୍ପିନ୍ ବୋଲର ଧର୍ମେନ୍ଦ୍ର ସିଂହ ଜାଡେଜାଙ୍କ ଶିକାର ହୋଇଥିଲେ । ସେହିପରେ ବେଙ୍ଗାଲୁରୁ ଖେଳାଯାଉଥିବା କର୍ଣ୍ଣାଟକ ବିପକ୍ଷ ମ୍ୟାଚ୍‌ରେ ପଞ୍ଜାବ କ୍ୟାପ୍ଟେନ ଶୁଭମନ୍ ଗିଲ୍‌ ମାତ୍ର ୪ ରନ୍ କରି ଆଉଟ ହୋଇଥିଲେ ।

ଇଂଲଣ୍ଡ ବିପକ୍ଷରେ ଦିନିକିଆ ମ୍ୟାଚ୍ ଖେଳିବା ପୂର୍ବରୁ ରୋହିତ, ଜୈସ୍ୱାଲ ଏବଂ ଆୟରଙ୍କ ପାଇଁ ଏହା କେବଳ ଏକମାତ୍ର ରଣଜୀ ମ୍ୟାଚ୍ ଥିଲା ।