ଆଇପିଏଲ୍ ୨୦୨୪ ପୂର୍ବରୁ ମୁମ୍ବାଇ ଇଣ୍ଡିଆନ୍ସ ରୋହିତ ଶର୍ମାଙ୍କୁ  ହଟାଇ ହାର୍ଦ୍ଦିକ ପାଣ୍ଡ୍ୟାଙ୍କୁ ଦଳର ନୂତନ ଅଧିନାୟକ ନିଯୁକ୍ତ କରିଥିଲା। ହାର୍ଦ୍ଦିକ ଅଧିନାୟକ ହେବା ମାତ୍ରେ ଦଳକୁ ଅବିଶ୍ୱସନୀୟ ଫଳାଫଳ ମିଳିବ ବୋଲି ସେମାନଙ୍କର ଭାବନା ରହିଥିଲା। କିନ୍ତୁ ଏହା ଆଦୌ ସମ୍ଭବ ହୋଇ ପାରିନାହିଁ। ହାର୍ଦ୍ଦିକଙ୍କ ଅଧିନାୟକତ୍ୱରେ ଦଳ ଅନେକ ସମସ୍ୟାର ସମ୍ମୁଖୀନ ହେବାରେ ଲାଗିଛି। 

ଏପରିକି ଦଳରେ ବିଭାଜନ ଏବଂ ଦୁଇ ଗୋଷ୍ଠୀରେ ଖେଳାଳିମାନେ ବିଭକ୍ତ ହେବାର ଖବର ମଧ୍ୟ ଶୁଣିବାକୁ ମିଳୁଛି। ପ୍ରଶଂସକମାନେ ଏଥିପାଇଁ ହାର୍ଦିକ ପାଣ୍ଡ୍ୟାଙ୍କୁ ଟ୍ରୋଲ କରୁଛନ୍ତି। ମୁମ୍ବାଇ ଇଣ୍ଡିଆନ୍ସ ଦଳକୁ ମଧ୍ୟ ଖୁବ୍ ଟ୍ରୋଲ କରାଯାଉଛି। ପ୍ରଶଂସକମାନେ ଦଳ ପତାକା ଉପରେ ପାଦ ରଖି ଚଢୁଥିବା ମଧ୍ୟ ନଜର ଆସିଛି। ପ୍ରଥମ ଥର ପାଇଁ, ମୁମ୍ବାଇ ଇଣ୍ଡିଆନ୍ସର ପ୍ରଶଂସକମାନେ ନିଜ ଦଳର ପରାଜୟ ଚାହୁଁଥିବା ସ୍ପଷ୍ଟ ଭାବରେ ଦେଖିବାକୁ ମିଳିଲାଣି।

ଅନ୍ୟପକ୍ଷରେ ମୁମ୍ବାଇ ସିଜିନର ପ୍ରଥମ ୩ଟି ମ୍ୟାଚ୍ ହାରି ସାରିଛି। ବର୍ତ୍ତମାନ ପର୍ଯ୍ୟନ୍ତ, ଆଇପିଏଲ୍ ୨୦୨୪ ଦଳ ପାଇଁ ବହୁତ ଖରାପ ସାବ୍ୟସ୍ତ ହୋଇଛି। ତେବେ ଏହାରି ମଧ୍ୟରେ ଦଳ ପାଇଁ ଏକ ଖୁସି ଖବର ସାମ୍ନାକୁ ଆସିଛି। ସମସ୍ତ ନୈରାଶ୍ୟଜନକ ଏବଂ ଖରାପ ଖବର ମଧ୍ୟରେ ମୁମ୍ବାଇ ଇଣ୍ଡିଆନ୍ସ ପାଇଁ ଏକ ଭଲ ଏବଂ ବଡ ଖବର ଆସିଛି। ଦଳର ବିସ୍ଫୋରକ ବ୍ୟାଟ୍ସମ୍ୟାନ୍ ସୂର୍ଯ୍ୟକୁମାର ଯାଦବ ଦଳରେ ଯୋଗଦେବାକୁ ଯାଉଛନ୍ତି ଏବଂ ଖୁବ ଶୀଘ୍ର ଚୂଡାନ୍ତ ଏକାଦଶର ସେ ଅଂଶ ହୋଇପାରିବେ।

ଖବର ଅନୁଯାୟୀ, ସୂର୍ଯ୍ୟକୁମାର ଯାଦବଙ୍କୁ ଆଇପିଏଲ ପାଇଁ ଫିଟ୍ ଘୋଷିତ କରାଯାଇଛି ଏବଂ ସେ ଏପ୍ରିଲ ୭ ତାରିଖରେ ୱାନଖେଡେ ଷ୍ଟାଡିୟମରେ ଦିଲ୍ଲୀ କ୍ୟାପିଟାଲ୍ସ ବିପକ୍ଷ ମ୍ୟାଚରେ ଖେଳୁଥିବାର ଦେଖିବାକୁ ମିଳିପାରନ୍ତି। ଯଦି ସୁର୍ଯ୍ୟକୁମାର ଯାଦବ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ଖେଳନ୍ତି ତେବେ ମୁମ୍ବାଇ ଦଳର ବ୍ୟାଟିଂ ଅଧିକ ଶକ୍ତିଶାଳୀ ହେବା ନିଶ୍ଚିତ ଅଟେ। ସୂର୍ଯ୍ୟଙ୍କ ପାଇଁ ଡିୱାଲ୍ଡ ବ୍ରେଭିସ୍ କିମ୍ବା ନାମାନ ଧୀରଙ୍କୁ ଦଳରୁ ଡ୍ରପ କରାଯାଇପାରେ। ଅତୀତରେ ସୂର୍ଯ୍ୟକୁମାର ମୁମ୍ବାଇ ଇଣ୍ଡିଆନ୍ସ ପାଇଁ ଏକାକୀ ମ୍ୟାଚ୍ ଜିତିଛନ୍ତି ଏବଂ ସେ ଫେରିବା ପରେ ମୁମ୍ବାଇ ଦଳ ଆଗାମୀ ମ୍ୟାଚ ଜିତିବ ବୋଲି ଆଶା ରଖିଛି।

ସୂର୍ଯ୍ୟକୁମାର ଯାଦବଙ୍କୁ ଟି-୨୦ ଫର୍ମାଟରେ ସବୁଠାରୁ ବିପଜ୍ଜନକ ବ୍ୟାଟ୍ସମ୍ୟାନ୍ ଭାବରେ ବିବେଚନା କରାଯାଏ।  ଆନ୍ତର୍ଜାତୀୟ କ୍ରିକେଟ୍ ହେଉ କିମ୍ବା ଆଇପିଏଲ୍, ପ୍ରତ୍ୟେକ ବୋଲର ସୂର୍ଯ୍ୟଙ୍କୁ ସାମ୍ନା କରିବାକୁ ଭୟ କରନ୍ତି। ତାଙ୍କର ଅନେକଗୁଡ଼ିଏ ସଟ୍ ଅଛି ଯାହା ବୋଲରଙ୍କ ମୁଣ୍ଡବ୍ୟଥାର କାରଣ ସାଜିପାରେ। ତେଣୁ ତାଙ୍କ ପ୍ରତ୍ୟାବର୍ତ୍ତନ ମୁମ୍ବାଇ ଇଣ୍ଡିଆନ୍ସ ପାଇଁ ଏକ ବଡ଼ ଖବର ଅଟେ। ଏଠାରେ ଉଲ୍ଲେଖଯୋଗ୍ୟ ଯେ ୨୦୧୮ ରୁ ୨୦୨୩ ପର୍ଯ୍ୟନ୍ତ ମୁମ୍ବାଇ ପାଇଁ ୮୪ ଟି ମ୍ୟାଚରେ ସୂର୍ଯ୍ୟକୁମାର ୨୬୪୧ ରନ୍ ସ୍କୋର କରିଛନ୍ତି। ଏହି ଅବଧି ମଧ୍ୟରେ ସେ ୨୦ ଅର୍ଦ୍ଧ ଶତକ ଏବଂ ଗୋଟିଏ ଶତକ ସ୍କୋର କରିଛନ୍ତି।