ଦିଲ୍ଲୀ କ୍ୟାପିଟାଲ୍ସ ରବିବାର ଦିନ ଚେନ୍ନାଇ ସୁପର କିଙ୍ଗ୍ସକୁ ପରାସ୍ତ କରି ଆଇପିଏଲ୍ ୨୦୨୪ରେ ପ୍ରଥମ ବିଜୟ ହାସଲ କରିଛି। ବିଶାଖାପାଟନମ ପଡିଆରେ ଅନୁଷ୍ଠିତ ମ୍ୟାଚରେ ଦୁଇ ଦଳ ମଧ୍ୟରେ କଡ଼ା ପ୍ରତିଯୋଗିତା ହୋଇଥିଲା। କିନ୍ତୁ ଋତୁରାଜ ଗାଇକୱାଡଙ୍କ ଦଳ ଋଷଭ ପନ୍ତଙ୍କ ଦିଲ୍ଲୀ ଦଳଠାରୁ ୨୦ ରନରେ ପରାସ୍ତ ହୋଇଥିଲା। ସିଏସକେକୁ ଚଳିତ ସିଜିନର ପ୍ରଥମ ପରାଜୟର ସମ୍ମୁଖୀନ ହେବାକୁ ପଡିଛି। ପ୍ରଥମେ ବ୍ୟାଟିଂ କରି ଦିଲ୍ଲୀ କ୍ୟାପିଟାଲ୍ସ ଦଳ ୧୯୨ ରନ୍ ସଂଗ୍ରହ କରିଥିଲା। ଏହାର ଜବାବରେ ଚେନ୍ନାଇ ସୁପର କିଙ୍ଗ୍ସ ୧୭୨ ରନ ସ୍କୋର କରି ୨୦ ରନରେ ପରାଜୟ ଲାଭ କରିଛି। ପୃଥ୍ବୀ ଶ’ ଏବଂ ଡେଭିଡ ୱାର୍ନରଙ୍କ ଯୋଡି ଦିଲ୍ଲୀର ପ୍ରଥମ ୱିକେଟ୍ ପାଇଁ ୯୩ ରନର ଏକ ଗୁରୁତ୍ୱପୂର୍ଣ୍ଣ ଭାଗିଦାରୀ ଗଢ଼ିଥିଲେ।

ଡେଭିଡ ୱାର୍ଣ୍ଣର ୧୦ ଓଭରରେ  ମୁସ୍ତାଫିଜୁର ରହମାନଙ୍କ ବଲରେ ଏକ ସ୍କୁପ୍ ସଟ୍ ଖେଳିବାକୁ ପ୍ରୟାସ କରୁଥିବା ବେଳେ ୩୫ ବଲରେ ୫୨ ରନ୍ ସଂଗ୍ରହ କରି ମଥିସା ପଥିରାନାଙ୍କ ଦ୍ଵାରା କ୍ୟାଚ ଆଉଟ ହୋଇଥିଲେ। ପରବର୍ତ୍ତୀ ଓଭରରେ ବିପଜ୍ଜନକ ଦେଖାଯାଉଥିବା ପୃଥ୍ବୀ ଶ’ଙ୍କୁ ୪୩ ରନର ବ୍ୟକ୍ତିଗତ ସ୍କୋରରେ ରବିନ୍ଦ୍ର ଜାଡେଜା ପାଭିଲିୟନକୁ ପଠାଇ ଦେଇଥିଲେ।  ମାଥିଶା ପାଥିରାନା ୧୫ ତମ ଓଭରରେ ମିଚେଲ ମାର୍ଶ (୧୮) ଏବଂ ଟ୍ରିଆଷ୍ଟ ଷ୍ଟବ୍ସ (୦)ଙ୍କୁ ଆଉଟ କରି ବଡ଼ ସଫଳତା ହାସଲ କରିଥିଲେ।

ଏହା ପରେ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ଋଷଭ ପନ୍ତ ଏହି ଦାୟିତ୍ୱ ଗ୍ରହଣ କରି ୫୧ ରନ୍‌ର ଇନିଂସ ଖେଳି ଦଳକୁ ଏକ ଭଲ ସ୍କୋରରେ ପହଞ୍ଚାଇଥିଲେ। ତେବେ ଏହି ସିଜନର ପ୍ରଥମ ଅର୍ଦ୍ଧଶତକ ହାସଲ କରିବାରେ ସଫଳ ହୋଇଥିଲେ। କିନ୍ତୁ ଏକ ବଡ ସଟ୍ ଖେଳିବାକୁ ଚେଷ୍ଟା କରୁଥିବାବେଳେ ସେ ମାଥିଶା ପାଥିରାନାଙ୍କର ଶିକାର ହୋଇଥିଲେ।  ଶେଷରେ ଅକ୍ଷର ପଟେଲ (୬) ଏବଂ ଅଭିଷେକ ପୋରେଲ (୯) ସ୍କୋରକୁ ଆଗକୁ ନେଇଥିଲେ ଏବଂ ଦଳ ୧୯୧ ରନ୍ ସ୍କୋର କରିବାରେ ସଫଳ ହୋଇଥିଲା।

ଉତ୍ତରରେ ଦ୍ଵିତୀୟ ଇନିଂସରେ ବ୍ୟାଟିଂ କରୁଥିବାବେଳେ ଚେନ୍ନାଇ ସୁପର କିଙ୍ଗ୍ସ ଖରାପ ଆରମ୍ଭ କରିଥିଲା।  ଅଜିଙ୍କ୍ୟ ରାହାନେଙ୍କ ବ୍ୟତୀତ କୌଣସି ଖେଳାଳିଙ୍କ ବ୍ୟାଟ୍ ଚାଲିନଥିଲା ଏବଂ ସମସ୍ତ ବ୍ୟାଟ୍ସମ୍ୟାନ୍ ରନ୍ ସ୍କୋର କରିବାକୁ ସଂଘର୍ଷ କରୁଥିବା ଦେଖାଯାଇଥିଲା। ଖଲିଲ ଅହମ୍ମଦ ନିଜେ ପାୱାରପ୍ଲେରେ ରୁତୁରାଜ ଗାଇକୱାଡ ଏବଂ ରଚିନ୍ ରବିନ୍ଦ୍ରଙ୍କ ଓପନିଂ ଯୋଡିଙ୍କୁ ଆଉଟ କରି ସିଏସକେକୁ ବ୍ୟାକଫୁଟ୍ କୁ ଠେଲି ଦେଇଥିଲେ।  

ଏଭଳି ପରିସ୍ଥିତିରେ ଅଜିଙ୍କ୍ୟ ରାହାଣେ ତିନି ନମ୍ବରରେ ଆସି ଛକା ଓ ଚୌକା ମାରି ଆକ୍ରମଣାତ୍ମକ ଇନିଂସ ଖେଳିବାକୁ ଚେଷ୍ଟା କରିଥିଲେ। ଏହି ସମୟରେ ଅଜିଙ୍କ୍ୟ ରାହାଣେ ମଧ୍ୟ ଡାରିଲ ମିଚେଲଙ୍କ ସମର୍ଥନ ପାଇଥିଲେ, କିନ୍ତୁ ୧୦.୨ ଓଭରରେ ଅକ୍ସର ପଟେଲଙ୍କ ବଲରେ ଆଉଟ ହୋଇଥିଲେ।  ଅଜିଙ୍କ୍ୟ ରାହାଣେ (୪୫) ମଧ୍ୟ ୧୫ ତମ ଓଭରରେ ପାଭିଲିୟନକୁ ଫେରିଥିଲେ।  ଶକ୍ତିଶାଳୀ ବ୍ୟାଟ୍ସମ୍ୟାନ୍ ଶିବମ୍ ଦୁବେ ମଧ୍ୟ ମୁକେଶ କୁମାରଙ୍କ ଶିକାର ହୋଇଥିଲେ।

ନିମ୍ନ କ୍ରମରେ ରବିନ୍ଦ୍ର ଜାଡେଜା ଏବଂ ଏମଏସ ଧୋନିଙ୍କ ଯୋଡି ଚେନ୍ନାଇ ସୁପର କିଙ୍ଗ୍ସକୁ ବିଜୟର ଦ୍ୱାରକୁ ନେବାକୁ ଚେଷ୍ଟା କରିଥିଲା। କିନ୍ତୁ ସେତେବେଳକୁ ମ୍ୟାଚ ବହୁ ଦୂରକୁ ଚାଲି ଯାଇଥିଲା। ଯେଉଁଥିପାଇଁ ଚେନ୍ନାଇ ଦଳ ୨୦ ରନରେ ପରାଜୟ ସ୍ୱୀକାର କରିଥିଲା। ରବିନ୍ଦ୍ର ଜାଡେଜା ୧୭ ବଲରେ ୨୧ ରନ ସ୍କୋର କରିଥିବାବେଳେ ଏମଏସ ଧୋନି ୧୬ଟି ବଲରେ ୩୭ ରନ ଇନିଂସ ଖେଳି ଅପରାଜିତ ରହିଥିଲେ। ସେ ୨୩୧ ଷ୍ଟ୍ରାଇକ୍ ରେଟରେ ବ୍ୟାଟିଂ କରି ଚାରିଟି ଚୌକା ଏବଂ ତିନି ଛକା ମାରିଥିଲେ।