ଭାରତୀୟ ଦଳକୁ ବାଂଲାଦେଶ ବିପକ୍ଷରେ ଦୁଇଟି ଟେଷ୍ଟ ବିଶିଷ୍ଟ ସିରିଜ୍ ଖେଳିବାକୁ ହେବ। ପ୍ରଥମ ଟେଷ୍ଟ ମ୍ୟାଚ୍ ୧୯ ସେପ୍ଟେମ୍ବରରୁ ଆରମ୍ଭ ହେବାକୁ ଯାଉଛି। ଏବେ ବିସିସିଆଇ ପ୍ରଥମ ଟେଷ୍ଟ ମ୍ୟାଚ୍ ପାଇଁ ଦଳ ଘୋଷଣା କରିଛି। ରୋହିତ ଶର୍ମାଙ୍କୁ ଦଳର ଅଧିନାୟକ ଭାବରେ ଘୋଷଣା କରାଯାଇଛି। ଇଂଲଣ୍ଡ ବିପକ୍ଷ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ବିରାଟ କୋହଲି ଦଳର ଅଂଶ ନଥିଲେ। ବର୍ତ୍ତମାନ ସେ ମଧ୍ୟ ଫେରି ଆସିଛନ୍ତି।

ବିଶେଷ କଥା ହେଉଛି ଷ୍ଟାର ବ୍ୟାଟ୍ସମ୍ୟାନ୍ ଶ୍ରେୟସ୍ ଆୟରଙ୍କୁ ଦଳରେ ସୁଯୋଗ ମିଳିନାହିଁ। ଦୁଇଜଣ ୱିକେଟ୍ କିପର ଟିମ୍ ଇଣ୍ଡିଆରେ ସୁଯୋଗ ପାଇଛନ୍ତି। ଏଥିମଧ୍ୟରେ ଋଷଭ ପନ୍ତ ଏବଂ ଧ୍ରୁଭ ଜୁରେଲଙ୍କୁ ସାମିଲ କରାଯାଇଛି। ଡିସେମ୍ବର ୨୦୨୨ ରେ ପନ୍ତଙ୍କର ଏକ କାର ଦୁର୍ଘଟଣା ଘଟିଥିଲା। ସେବେଠାରୁ ସେ ଟେଷ୍ଟ ଦଳରୁ ବାହାରେ ଅଛନ୍ତି। ସେ ୨୦୨୨ ମସିହାରେ ଭାରତୀୟ ଦଳ ପାଇଁ ଶେଷ ଟେଷ୍ଟ ମ୍ୟାଚ୍ ଖେଳିଥିଲେ। ବର୍ତ୍ତମାନ ସେ ଫେରି ଆସିଛନ୍ତି। ସେ ମଧ୍ୟମ କ୍ରମରେ ଟିମ୍ ଇଣ୍ଡିଆ ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାନ୍ତି। ସେ ନିଜେ ଟିମ୍ ଇଣ୍ଡିଆ ପାଇଁ ଅନେକ ମ୍ୟାଚ୍ ଜିତିଛନ୍ତି। 

ବାଂଲାଦେଶ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ ପାଇଁ ଟିମ୍ ଇଣ୍ଡିଆରେ ରବିଚନ୍ଦ୍ରନ୍ ଅଶ୍ୱିନ୍, ରବିନ୍ଦ୍ର ଜାଡେଜା, ଅକ୍ସର ପଟେଲ ଏବଂ କୁଲଦୀପ ଯାଦବଙ୍କ ସମେତ ୪ ଜଣ ସ୍ପିନରଙ୍କୁ ସୁଯୋଗ ମିଳିଛି। ଚେନ୍ନାଇ ଗ୍ରାଉଣ୍ଡରେ ପ୍ରଥମ ଟେଷ୍ଟ ମ୍ୟାଚ୍ ଅନୁଷ୍ଠିତ ହେବ ଏବଂ ଚେନ୍ନାଇର ପିଚ୍ ସ୍ପିନରଙ୍କ ପାଇଁ ସହାୟକ ହେବ ନିଶ୍ଚିତ। ଏହି କାରଣରୁ ଚାରିଜଣ ସ୍ପିନରଙ୍କୁ ଦଳରେ ରଖାଯାଇଛି। ବୋଲିଂ ବ୍ୟତୀତ ଅଶ୍ୱିନ ଏବଂ ଜାଡେଜାଙ୍କ ଯୋଡି ନିମ୍ନ କ୍ରମରେ ଉତ୍କୃଷ୍ଟ ବ୍ୟାଟିଂ ପାଇଁ ଜଣାଶୁଣା। 

ଆଇପିଏଲରେ ଆରସିବି ପାଇଁ ଖେଳିଥିବା ୟଶ ଦୟାଲଙ୍କୁ ପ୍ରଥମ ଥର ପାଇଁ ଭାରତୀୟ ଟେଷ୍ଟ ଦଳରେ ସୁଯୋଗ ମିଳିଛି। ଅନ୍ୟପକ୍ଷରେ ଇଂଲଣ୍ଡ ବିପକ୍ଷରେ ଟେଷ୍ଟ ମ୍ୟାଚ୍ ଖେଳିଥିବା କେ.ଏଲ୍ ରାହୁଲ ମଧ୍ୟ ବାଂଲାଦେଶ ବିପକ୍ଷରେ ସୁଯୋଗ ପାଇଛନ୍ତି। ଭାରତୀୟ ଚୟନକର୍ତ୍ତା ଟିମ୍ ଇଣ୍ଡିଆର ଯୁବ ତଥା ଅଭିଜ୍ଞ ଖେଳାଳିଙ୍କୁ ସୁଯୋଗ ଦେଇଛନ୍ତି। 

ବାଂଲାଦେଶ ବିପକ୍ଷ ପ୍ରଥମ ଟେଷ୍ଟ ମ୍ୟାଚ୍ ପାଇଁ ଭାରତୀୟ ଦଳ ଦଳ:- ରୋହିତ ଶର୍ମା (ଅଧିନାୟକ), ଯଶସ୍ୱୀ ଜୟସୱାଲ, ଶୁଭମାନ ଗିଲ, ବିରାଟ କୋହଲି, କେ.ଏଲ୍ ରାହୁଲ, ସରଫରାଜ ଖାନ, ଋଷଭ ପନ୍ତ (wk), ଧ୍ରୁଭ ଜୁରେଲ, ଆର ଅଶ୍ୱିନ, ରବିନ୍ଦ୍ର ଜାଡେଜା, ଅକ୍ସର ପଟେଲ, କୁଲଦୀପ ଯାଦବ, ମହମ୍ମଦ ସିରାଜ, ଆକାଶଦୀପ, ଜସପ୍ରୀତ ବୁମ୍ରା, ୟଶ୍ ଦୟାଲ।