ରୋହିତ ଶର୍ମା ଙ୍କ ବଡ଼ ବୟାନ, କହିଲେ "ଏଥର ବି ଭାରତ ଆସିବ ଟ୍ରଫି ଏବଂ...
ଆଇସିସି ଚମ୍ପିଆନ୍ସ ଟ୍ରଫି ୨୦୨୫ : ଫେବୃଆରୀ ୧୯ ତାରିଖରୁ ପାକିସ୍ତାନ ଏବଂ ଦୁବାଇରେ ଆରମ୍ଭ ହେବାକୁ ଯାଉଛି ଚମ୍ପିଆନ୍ସ ଟ୍ରଫି ୨୦୨୫। ପ୍ରଥମ ମ୍ୟାଚ ପାକିସ୍ତାନ ଓ ନ୍ୟୁଜିଲାଣ୍ଡ ମଧ୍ୟରେ ଖେଳାଯିବ । ଫେବୃଆରୀ ୨୦ରେ ଭାରତର ଏବଂ ବାଂଲାଦେଶ ମୁକାବିଲା ଦୁବାଇରେ ଖେଳାଯିବ। ଏହାପରେ ୨୩ରେ ଭାରତ-ପାକିସ୍ତାନ ଟକ୍କର । ମାର୍ଚ୍ଚ ୨ରେ ନ୍ୟୁଜିଲାଣ୍ଡ ଏବଂ ଭାରତ ମଧ୍ୟରେ ମୁକାବିଲା ରହିଛି। ଏସବୁ ଭିତରେ ଭାରତୀୟ ସ୍କ୍ୱାର୍ଡ ଘୋଷଣା ସରିଛି । ଯାହାର ଅଧିନାୟକ ରହିଛନ୍ତି ରୋହିତ ଶର୍ମା ।
ଓ୍ୱାଙ୍ଖଡେ ଷ୍ଟାଡିୟମର ୫୦ତମ ବାର୍ଷିକ ଉତ୍ସବ ମୁମ୍ବାଇ କ୍ରିକେଟ୍ ଆସୋସିଏସନ୍ ପକ୍ଷରୁ ଆୟୋଜନ କରାଯାଇଥିଲା । ଏଥିରେ ସଚ୍ଚିନ ତେନ୍ଦୁଲକର, ରବି ଶାସ୍ତ୍ରୀ, ସୁନୀଲ ଗାଭାସ୍କର, ଆଜିଙ୍କ୍ୟ ରାହାଣେ, ରୋହିତ ଶର୍ମା, ଶ୍ରେୟସ ଆୟର ପ୍ରମୁଖ ସାମିଲ ହୋଇଥିଲେ । ଏହି ଅବସରରେ ରୋହିତ ଶର୍ମା କହିଛନ୍ତି ଯେ, ଆମେ ଆମର ଶ୍ରେଷ୍ଠ ପ୍ରଦର୍ଶନ କରିବୁ । ଆଇସିସି ପ୍ରତିଯୋଗିତରେ ନିଜ ଦେଶର ପ୍ରତିନିଧିତ୍ୱ କରିବା ନିହାତି ଏକ ଗୌରବର ବିଷୟ । ୧୪୦ କୋଟି ଲୋକ ଆମ ପଛରେ ଅଛନ୍ତି । ଦେଶବାସୀଙ୍କ ପାଇଁ ଏହି ଆଇସିସି ଟ୍ରଫିକୁ ପୁଣି ଥରେ ଓ୍ୱାଙ୍ଖଡେ ଷ୍ଟାଡିୟମ ଆଣିବା ଲାଗି ନିଜର ଶ୍ରେଷ୍ଠତା ପ୍ରଦର୍ଶନ କରିବୁ ।
ବର୍ତ୍ତମାନ ଯାଏଁ ୮ ଥର ଚମ୍ପିଆନ୍ସ ଟ୍ରଫି ଟୁର୍ଣ୍ଣାମେଣ୍ଟ ଲିଷ୍ଟ :
୧୯୯୮ରେ ପ୍ରଥମ ଥର ପାଇଁ ବାଂଲାଦେଶରେ ଆୟୋଜନ ହୋଇଥିଲା ପ୍ରଥମ ଚମ୍ପିଆନ୍ସ ଟ୍ରଫି । ଏଥିରେ ଓ୍ୱେଷ୍ଟଇଣ୍ଡିଜ୍କୁ ହରାଇ ଦକ୍ଷିଣ ଆଫ୍ରିକା ଚମ୍ପିଆନ୍ ହୋଇଥିଲା । ଏହାପରେ ୨୦୦୦ ରେ କେନିଆରେ ହୋଇଥିଲା ଚମ୍ପିଆନ୍ସ ଟ୍ରଫି । ଏଥିରେ ଭାରତକୁ ହରାଇ ନ୍ୟୁଜିଲାଣ୍ଡ ହୋଇଥିଲା ଚମ୍ପିଆନ୍ ।
ତୃତୀୟ ଚମ୍ପିଆନ୍ସ ଟ୍ରଫି ରେ ଭାରତ ଏବଂ ଶ୍ରୀଲଙ୍କା ଯୌଥ ଭାବେ ବିଜେତା ଘୋଷିତ ହୋଇଥିଲେ । ୪ର୍ଥ ଚମ୍ପିଆନ୍ସ ଟ୍ରଫି ଇଂଲଣ୍ଡରେ ଆୟୋଜନ ହୋଇଥିଲା । ଏଥିରେ ଇଂଲଣ୍ଡକୁ ହରାଇ ଓ୍ୱେଷ୍ଟଇଣ୍ଡିଜ୍ ଚମ୍ପିଆନ୍ ହୋଇଥିଲା ।
୫ମ ଚମ୍ପିଆନ୍ସ ଟ୍ରଫି ଭାରତରେ ଖେଳାଯାଇଥିଲା । ଏଥିରେ ଓ୍ୱେଷ୍ଟଇଣ୍ଡିଜ୍କୁ ହରାଇ ଅଷ୍ଟ୍ରେଲିଆ ବିଜୟ ହୋଇଥିଲା । ୬ଷ୍ଠ ଚମ୍ପିଆନ୍ସ ଟ୍ରଫି ଦକ୍ଷିଣ ଆଫ୍ରିକାରେ ଖେଳାଯାଇଥିଲା। ଯେଉଁଥିରେ ନ୍ୟୁଜିଲାଣ୍ଡକୁ ହରାଇ ଚମ୍ପିଆନ୍ ହୋଇଥିଲା ଅଷ୍ଟ୍ରେଲିଆ ।
୨୦୧୩ରେ ଖେଳାଯାଇଥିବା ଚମ୍ପିଆନ୍ସ ଟ୍ରଫି ରେ ଇଂଲଣ୍ଡକୁ ହରାଇ ଭାରତୀୟ ଟିମ୍ ଚମ୍ପିଆନ୍ ହୋଇଥିଲା । ଶେଷ ଥର ପାଇଁ ୨୦୧୭ରେ ଖେଳାଯାଇଥିବା ଚମ୍ପିଆନ୍ସ ଟ୍ରଫିରେ ଭାରତକୁ ହରାଇ ଟ୍ରଫି ଜିତିଥିଲା ପାକିସ୍ତାନ ।