କ୍ରିକେଟ ଖବର : ପାକିସ୍ତାନ କ୍ରିକେଟ୍ ବୋର୍ଡ (ପିସିବି) ର ଅଧ୍ୟକ୍ଷ ରମିଜ ରାଜା କହିଛନ୍ତି ଯେ ଯଦି ପାକିସ୍ତାନ କ୍ରିକେଟ୍ ଦଳ ଆଇସିସି ଟି-୨୦ ବିଶ୍ୱକପ ଟୁର୍ଣ୍ଣାମେଣ୍ଟରେ ଭାରତକୁ ପରାସ୍ତ କରେ ତେବେ ବାବର ଆଜମଙ୍କ ଅଧିନାୟକତ୍ବରେ ଖେଳୁଥିବା ପାକିସ୍ତାନ ଦଳକୁ ଏକ ବ୍ଲାଙ୍କ୍ ଚେକ୍ ଦିଆଯିବ। ଏହା ବ୍ୟତୀତ ରମିଜ ରାଜା କହିଛନ୍ତି ଯେ ଆନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) କୁ 90 ପ୍ରତିଶତ ଅର୍ଥ ଭାରତରୁ ଆସିଛି। ଆଜି ପର୍ଯ୍ୟନ୍ତ କୌଣସି ବିଶ୍ୱକପ ମ୍ୟାଚ୍‌ରେ ପାକିସ୍ତାନ ଭାରତକୁ ପରାସ୍ତ କରିପାରି ନାହିଁ। ଅନ୍ୟପଟେ ଅନେକ ବିଶୃଙ୍ଖଳା କାରଣରୁ ଭାରତ ଏବଂ ପାକିସ୍ଥାନ ମଧ୍ୟରେ କୌଣସି ଦ୍ୱିପାକ୍ଷିକ ସିରିଜ୍ ଖେଳାଯାଇ ନାହିଁ, କେବଳ ଆଇସିସି ଇଭେଣ୍ଟରେ ହିଁ ଉଭୟ ଦଳ ମୁହାଁମୁହିଁ ହୋଇଛନ୍ତି।

ଆନ୍ତ-ପ୍ରାଦେଶିକ ସମନ୍ୱୟ (ଆଇପିସି) ବୈଠକରେ ସିନେଟ ଷ୍ଟାଣ୍ଡିଂ କମିଟିକୁ ରମିଜ ରାଜା କହିଛନ୍ତି ଯେ ଟି-୨୦ ବିଶ୍ୱକପରେ ପାକିସ୍ତାନ ଯଦି ଭାରତକୁ ପରାସ୍ତ କରେ ତେବେ ପାକିସ୍ତାନ କ୍ରିକେଟ୍ ବୋର୍ଡ ପାଇଁ ଏକ ଖାଲି ଚେକ୍ ପ୍ରସ୍ତୁତ କରାଯାଇଛି। ଏକ ଇଂନଭେସ୍ଟର ଏହି କଥା ରମିଜଙ୍କୁ କହିଛନ୍ତି। ଅନ୍ୟପଟେ ପାକିସ୍ତାନ କ୍ରିକେଟ୍ ବୋର୍ଡ ମଧ୍ୟ ଆର୍ଥିକ ସଙ୍କଟର ସମ୍ମୁଖୀନ ହେଉଛି। ତେଣୁ ଏହି ମ୍ୟାଚ୍ ଜିତିଲେ କିଛି ଆର୍ଥିକ ସଙ୍କଟ ଦୂରେଇ ଯିବ। ସେହିପରି ଗତ ମାସରେ ନ୍ୟୁଜିଲାଣ୍ଡ ଦଳ ପାକିସ୍ତାନ ଗସ୍ତରେ ଆସିଥିଲେ, କିନ୍ତୁ ସିରିଜ୍ ଆରମ୍ଭ ହେବା ପୂର୍ବରୁ ସୁରକ୍ଷାରେ ଅବମାନନା ଦର୍ଶାଇ ଏହି ଯାତ୍ରାକୁ ବାତିଲ କରିଦେଲା ନ୍ୟୁଜିଲାଣ୍ଡ। ଏହା ପରେ ଇଂଲଣ୍ଡ ମଧ୍ୟ କୋଭିଡ -19ର ସାହାରା ଦର୍ଶାଇ ପାକିସ୍ତାନ ଗସ୍ତକୁ ବାତିଲ କରିଦେଲା।

ରମିଜ ରାଜା କହିଛନ୍ତି, ‘ଯଦି ଆମର କ୍ରିକେଟ୍ ଅର୍ଥନୀତି ଶକ୍ତିଶାଳୀ ହୋଇଥାନ୍ତା, ତେବେ ଇଂଲଣ୍ଡ ଏବଂ ନ୍ୟୁଜିଲ୍ୟାଣ୍ଡ ଭଳି ଦଳ ଆମକୁ ବ୍ୟବହାର କରି ଡଷ୍ଟବିନରେ ପକାଇ ନଥାନ୍ତେ। ଶ୍ରେଷ୍ଠ କ୍ରିକେଟ୍ ଦଳ ଏବଂ ଶ୍ରେଷ୍ଠ କ୍ରିକେଟ୍ ଅର୍ଥନୀତି ହେଉଛି ଦୁଇଟି ବଡ଼ ଚ୍ୟାଲେଞ୍ଜ। ସୂଚନାଯୋଗ୍ୟ ଯେ, ଭାରତ ୨୦୦୭ ମସିହାର ଟି-୨୦ ବିଶ୍ୱକପ ଟାଇଟଲ ଜିତିଥିଲା। ସେହିପରି ୨୦୧୪ ମସିହାରେ ଟି-୨୦ ବିଶ୍ଵକପର ରନର୍ସଅପ୍ ହୋଇଥିଲା। ତେବେ ଖେଳସୂଚୀ ଅନୁଯାୟୀ ଚଳିତ ବର୍ଷ ଆଇସିସି ଟି-୨୦ ବିଶ୍ୱକପ ଆସନ୍ତା ଅକ୍ଟୋବର ୧୭ ତାରିଖରୁ ଆରମ୍ଭ ହେବାକୁ ଯାଉଛି। ଏହାର ଅନ୍ତିମ ମ୍ୟାଚ୍ ୧୪ ନଭେମ୍ବରରେ ଖେଳାଯିବ।