ୱେମେନ୍ସ ପ୍ରିମିୟର ଲିଗ୍ ୨୦୨୪ ର ଫାଇନାଲ ରବିବାର ଶେଷ ହୋଇଛି। ଟୁର୍ଣ୍ଣାମେଣ୍ଟର ଅନ୍ତିମ ମ୍ୟାଚ୍ ଦିଲ୍ଲୀ ଠାରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ଖେଳାଯାଇଥିଲା। ଟସ୍ ଜିତିବା ପରେ ଅଧିନାୟକ ମେଗ ଲାନିଙ୍ଗ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ, ଏହା ପରେ ଦଳ ମାତ୍ର ୧୧୪ ରନ୍‌ର ଲକ୍ଷ୍ୟ ସ୍ଥିର କରିବାରେ ସକ୍ଷମ ହୋଇଥିଲା।  ଏହାର ଜବାବରେ ବ୍ୟାଟରଙ୍କ ଉତ୍କୃଷ୍ଟ ପ୍ରଦର୍ଶନ ହେତୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ୧୯.୩ ଓଭରରେ ଦିଆଯାଇଥିବା ଲକ୍ଷ୍ୟ ହାସଲ କରି ନେଇଥିଲା।

ଟସ୍ ଜିତିବା ପରେ ପ୍ରଥମେ ବ୍ୟାଟିଂ କରିବାକୁ ଆସିଥିବା ଦିଲ୍ଲୀ ଦଳ ଚମତ୍କାର ଆରମ୍ଭ କରିଥିଲା ଏବଂ ଉଭୟ ଓପନର୍ ମିଳିତ ଭାବେ ପ୍ରଥମ ୱିକେଟ୍ ପାଇଁ ୬୪ ରନ୍ ଯୋଡିଥିଲେ।  ଏହି ସମୟରେ ଶେଫାଲୀ ବର୍ମା ବୋଲରମାନଙ୍କ ଧୂଲାଇ କରିଥିଲେ। ଏଭଳି ପରିସ୍ଥିତିରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ସ୍ମୃତି ମନ୍ଧାନା ବୋଲିଂରେ ପରିବର୍ତ୍ତନ କରି ସୋଫିଆ ମୋଲିନ୍ୟୁଙ୍କୁ ବଲ ଦେଇଥିଲେ, ଯାହା ପରେ ମ୍ୟାଚର ଗତିପଥ ବଦଳି ଯାଇଥିଲା। ସେ ପ୍ରଥମେ ୭.୧ ଓଭରରେ ଚମତ୍କାର ବ୍ୟାଟିଂ କରୁଥିବା ଶାଫାଲି ବର୍ମାଙ୍କୁ ପ୍ୟାଭିଲିୟନର ରାସ୍ତା ଦେଖାଇଥିଲେ।

ଏହି ୱିକେଟ୍ ଖସିଯିବା ମାତ୍ରେ ଦିଲ୍ଲୀ କ୍ୟାପିଟାଲର ବ୍ୟାଟିଂ ଅର୍ଡର ଭୁଶୁଡି ଯାଇଥିଲା। ସେହି ଓଭରରେ ସୋଫି ମୋଲିନ୍ୟୁ ଜେମିମା ରଡ୍ରିଗ୍ସ ଏବଂ ଆଲିସ୍ କ୍ୟାପସିଙ୍କ ୱିକେଟ ନେଇ ମ୍ୟାଚ ବାଙ୍ଗାଲୋର ସପକ୍ଷରେ ନେଇ ଆସିଥିଲେ। ଏହି ସମୟରେ ଅଧିନାୟିକା ମେଗ ଲାନିଙ୍ଗ (୨୩) ଗୋଟିଏ ପଟେ ସତର୍କତାର ସହ ଖେଳିବା ଆରମ୍ଭ କରିଥିଲେ କିନ୍ତୁ ଶ୍ରେୟଙ୍କା ପାଟିଲ ଆସି ତାଙ୍କ ଶିକାର କରିଥିଲେ ଏବଂ ଦିଲ୍ଲୀକୁ ବ୍ୟାକଫୁଟକୁ ଠେଲି ଦେଇଥିଲେ।

ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ସ୍ପିନରମାନେ ମଧ୍ୟ ନିଜର ଯାଦୁ ଦେଖାଇବା ସହିତ ମାତ୍ର ୨୩ ରନ୍ ମଧ୍ୟରେ ଦିଲ୍ଲୀକୁ ୭ ଟି ଶକ୍ତ ଝଟକା ଦେଇଥିଲେ। ଏଭଳି ପରିସ୍ଥିତିରେ ରାଧା ଯାଦବ (୧୨) କିଛି ରନ୍ ସଂଗ୍ରହ କରି ତାଙ୍କ ଦଳର ସ୍କୋରକୁ ୧୦୦ ରନ୍ ଅତିକ୍ରମ କରାଇଥିଲେ। ତେବେ ସେ ଆଉଟ୍ ହୋଇଯିବା ପରେ ଏବଂ ଦିଲ୍ଲୀ କ୍ୟାପିଟାଲର ଇନିଂସ ମାତ୍ର ୧୧୩ ରନରେ ସୀମିତ ରହିଥିଲା। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ସୋଫି ମୋଲିନ୍ୟୁ ତିନୋଟି ୱିକେଟ୍ ନେଇଥିବାବେଳେ ଶ୍ରେୟଙ୍କା ପାଟିଲ ଚାରିଟି ୱିକେଟ୍ ନେଇଥିଲେ। ଶୋଭାନା ଦୁଇଟି ୱିକେଟ୍ ନେଇଥିଲେ।

ଜବାବରେ ବ୍ୟାଟିଂ କରିବାକୁ ଆସିଥିବା ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଭଲ ଆରମ୍ଭ ହୋଇଥିଲା।  ଓପନିଂ ଯୋଡି ମଧ୍ୟରେ ୪୯ ରନର ଭାଗିଦାରୀ ହୋଇଥିଲା। କିନ୍ତୁ ଶିଖା ପାଣ୍ଡେ ସୋଫି ଡିଭାଇନଙ୍କୁ ୮.୧ ଓଭରରେ ଆଉଟ୍ କରି ଆରସିବିକୁ ପ୍ରଥମ ଝଟକା ଦେଇଥିଲେ। ସୋଫି ଡିଭାଇନ୍ ପ୍ୟାଭିଲିୟନକୁ ଫେରିବା ପରେ ସ୍ମୃତି ମାନ୍ଧାନା ଏଲିସେ ପେରିଙ୍କ ସହ ୩୩ ରନ୍ ଭାଗିଦାରୀ କରିଥିଲେ। ଶେଷରେ ରିଚା ଘୋଷ ଶେଷ ଓଭରର ତୃତୀୟ ବଲରେ ଚୌକା ମାରି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରକୁ ମ୍ୟାଚ ଜିତାଇ ଦେଇଥିଲେ। ବିଗତ ୧୬ ବର୍ଷ ହେବ ପୁରୁଷ ଦଳ ଯାହା କରିପାରିନାହିଁ ତାହା RCBର ମହିଳାମାନେ ନିଜର ଦ୍ଵିତୀୟ ପ୍ରଚେଷ୍ଟାରେ କରିବାରେ ସଫଳ ହୋଇଛନ୍ତି।