ଚାମ୍ପିୟନ୍ସ ଟ୍ରଫି ୨୦୨୫ : ଆସନ୍ତା ମାସରୁ ଆରମ୍ଭ ହେବାକୁ ଯାଉଛି ଚାମ୍ପିୟନ୍ସ ଟ୍ରଫି ଟୁର୍ଣ୍ଣାମେଣ୍ଟ । ଏହା ପୂର୍ବରୁ ଏକ ବଡ ଖବର ସାମ୍ନାକୁ ଆସିଛି ।

ଏଥର ଚାମ୍ପିୟନ୍ସ ଟ୍ରଫି ପାକିସ୍ତାନରେ ଆୟୋଜିତ ହୋଇଛି । କିନ୍ତୁ ଟିମ୍ ଇଣ୍ଡିଆ ପାକିସ୍ତାନ ଯିବାକୁ ମନା କରିଦେଇଥିଲା । ଯାହା ଫଳରେ ନ୍ୟୁଟ୍ରାଲ ଭେନ୍ୟୁ ଦୁବାଇରେ ଭାରତୀୟ ଦଳ ତାର ସମସ୍ତ ମ୍ୟାଚ୍‌ ଖେଳିବାକୁ ନେଇ ICC ଘୋଷଣା କରିଥିଲା ।

ତେବେ ଟିମ୍ ଇଣ୍ଡିଆ ତ ପାକିସ୍ତାନ ଯିବନାହିଁ କିନ୍ତୁ ଅଧିନାୟକ ରୋହିତ ଶର୍ମାଙ୍କୁ ପାକିସ୍ତାନ ଯିବାକୁ ପଡିପାରେ । ଚାମ୍ପିୟନ୍ସ ଟ୍ରଫି ୨୦୨୫ ଆରମ୍ଭ ହେବା ପୂର୍ବରୁ ଟିମ୍ ଇଣ୍ଡିଆ କ୍ୟାପଟେନ୍ ରୋହିତ ଶର୍ମାଙ୍କୁ ଥରେ ପାକିସ୍ତାନ ଗସ୍ତ କରିବାକୁ ପଡିପାରେ । କିନ୍ତୁ ଏ ନେଇ ଅଧିକାରିକ ଭାବେ କୌଣସି ସୂଚନା ମିଳିନାହିଁ ।

ତେବେ କାହିଁକି ପାକିସ୍ତାନ ଯାଇପାରନ୍ତି ରୋହିତ ଶର୍ମା? ଆସନ୍ତୁ ଜାଣିବା...

ICCର କୌଣସି ବଡ ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ସମସ୍ତ ଦଳର ଅଧିନାୟକଙ୍କୁ ନେଇ ଫଟୋ ସୁଟ୍‌ କରାଯାଏ । ଆଉ ଏହି ଫଟୋ ସୁଟ୍ ସାଧାରଣତଃ ଆୟୋଜନ କରୁଥିବା ଦେଶରେ ହିଁ ହୋଇଥାଏ । ତେଣୁ ଏଥର ପାକିସ୍ତାନ ଚାମ୍ପିୟନ୍ସ ଟ୍ରଫି ହୋଷ୍ଟ କରୁଥିବାରୁ ଫଟୋ ସୁଟ୍‌ ପାକିସ୍ତାନରେ ହେବ । ଆଉ ଟିମ୍ ଇଣ୍ଡିଆ ଅଧିନାୟକ ରୋହିତ ଶର୍ମାଙ୍କୁ ସେଠାକୁ ଯିବାକୁ ପଡିବ । କିନ୍ତୁ ବିସିସିଆଇ ପକ୍ଷରୁ ଏ ନେଇ କୌଣସି ସୂଚନା ଦିଆଯାଇ ନାହିଁ ।

କେବଳ ଫଟୋ ସୁଟ୍‌ ନୁହେଁ ସମସ୍ତ ଦଳର ଅଧିନାୟକମାନେ ପ୍ରେସ୍ କନଫରେନ୍ସ ମଧ୍ୟ କରିଥାନ୍ତି । କିନ୍ତୁ ICC ପକ୍ଷରୁ ଏଯାଏ ଫଟୋ ସୁଟ୍‌ ତାରିଖ ବି ଘୋଷଣା କରାଯାଇ ନାହିଁ । ତେବେ ଫଟୋ ସେସନ୍‌ ପାକିସ୍ତାନରେ ହେବ କିମ୍ବା ପାକିସ୍ତାନ ବଦଳରେ ଦୁବାଇରେ ଫଟୋ ସେସନ ହେବ ତାହା ଏ ପର୍ଯ୍ୟନ୍ତ ଜଣାପଡ଼ିନାହିଁ ।

ପାକିସ୍ତାନ କ୍ରିକେଟ ବୋର୍ଡ (PCB) ପକ୍ଷରୁ ଚାମ୍ପିୟନ୍ସ ଟ୍ରଫି ପ୍ରସ୍ତୁତି ଏ ଯାଏ ଶେଷ ହୋଇନି । ଷ୍ଟାଡିୟମ କାମ ଏବେ ବି ଚାଲିଛି । କିନ୍ତୁ ICC ପକ୍ଷରୁ ଚାମ୍ପିୟନ୍ସ ଟ୍ରଫି ପାଇଁ ପୂରାପୂରି ପ୍ରସ୍ତୁତି ଶେଷ ହୋଇସାରିଲାଣି ।