ଏସିଆ କପ୍ ପାଇଁ ଭାରତୀୟ ଦଳ ଘୋଷଣା କରାଯାଇଛି। କେ.ଏଲ୍ ରାହୁଲ ଏବଂ ଶ୍ରେୟସ୍ ଆୟର ଦଳକୁ ଫେରିଛନ୍ତି। ଦୀର୍ଘ ସମୟ ଧରି ଆଘାତ ଯୋଗୁଁ ଉଭୟ ଦଳରୁ ବାହାର୍ ହୋଇଥିଲେ। ଏବେ ଦୁହେଁ ଫେରିଛନ୍ତି। ଏଥି ସହିତ ଜସପ୍ରୀତ ବୁମ୍ରା ଏବଂ ପ୍ରସିଦ୍ଧ କୃଷ୍ଣା ମଧ୍ୟ ODI ଦଳରେ ପ୍ରତ୍ୟାବର୍ତ୍ତନ କରିଛନ୍ତି। ଉଭୟେ ମଧ୍ୟ ଆହତ ହୋଇଥିଲେ। ତିଲକ ବର୍ମା ଦଳର ନୂଆ ଚେହେରା ହେବେ। ତେବେ ପୁଣିଥରେ ବାମହାତି ଷ୍ଟାର ଖେଳାଳି ଶିଖର ଧାୱନଙ୍କୁ ଦଳରେ ସାମିଲ୍ କରାଯାଇ ନାହିଁ।

ଅଜିତ ଅଗରକରଙ୍କ ନେତୃତ୍ୱରେ ଚୟନ କମିଟି ତିଲକଙ୍କୁ ଚୟନ କରି ଆଶ୍ଚର୍ଯ୍ୟ କରିଛି। ନିକଟରେ ସେ ୱେଷ୍ଟଇଣ୍ଡିଜ୍ ଗସ୍ତରେ ନିଜର ଟି -20 ଡେବ୍ୟୁ କରିଥିଲେ।  ଏସିଆ କପ୍ 30 ଅଗଷ୍ଟରୁ ଆରମ୍ଭ ହେବାକୁ ଯାଉଛି। ଚୟନକର୍ତ୍ତାମାନେ 18 ଖେଳାଳିଙ୍କ ଦଳ ଘୋଷଣା କରିଛନ୍ତି। ଏଥିରେ 17 ଜଣ ଖେଳାଳି ଅଛନ୍ତି ଏବଂ ସଞ୍ଜୁ ସାମସନ ବ୍ୟାକଅପ୍ ୱିକେଟ୍ କିପର (18 ତମ ଖେଳାଳି) ହେବେ। ହାର୍ଦ୍ଦିକ ପାଣ୍ଡ୍ୟା ହେଉଛନ୍ତି ଉପ-ଅଧିନାୟକ।

ବିଶ୍ୱକପ ପରି, ଏସିଆ କପ୍ ନିୟମ 17 ଜଣିଆ ଦଳକୁ ଅନୁମତି ଦେଇଥାଏ। ବାଂଲାଦେଶ ଏବଂ ପାକିସ୍ତାନ 17 ଜଣିଆ ଦଳ ଚୟନ କରିଛନ୍ତି। ଚଳିତ ବର୍ଷ ଏସିଆ କପ୍ ପାକିସ୍ତାନ-ଶ୍ରୀଲଙ୍କା ସହ ମିଳିତ ହେବ। ଅଗଷ୍ଟ 30 ରେ ମୁଲତାନରେ ପାକିସ୍ତାନ ଏବଂ ନେପାଳ ମଧ୍ୟରେ ପ୍ରଥମ ମ୍ୟାଚ୍ ଖେଳାଯିବ।

ଏସିଆ କପ୍ ପାଇଁ ଟିମ୍ ଇଣ୍ଡିଆ:

ରୋହିତ ଶର୍ମା (କ୍ୟାପଟେନ), ହାର୍ଦ୍ଦିକ ପାଣ୍ଡ୍ୟା (ଉପ-କ୍ୟାପଟେନ), ଶୁଭମନ ଗିଲ, ବିରାଟ କୋହଲି, ଶ୍ରେୟସ ଆୟର, କେ.ଏଲ୍ ରାହୁଲ, ସୂର୍ଯ୍ୟକୁମାର ଯାଦବ, ତିଲକ ବର୍ମା, ଇଶାନ କିଶନ, ରବିନ୍ଦ୍ର ଜାଡେଜା, ଶାର୍ଦ୍ଧୁଲ୍ ଠାକୁର, ଅକ୍ଷର ପଟେଲ, କୁଲଦୀପ ଯାଦବ, ଯଶପ୍ରୀତ ବୁମ୍ରା, ମହମ୍ମଦ ଶାମି, ମହମ୍ମଦ ସିରାଜ, ପ୍ରସିଦ୍ଧ କୃଷ୍ଣା।