ଭାରତ ଖବର : ଭାରତୀୟ କ୍ରିକେଟର ଋଷଭ୍‌ ପନ୍ତ ଶୁକ୍ରବାର ସକାଳେ ଏକ ବଡ଼ ଦୁର୍ଘଟଣାର ଶିକାର ହୋଇଛନ୍ତି । ଦୁର୍ଘଟଣା ଏତେ ଭୟଙ୍କର ଥିଲା ଯେ କ୍ରିକେଟରଙ୍କ ମର୍ସିଡିଜ୍ କାରଟି ଡିଭାଇଡରକୁ ଧକ୍କା ଦେବା ପରେ ପୋଡ଼ି ପାଉଁଶ ହୋଇଯାଇଛି । ତାଙ୍କୁ ଗୁରୁତର ଅବସ୍ଥାରେ ହସ୍ପିଟାଲରେ ଭର୍ତ୍ତି କରାଯାଇଛି । ଡାକ୍ତରଙ୍କ ଅନୁସାରେ ପନ୍ତଙ୍କ ଗୋଡରେ ଗଭୀର ଆଘାତ ଲାଗିଛି ।

ନୂଆଦିଲ୍ଲୀରୁ ଉତ୍ତରାଖଣ୍ଡର ରୁରକି ଅଭିମୁଖେ ଯାଉଥିବା ସମୟରେ ଋଷଭ ପନ୍ତଙ୍କ ମର୍ସିଡିଜ୍ କାର ଶୁକ୍ରବାର ସକାଳ ୫.୧୫ ରେ ନାରସନ୍ ସୀମାରେ ରେଲିଂ ସହ ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣା ପରେ କାରରେ ନିଆଁ ଲାଗିଯାଇଥିଲା।ସୌଭାଗ୍ୟବଶତଃ ସେଠାରେ ଥିବା କିଛି ବ୍ୟକ୍ତି ପନ୍ତଙ୍କୁ କାରର କାଚ ଭାଙ୍ଗି ତାଙ୍କୁ ବାହାର କରିଦେଲେ । ସେତେବେଳେ ସେ କାରରେ ଏକୁଟିଆ ଥିଲେ ।

ଆଉ ତା’ପରେ ଆହତ କ୍ରିକେଟରଙ୍କୁ ତୁରନ୍ତ ରୁରକିର ସକ୍ଷମ ହସ୍ପିଟାଲରେ ଭର୍ତ୍ତି କରାଯାଇଥିଲା । ଉତ୍ତରାଖଣ୍ଡର ଡିଜିପି ଅଶୋକ କୁମାର କହିଛନ୍ତି , କ୍ରିକେଟରଙ୍କ ଶରୀରରେ ଅଧିକ ଆଘାତ ନାହିଁ, କିନ୍ତୁ ଗୋଟିଏ ଗୋଡ ଭାଙ୍ଗିଥିବା ଆଶଙ୍କା କରାଯାଉଛି । ବର୍ତ୍ତମାନ ତାଙ୍କର ଉତ୍ତମ ଚିକିତ୍ସା ପାଇଁ ଡେରାଡୁନର ମ୍ୟାକ୍ସ ହସ୍ପିଟାଲକୁ ସ୍ଥାନାନ୍ତର କରାଯାଇଛି ।

ଋଷପ ପନ୍ତ କହିଛନ୍ତି, କାର ଚଳାଇବା ସମୟରେ ତାଙ୍କର ଆଖି ଲାଗିଯାଇଥିଲା । ଆଉ କେଇ ମୁହୂର୍ତ୍ତ ଭିତରେ ହିଁ କାର ନିୟନ୍ତ୍ରଣ ହରାଇ ଡିଭାଇଡରରେ ପିଟିହୋଇ ଦୁର୍ଘଟଣା ଘଟିଛି ।କ୍ରିକେଟରଙ୍କ ଦୁର୍ଘଟଣା ସମ୍ପର୍କରେ ଜାଣିବା ପରେ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଅଧିକାରୀଙ୍କ ସହ ଯୋଗାଯୋଗରେ ଅଛନ୍ତି । ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ପଚାରି ବୁଝିଛନ୍ତି। ଏହା ସହିତ ତାଙ୍କର ଉନ୍ନତ ମାନର ଚିକିତ୍ସା ପାଇଁ ସମସ୍ତ ସମ୍ଭାବ୍ୟ ବ୍ୟବସ୍ଥା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଛନ୍ତି।

ଋଷଭ ପନ୍ତଙ୍କ ଆରୋଗ୍ୟ କାମନା କରି ସିଏମ୍ ଧାମି କହିଛନ୍ତି, ତାଙ୍କ ଚିକିତ୍ସାର ସମସ୍ତ ଖର୍ଚ୍ଚ ରାଜ୍ୟ ସରକାର ବହନ କରିବେ । ଏୟାର ଆମ୍ବୁଲାନ୍ସର ଆବଶ୍ୟକ ହେଲେ, ଏହାର ମଧ୍ୟ ବ୍ୟବସ୍ଥା କରାଯିବ । ନିକଟରେ ପନ୍ତ ବାଂଲାଦେଶ ବିପକ୍ଷ ଟେଷ୍ଟ ସିରିଜ୍‌ ଖେଳିଥିଲେ। କିନ୍ତୁ ଜାନୁଆରୀ ୩ରୁ ଆରମ୍ଭ ହେବାକୁ ଥିବା ଶ୍ରୀଲଙ୍କା ବିପକ୍ଷ ଟି-୨୦ ଓ ଦିନିକିଆ ସିରିଜ୍‌ରୁ ସେ ବାଦ ପଡ଼ିଛନ୍ତି। ବାଂଲାଦେଶ ବିପକ୍ଷ ସିରିଜ୍‌ ପରେ ପନ୍ତ ଦୁବାଇ ଯାଇ ଖ୍ରୀଷ୍ଟମାସ ପାଳନ କରିଥିଲେ। ତାଙ୍କ ସହ ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କୁ ଦେଖିବାକୁ ମିଳିଥିଲା।

ଆହୁରି ପଢ଼ନ୍ତୁ : ଭାରତୀୟ ଦଳର ଘାତକ ଖେଳାଳି ରିଷଭ ପନ୍ତଙ୍କ ହେଲା କାର୍ ଦୁର୍ଘଟଣା, ଗମ୍ଭୀର ଅବସ୍ଥାରେ ହସ୍ପିଟାଲ୍ ରେ ହେଲେ ଭର୍ତି