ହାର୍ଦ୍ଦିକ ପାଣ୍ଡ୍ୟାଙ୍କ ଅଧିନାୟକତ୍ୱରେ ମୁମ୍ବାଇ ଇଣ୍ଡିଆନ୍ସକୁ ଆଇପିଏଲ ୨୦୨୪ର ୧୪ ତମ ମ୍ୟାଚରେ ଲଜ୍ଜାଜନକ ପରାଜୟର ସାମ୍ନା କରିବାକୁ ପଡିଛି। ରାଜସ୍ଥାନ ରୟାଲ୍ସ ବିପକ୍ଷ ଟୁର୍ନାମେଣ୍ଟରେ ମୁମ୍ବାଇ କ୍ରମାଗତ ତୃତୀୟ ପରାଜୟର ସମ୍ମୁଖୀନ ହୋଇଛି। ତାଙ୍କର ଖରାପ ଅଧିନାୟକତ୍ୱ ହେତୁ ପାଣ୍ଡ୍ୟା କେବଳ ପ୍ରଶଂସକ ନୁହଁନ୍ତି କିମ୍ବଦନ୍ତୀ ଖେଳାଳିଙ୍କ ଟାର୍ଗେଟରେ ଆସିଛନ୍ତି।  

ରାଜସ୍ଥାନ ବିପକ୍ଷରେ ପରାଜୟ ପରେ ପୂର୍ବତନ ଖେଳାଳି ତଥା ସମୀକ୍ଷକ ଇରଫାନ୍ ପଠାନ୍ ବହୁତ କ୍ରୋଧିତ ଜଣାପଡିଛନ୍ତି। ସେ ନାମ ନ ନେଇ ସରଳ ଅଙ୍ଗଭଙ୍ଗୀରେ ହାର୍ଦ୍ଦିକ ପାଣ୍ଡ୍ୟାଙ୍କୁ ଟ୍ରୋଲ କରିଛନ୍ତି। ସୋସିଆଲ ମିଡିଆରେ ତାଙ୍କର ପ୍ରତିକ୍ରିୟା ଯଥେଷ୍ଟ ଭାଇରାଲ ହେବାରେ ଲାଗିଛି।

ମୁମ୍ବାଇ ଇଣ୍ଡିଆନ୍ସ ଅଧିନାୟକ ହାର୍ଦ୍ଦିକ ପାଣ୍ଡ୍ୟା ରାଜସ୍ଥାନ ରୟାଲ୍ସ ବିପକ୍ଷରେ ପ୍ରଶଂସକଙ୍କ ବୁଇଂର ଶିକାର ହୋଇଥିଲେ। ସୋସିଆଲ ମିଡିଆରେ ମଧ୍ୟ ତାଙ୍କ ବିଷୟରେ ଶହ ଶହ ଟ୍ୱିଟ୍ କରାଯାଇଥିଲା। ଅବଶ୍ୟ ଲଗାତାର ତୃତୀୟ ମ୍ୟାଚ୍‌ରେ ୫ଥର ଚାମ୍ପିୟନ ମୁମ୍ବାଇ ଇଣ୍ଡିଆନ୍ସଙ୍କ ପରାଜୟ ଯୋଗୁଁ ପ୍ରଶଂସକମାନେ ନିରାଶ ହୋଇଛନ୍ତି।

You always want your Leader to do the difficult things. If he doesn’t do it he won’t earn his team’s respect.

— Irfan Pathan (@IrfanPathan) April 1, 2024

ଯାହା ପରେ ଅଧିନାୟକ ପାଣ୍ଡ୍ୟାଙ୍କ ଆଭିମୁଖ୍ୟ ଉପରେ ପ୍ରଶ୍ନ ଉଠିଛି। ଏଥିସହିତ ପୂର୍ବତନ ଟିମ୍ ଇଣ୍ଡିଆ ଖେଳାଳି ଇରଫାନ୍ ପଠାନ୍ ପାଣ୍ଡ୍ୟାଙ୍କ ପଛରେ ପଡ଼ି ଯାଇଛନ୍ତି। ଆଇପିଏଲ୍ ଆରମ୍ଭ ହେବା ଦିନଠାରୁ ସେ ହାର୍ଦ୍ଦିକଙ୍କୁ ସମାଲୋଚନା କରି ଅନେକ ଟ୍ୱିଟ୍ କରିଛନ୍ତି। ବର୍ତ୍ତମାନ ରାଜସ୍ଥାନର ପରାଜୟ ପରେ ପଠାନ ହାର୍ଦ୍ଦିକ ପାଣ୍ଡ୍ୟାଙ୍କ ନାମ ନ ନେଇ X ରେ ଲେଖିଛନ୍ତି ଯେ, “ଆପଣ ସବୁବେଳେ ଚାହିଁବେ ଯେ ଆପଣଙ୍କ ଅଧିନାୟକ ଏପରି କଠିନ କାର୍ଯ୍ୟ କରୁ। ଯଦି ସେ ତାହା ନକରନ୍ତି, ତେବେ ସେ ତାଙ୍କ ଦଳରେ ସମ୍ମାନ ପାଇବେ ନାହିଁ”।

ଏହି ମ୍ୟାଚରେ ରାଜସ୍ଥାନ ରୟାଲ୍ସର ଅଧିନାୟକ ସଞ୍ଜୁ ସାମସନ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲେ, ଯାହାକି ସେମାନଙ୍କ ସପକ୍ଷରେ ରହିଥିଲା। ପ୍ରଥମ ଇନିଂସରେ ବ୍ୟାଟିଂ କରିବାକୁ ଆସିଥିବା ମୁମ୍ବାଇର ଆରମ୍ଭ ବହୁତ ଖରାପ ଥିଲା।  ବିସ୍ଫୋରକ ବ୍ୟାଟ୍ସମ୍ୟାନ୍ ରୋହିଚ୍ ଶର୍ମା ଖାତା ନ ଖୋଲି ପାରିନଥିଲେ।

ଯେତେବେଳେ କି ତାଙ୍କ ସାଥୀ ଇଶାନ କିଶନ ମାତ୍ର ୧୬ ରନ୍ ସ୍କୋର କରିପାରିଥିଲେ। ନମାନ ଧୀର ଏବଂ ଡିୱାଲ୍ଡ ବ୍ରେଭିସ୍ ଶୀଘ୍ର ଆଉଟ ହୋଇଥିଲେ। ତେବେ ତିଲକ ବର୍ମା ୩୨ ଏବଂ ହାର୍ଦ୍ଦିକ ପାଣ୍ଡ୍ୟା ୩୪ ରନର ଇନିଂସ ଖେଳି ଦଳକୁ ନିୟନ୍ତ୍ରଣ କରିବାକୁ ଚେଷ୍ଟା କରିଥିଲେ।  କିନ୍ତୁ ଏସବୁ ସତ୍ତ୍ୱେ ମୁମ୍ବାଇ ଇଣ୍ଡିଆନ୍ସ ଦଳ ୨୦ ଓଭରରେ ମାତ୍ର ୧୨୯ ରନ୍ ସ୍କୋର କରିପାରିଥିଲା। ଏହି ରନକୁ ଚେଜ୍ କରୁଥିବା ରାଜସ୍ଥାନ ଦଳ ୪ ଟି ୱିକେଟ୍ ହରାଇ ମାତ୍ର ୧୫.୩ ଓଭରରେ ଲକ୍ଷ୍ୟକୁ ହାସଲ କରିନେଇଥିଲା।