ଚଳିତ ମାସ ଶେଷ ସୁଦ୍ଧା ଟି-୨୦ ବିଶ୍ୱକପ ପାଇଁ ଭାରତୀୟ ଦଳ ଚୟନ କରାଯିବ। ଯେଉଁମାନେ ଆଇପିଏଲରେ ଭଲ ପ୍ରଦର୍ଶନ କରିଛନ୍ତି ସେମାନେ ଏହି ମେଗା ଆଇସିସି ଟୁର୍ଣ୍ଣାମେଣ୍ଟ ଖେଳିବାକୁ ସୁଯୋଗ ପାଇପାରିବେ। ବିରାଟ କୋହଲି, ରୋହିତ ଶର୍ମାଙ୍କ ପରି ଖେଳାଳିମାନେ ଆଇପିଏଲରେ ଚମତ୍କାର ପ୍ରଦର୍ଶନ କରୁଛନ୍ତି। କିନ୍ତୁ ପୂର୍ବତନ କ୍ରିକେଟର ମାଇକେଲ ଭନ୍ ଏହିପରି ଦୁଇଜଣ କ୍ରିକେଟରଙ୍କ ନାମ ରଖିଛନ୍ତି ଯାହାଙ୍କ ବିନା ଭାରତର ଟି-୨୦ ବିଶ୍ୱକପ ଜିତିବା ଅସମ୍ଭବ ହେବ।

ମାଇକେଲ ଭନ୍ କହିଛନ୍ତି ଯେ, “ଯଦି ଭାରତ ବିଶ୍ୱକପ ଜିତିବାକୁ ଚାହୁଁଛି, ତେବେ ହାର୍ଦ୍ଦିକ ପାଣ୍ଡ୍ୟାଙ୍କୁ ସାଙ୍ଗରେ ରଖିବା ଜରୁରୀ ଅଟେ”। ହାର୍ଦ୍ଦିକ ପାଣ୍ଡ୍ୟାଙ୍କ ସହ ବିଶ୍ୱକପ ଜିତିବାର ସମ୍ଭାବନା ବଢିବ। ଯଦି ହାର୍ଦ୍ଦିକ ପାଣ୍ଡ୍ୟା ଏବଂ ଋଷଭ ପନ୍ତ ଖେଳନ୍ତି ନାହିଁ ତେବେ ଭାରତ ବିଶ୍ୱକପ ଜିତିବାରେ ସକ୍ଷମ ହେବନାହିଁ। ବିଶ୍ୱକପ ଜିତିବା ପାଇଁ ଭାରତକୁ ଋଷଭ ପନ୍ତଙ୍କୁ ଖେଳାଇବାକୁ ପଡ଼ିବ”।

ମାଇକେଲ ଭନ୍ ଆହୁରି ମଧ୍ୟ କହିଛନ୍ତି ଯେ, “ଆଘାତ ସମସ୍ୟା ପରେ ମଧ୍ୟ ଋଷଭ ଭଲ ପ୍ରଦର୍ଶନ କରୁଛନ୍ତି। ବର୍ତ୍ତମାନ ତାଙ୍କୁ ତାଙ୍କର ପୂର୍ବ ରୂପରେ ଦେଖିବାକୁ ମିଳୁଛି। ଭାରତକୁ ହାର୍ଦ୍ଦିକ ପାଣ୍ଡ୍ୟାଙ୍କ ଆବଶ୍ୟକତା ମଧ୍ୟ ପଡିବ। ଗତ ବର୍ଷ ଭାରତରେ ଖେଳାଯାଇଥିବା ଆଇସିସି ODI ବିଶ୍ୱକପ ଫାଇନାଲରେ ଟିମ୍ ଇଣ୍ଡିଆକୁ ପରାଜୟର ସାମ୍ନା କରିବାକୁ ପଡିଥିଲା।  ରୋହିତ ଶର୍ମାଙ୍କ ପାଇଁ ଅଧିନାୟକ ଭାବରେ ଆଇସିସି ଟ୍ରଫି ଜିତିବାର ଏହା ହେଉଛି ଶେଷ ସୁଯୋଗ।  ବିସିସିଆଇ ପୁଣି ଥରେ ତାଙ୍କ ଉପରେ ବିଶ୍ୱାସ ପ୍ରକାଶ କରିଛି।

ଏଠାରେ ଉଲ୍ଲେଖଯୋଗ୍ୟ ଯେ ୨୦୦୭ ମସିହାରେ ଭାରତ ଟି-୨୦ ବିଶ୍ୱକପ ଟାଇଟଲ ଜିତିଥିଲା। ଯେଉଁଠାରେ ଫାଇନାଲ ମ୍ୟାଚରେ ଭାରତ ପାକିସ୍ତାନକୁ ପରାସ୍ତ କରିଥିଲା। ସେବେଠାରୁ ଭାରତ କେବଳ ୨୦୧୧ ବିଶ୍ୱକପ ଜିତିଛି। ୨୦୧୬ ଟି-୨୦ ବିଶ୍ୱକପର ସେମିଫାଇନାଲରେ ପ୍ରବେଶ କରିବାରେ ଭାରତ ସଫଳ ହୋଇଥିଲା। କିନ୍ତୁ ୱେଷ୍ଟଇଣ୍ଡିଜ ସେମିଫାଇନାଲ ମ୍ୟାଚରେ ଭାରତକୁ ପରାସ୍ତ କରିଥିଲା। ୨୦୨୨ ବିଶ୍ୱକପରେ ମଧ୍ୟ ଭାରତକୁ ସେମିଫାଇନାଲରେ ପରାଜୟର ସମ୍ମୁଖୀନ ହେବାକୁ ପଡିଥିଲା। ସେଠାରେ ଇଂଲଣ୍ଡ ଭାରତକୁ ଦୟନୀୟ ଭାବରେ ପରାସ୍ତ କରିଥିଲା।