ଦିନିକିଆ ଏସିଆ କପ୍ ୨୦୨୩ ଟାଇଟଲ୍ ଶ୍ରୀଲଙ୍କାକୁ ପରାସ୍ତ କରି ଭାରତୀୟ ଦଳ ଜିତିଥିଲା। ୨୦୨୬ ମସିହାରେ ଦେଶରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପ ପୂର୍ବରୁ ଭାରତ ବର୍ତ୍ତମାନ ପୁରୁଷ ଏସିଆ କପ୍ ୨୦୨୫ ଆୟୋଜନ କରିବ। ଏସୀୟ କ୍ରିକେଟ୍ ପରିଷଦ ଏହା ଘୋଷଣା କରିଛି। ୨୦୨୭ ମସିହାରେ ଦକ୍ଷିଣ ଆଫ୍ରିକାରେ ଦିନିକିଆ ବିଶ୍ୱକପ୍ ଖେଳାଯିବାକୁ ସ୍ଥିର ହୋଇଛି।

ଏସିଆ କପ୍ ସର୍ବଦା ବିଶ୍ୱ ଇଭେଣ୍ଟ ପାଇଁ ଏକ ପ୍ରସ୍ତୁତି ଭାବରେ ବ୍ୟବହୃତ ହୁଏ ଏବଂ ବିଶ୍ୱକପ୍ ସହିତ ସମାନ ଫର୍ମାଟରେ ଖେଳାଯାଏ। ଏସିଆ କପର ୨୦୨୩ ସିଜନ୍ ପାକିସ୍ତାନ କ୍ରିକେଟ୍ ବୋର୍ଡ ଦ୍ୱାରା ଏକ 'ହାଇବ୍ରିଡ୍ ମଡେଲ୍'ରେ ଆୟୋଜିତ ହୋଇଥିଲା। ଏହା ପରେ ଭାରତ ପାକିସ୍ତାନ ଗସ୍ତ କରିବାକୁ ମନା କରିଦେଇଥିଲା ଏବଂ ଶ୍ରୀଲଙ୍କାରେ ଭାରତର ସମସ୍ତ ମ୍ୟାଚ୍ ଖେଳାଯାଇଥିଲା। 

ଭାରତରେ ଟି-୨୦ ଫର୍ମାଟରେ ଏବଂ ବାଂଲାଦେଶରେ ୫୦ ଓଭର ଫର୍ମାଟରେ ଖେଳାଯିବାକୁ ଥିବା ଏସିଆ କପରେ ପ୍ରତ୍ୟେକ ୧୩ ଟି ମ୍ୟାଚ୍ ହେବ। ୩୪ ବର୍ଷ ପରେ ଭାରତରେ ଏସିଆ କପ୍ ଆୟୋଜିତ ହେବାକୁ ଯାଉଛି। ଏହାପୂର୍ବରୁ ୧୯୯୧ ରେ ପୁରୁଷ ଏସିଆ କପ୍ ଭାରତରେ ଆୟୋଜିତ ହୋଇଥିଲା। ଭାରତରେ ଆୟୋଜିତ ହେବାକୁ ଥିବା ଏସିଆ କପ୍‌କୁ ପାକିସ୍ତାନୀ ଦଳ ଆସିବାର ସମସ୍ତ ସମ୍ଭାବନା ରହିଛି।  ଦିନିକିଆ ବିଶ୍ୱକପ ୨୦୨୩ ମଧ୍ୟ ଭାରତରେ ଆୟୋଜିତ ହୋଇଥିଲା। ଏହା ପରେ ମଧ୍ୟ ପାକିସ୍ତାନୀ ଦଳ କ୍ରିକେଟ୍ ଖେଳିବାକୁ ଭାରତ ଆସିଥିଲା। 

ଆଇଓଏଆଇରେ ପ୍ରକାଶିତ ଏକ ବିବୃତ୍ତିରେ ଏସୀୟ କ୍ରିକେଟ୍ ପରିଷଦ କହିଛି ଯେ 'ପୁରୁଷ ଏସିଆ କପ୍ ଟୁର୍ନାମେଣ୍ଟ' ଅର୍ଥାତ୍ ଏସିସି ଦ୍ୱାରା ମନୋନୀତ ସଦସ୍ୟଙ୍କ ମଧ୍ୟରେ ଦୁଇବର୍ଷ ବ୍ୟବଧାନରେ ଆୟୋଜିତ ହେବ ପୁରୁଷ କ୍ରିକେଟ୍ ଟୁର୍ନାମେଣ୍ଟ। ଏଥିରେ ଆଫଗାନିସ୍ତାନ, ଭାରତ, ପାକିସ୍ଥାନ, ଶ୍ରୀଲଙ୍କା, ବାଂଲାଦେଶର ଦଳ ଏବଂ ଏସିସିର ଏକ ଅଣ-ଟେଷ୍ଟ ଖେଳୁଥିବା ସଦସ୍ୟ ଅଂଶଗ୍ରହଣ କରିବେ। ଅଣ-ଟେଷ୍ଟ ଦେଶଗୁଡିକ ଯୋଗ୍ୟତା ଟୁର୍ନାମେଣ୍ଟ ମାଧ୍ୟମରେ ଏଥିରେ ସ୍ଥାନ ପାଇବେ।