ଶ୍ରୀଲଙ୍କା ବିପକ୍ଷରେ ଦମଦାର ପ୍ରଦର୍ଶନ ପରେ ରାଙ୍କିଙ୍ଗରେ ଉପରକୁ ଉଠିଲେ ଭାରତୀୟ ଖେଳାଳି! ଜାଣନ୍ତୁ ପୁରା ବିଷୟ….
ଅଧିନାୟକ ସୁର୍ଯ୍ୟକୁମାର ଯାଦବଙ୍କ ନେତୃତ୍ୱରେ ଏବଂ ଗୌତମ ଗମ୍ଭୀରଙ୍କ କୋଚିଂରେ ଶ୍ରୀଲଙ୍କା ବିପକ୍ଷ ଟି-୨୦ ସିରିଜରେ ଟିମ୍ ଇଣ୍ଡିଆ ଚମତ୍କାର ପ୍ରଦର୍ଶନ କରିଛି। ଭାରତ ଶ୍ରୀଲଙ୍କାକୁ ୩-୦ ରେ ପରାସ୍ତ କରିଛି। ଏହି ସିରିଜରେ ବିଜୟ ପରେ ଆଇସିସି ଖେଳାଳିଙ୍କ ଟି-୨୦ ମାନ୍ୟତା ପ୍ରକାଶ କରିଛି। ଯେଉଁଥିରେ ଯୁବ ଖେଳାଳି ଯଶସ୍ବୀ ଜୟସୱାଲ ଏବଂ ଶୁବମାନ ଗିଲ ର଼୍ୟାଙ୍କିଙ୍ଗରେ ଉପରକୁ ଉଠିଛନ୍ତି।
ଆଇସିସି ଟି-୨୦ ର଼୍ୟାଙ୍କିଙ୍ଗରେ ଅଷ୍ଟ୍ରେଲୀୟ ଓପନର୍ ଟ୍ରାଭିସ୍ ହେଡ୍ ୧ ନମ୍ବର ସ୍ଥାନରେ ଅଛନ୍ତି। ଟିମ୍ ଇଣ୍ଡିଆର ବିସ୍ଫୋରକ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବ ୮୦୫ ରେଟିଂ ସହ ଦ୍ୱିତୀୟ ସ୍ଥାନରେ ଅଛନ୍ତି। ଶ୍ରୀଲଙ୍କା ବିପକ୍ଷ ଟି-୨୦ ସିରିଜରେ ଯଶସ୍ୱୀ ଜୟସୱାଲ ୮୦ ରନ୍ ସଂଗ୍ରହ କରିଥିଲେ। ଯେଉଁଥିପାଇଁ ସେ ଟି-୨୦ ର଼୍ୟାଙ୍କିଙ୍ଗରେ ୨ ପଏଣ୍ଟ ହାସଲ କରିଛନ୍ତି। ଜୟସ୍ୱାଲ ପାକିସ୍ତାନର ବାବର ଆଜମ ଏବଂ ମହମ୍ମଦ ରିଜୱାନଙ୍କୁ ପଛରେ ପକାଇ ଚତୁର୍ଥ ସ୍ଥାନରେ ପହଞ୍ଚିଛନ୍ତି। ବାବର ୫ମ ଏବଂ ରିଜୱାନ ଷଷ୍ଠ ସ୍ଥାନରେ ଥିବାବେଳେ ଉଭୟ ପାକିସ୍ତାନୀ ଖେଳାଳି ୧ ପଏଣ୍ଟ ଲେଖାଏଁ ହରାଇଛନ୍ତି।
ଅନ୍ୟପକ୍ଷରେ ଭାରତୀୟ ଖେଳାଳି ରିତୁରାଜ ଗାଇକୱାଡ ଟପ୍-୧୦ ରେ ନିଜକୁ ବଜାୟ ରଖିଛନ୍ତି। ଗାଇକୱାଡ ୬୬୪ ପଏଣ୍ଟ ସହ ଅଷ୍ଟମ ସ୍ଥାନରେ ରହିଛନ୍ତି। ଜିମ୍ବାୱେ ବିପକ୍ଷରେ ଶୁଭମାନ ଗିଲ ସର୍ବାଧିକ ୧୭୦ ରନ୍ କରିଥିଲେ। ଶ୍ରୀଲଙ୍କା ବିପକ୍ଷରେ ୭୩ ରନ୍ ସ୍କୋର କରିଛନ୍ତି। ଯେଉଁଥିପାଇଁ ଗିଲ ଟି-୨୦ ର଼୍ୟାଙ୍କିଙ୍ଗରେ ୧୬ ପଏଣ୍ଟ ଉପରକୁ ଉଠିଛନ୍ତି।
୬୧୩ ପଏଣ୍ଟ ସହିତ ଶୁଭମାନ ଗିଲ ୨୧ ତମ ସ୍ଥାନକୁ ଆସିଛନ୍ତି। ବୋଲରଙ୍କ ବିଷୟରେ କହିବାକୁ ଗଲେ ରବି ବିଷ୍ନୋଇ ଶ୍ରୀଲଙ୍କା ବିପକ୍ଷରେ ୬ ଟି ୱିକେଟ୍ ନେଇ ଉପକୃତ ହୋଇଛନ୍ତି। ୮ ପଏଣ୍ଟ ଅଧିକ ପାଇ ଆଇସିସି ଟି-୨୦ ର଼୍ୟାଙ୍କିଙ୍ଗରେ ଟପ୍-୧୦ ରେ ପ୍ରବେଶ କରିଛନ୍ତି। ବିସ୍ନୋଇଙ୍କ ପାଖରେ ମୋଟ ୬୩୫ ପଏଣ୍ଟ ରହିଛି।