ଭାରତ ଏବଂ ଇଂଲଣ୍ଡ ମଧ୍ୟରେ ପାଞ୍ଚ ମ୍ୟାଚ ବିଶିଷ୍ଟ ଟେଷ୍ଟ ସିରିଜର ଚତୁର୍ଥ ମ୍ୟାଚ୍ ରାଞ୍ଚିରେ ଖେଳାଯିବ। ଫେବୃଆରୀ ୨୩ ତାରିଖରୁ JSCA ଆନ୍ତର୍ଜାତୀୟ ଷ୍ଟାଡିୟମ୍ କମ୍ପ୍ଲେକ୍ସରେ ଉଭୟ ଦଳ ମୁହାଁମୁହିଁ ହେବେ। ହାଇଦ୍ରାବାଦରେ ଟେଷ୍ଟ ଜିତି ଇଂଲଣ୍ଡ ସିରିଜ ଆରମ୍ଭ କରିଥିଲା। ଏହା ପରେ ରୋହିତ ଶର୍ମାଙ୍କ ଦଳ ଏକ ଚମତ୍କାର ପ୍ରତ୍ୟାବର୍ତ୍ତନ କରିଥିଲା।  ବିଶାଖାପାଟନମ୍ ଏବଂ ରାଜକୋଟରେ ଖେଳାଯାଇଥିବା ମ୍ୟାଚ୍ ଜିତି ସିରିଜରେ ଭାରତ ୨-୧ରେ ଅଗ୍ରଣୀ ହାସଲ କରିଛି।

ରାଞ୍ଚିରେ ଭାରତ ମ୍ୟାଚ ଜିତି ସିରିଜ ହାତେଇବା ଉପରେ ନଜ଼ର ରଖିବ। ଏଥି ସହିତ ଇଂଲଣ୍ଡ ଦଳ ଏହି ସିରିଜରେ ରହିବାକୁ ବିଜୟ କିମ୍ବା ଡ୍ର ପାଇଁ ଆଶା କରିବ। ତେବେ ରାଞ୍ଚି ହେଉଛି ମହାନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନିଙ୍କ ସହର।  ଟିମ୍ ଇଣ୍ଡିଆ ବର୍ତ୍ତମାନ ପର୍ଯ୍ୟନ୍ତ ଏଠାରେ ଗୋଟିଏ ବି ଟେଷ୍ଟ ହାରିନାହିଁ। ଏଥି ସହିତ ଇଂଲଣ୍ଡ ପ୍ରଥମ ଥର ପାଇଁ ଧୋନିଙ୍କ ସହରରେ କ୍ରିକେଟର ଦୀର୍ଘତମ ଫର୍ମାଟ୍ ଖେଳିବ। ରାଞ୍ଚିରେ ଏପର୍ଯ୍ୟନ୍ତ ଦୁଇଟି ଟେଷ୍ଟ ମ୍ୟାଚ୍ ଖେଳାଯାଇଛି।  ଏଠାରେ ପ୍ରଥମ ମ୍ୟାଚ୍ ୨୦୧୭ରେ ଭାରତ ଏବଂ ଅଷ୍ଟ୍ରେଲିଆ ମଧ୍ୟରେ ଖେଳାଯାଇଥିଲା। ସେହି ମ୍ୟାଚ୍ ଡ୍ରରେ ଶେଷ ହୋଇଥିଲା। ଏହା ବ୍ୟତୀତ ଦ୍ୱିତୀୟ ମ୍ୟାଚ୍ ଦୁଇ ବର୍ଷ ପରେ ୨୦୧୯ ରେ ଅନୁଷ୍ଠିତ ହୋଇଥିଲା। ଉକ୍ତ ମ୍ୟାଚକୁ ଭାରତ ଦକ୍ଷିଣ ଆଫ୍ରିକା ବିରୁଦ୍ଧରେ ଜିତିଥିଲା।

୨୦୧୭ ରେ, ଯେତେବେଳେ ରାଞ୍ଚିରେ ଭାରତ ଏବଂ ଅଷ୍ଟ୍ରେଲିଆର ଦଳ ମୁହାଁମୁହିଁ ହୋଇଥିଲେ, ସେତେବେଳେ ରବିନ୍ଦ୍ର ଜାଡେଜାଙ୍କ ଯାଦୁ ଦେଖିବାକୁ ମିଳିଥିଲା।  ସେ କଙ୍ଗାରୁ ଦଳ ବିପକ୍ଷ ପ୍ରଥମ ଇନିଂସରେ ପାଞ୍ଚଟି ୱିକେଟ୍ ନେଇଥିଲେ। ଏହା ପରେ ସେ ଭାରତ ପାଇଁ ପ୍ରଥମ ଇନିଂସରେ ଅପରାଜିତ ୫୪ ରନ୍ ସ୍କୋର କରିଥିଲେ।  କେବଳ ସେତିକି ନୁହେଁ ଜାଡେଜା ମଧ୍ୟ ଦ୍ୱିତୀୟ ଇନିଂସରେ ସାଂଘାତିକ ବୋଲିଂ କରି ପୁଣିଥରେ ଚାରୋଟି ୱିକେଟ୍ ନେଇଥିଲେ। ଏଥିସହିତ ରବିଚନ୍ଦ୍ରନ ଅଶ୍ୱିନ ଉଭୟ ଇନିଂସରେ ଗୋଟିଏ ଲେଖାଏଁ ୱିକେଟ୍ ନେଇଥିଲେ। ୨୦୧୭ ରେ ଖେଳିଥିବା ଦଳର କେବଳ ଏହି ଦୁଇ ସଦସ୍ୟ ବର୍ତ୍ତମାନର ଭାରତୀୟ ଦଳର ଅଂଶ ଅଟନ୍ତି।

୨୦୧୯ ରେ, ଯେତେବେଳେ ଭାରତ ଦକ୍ଷିଣ ଆଫ୍ରିକା ବିପକ୍ଷରେ ଖେଳିଥିଲା, ସେତେବେଳେ ରୋହିତ ଶର୍ମା ଦ୍ୱିଶତକ ହାସଲ କରିଥିଲେ।  ସେ ପ୍ରଥମ ଇନିଂସରେ ୨୧୨ ରନ୍ ସ୍କୋର କରିଥିଲେ।  ଜାଡେଜା ୫୧ ଏବଂ ଅଶ୍ୱିନ ୧୪ ରନ ସ୍କୋର କରିଥିଲେ। ବୋଲିଂରେ ଜାଡେଜା ପ୍ରଥମ ଇନିଂସରେ ଦୁଇଟି ୱିକେଟ୍ ନେଇଥିଲେ। ଦ୍ୱିତୀୟ ଇନିଂସରେ ସେ ଗୋଟିଏ ସଫଳତା ପାଇଥିଲେ। ପ୍ରଥମ ଇନିଂସରେ ଅଶ୍ୱିନଙ୍କୁ ସଫଳତା ମିଳି ନଥିଲା। ଦ୍ୱିତୀୟ ଇନିଂସରେ ସେ ଗୋଟିଏ ୱିକେଟ୍ ନେଇଥିଲେ। ଭାରତ ଏହି ମ୍ୟାଚକୁ ଇନିଂସ ଏବଂ ୨୦୨ ରନରେ ଜିତିଥିଲା।

ରୋହିତ ଶର୍ମା ହେଉଛନ୍ତି ସେହି ବ୍ୟାଟ୍ସମ୍ୟାନ୍ ଯିଏ ୨୧୨ ରନ୍ ସହ ରାଞ୍ଚିରେ ସର୍ବାଧିକ ରନ୍ ସଂଗ୍ରହ କରିଛନ୍ତି।  ତାଙ୍କ ପରେ ଚେତେଶ୍ୱର ପୂଜାରା ଦ୍ୱିତୀୟ ସ୍ଥାନରେ ଅଛନ୍ତି।  ସେ ଦୁଇଟି ମ୍ୟାଚ୍‌ରେ ୨୦୨ ରନ୍ ସଂଗ୍ରହ କରିଛନ୍ତି।  ଜାଡେଜା ଦୁଇଟି ମ୍ୟାଚରେ ଏଠାରେ ୧୦୫ ରନ୍ ସଂଗ୍ରହ କରିଛନ୍ତି। ଏହି ଗ୍ରାଉଣ୍ଡରେ ସର୍ବାଧିକ ରନ୍ ସ୍କୋର କରିବାରେ ସେ ସପ୍ତମ ସ୍ଥାନରେ ଅଛନ୍ତି। ବୋଲିଂରେ ଜାଡେଜା ଏଠାରେ ଏକ ନମ୍ବର ସ୍ଥାନରେ ରହିଛନ୍ତି। ସେ ଦୁଇଟି ମ୍ୟାଚ୍‌ରେ ୧୨ଟି ୱିକେଟ୍ ନେଇଛନ୍ତି।