272 ରନ୍ ସ୍କୋର ଦେଖି ପନ୍ତ ହୋଇଗଲେ ଆଶ୍ଚର୍ଯ୍ୟ ଏବଂ କହିଲେ "ଆମକୁ ଏତେ ମାଡ ମାରିବେ ବୋଲି ଆମେ..."
ଆଇପିଏଲ୍ ୨୦୨୪ ରେ, ଦିଲ୍ଲୀ କ୍ୟାପିଟାଲ୍ସକୁ କେକେଆର୍ ହାତରେ ଏକ ବଡ଼ ପରାଜୟର ସମ୍ମୁଖୀନ ହେବାକୁ ପଡିଛି। ବିଶାଖାପାଟନମରେ ଖେଳାଯାଇଥିବା ଏହି ମ୍ୟାଚରେ କେକେଆର ବ୍ୟାଟ୍ସମ୍ୟାନ୍ ରନ୍ ବର୍ଷା କରିଥିଲେ ଯେଉଁଥିପାଇଁ ଦିଲ୍ଲୀ ଦଳ ଚାପରୁ ମୁକୁଳି ପାଇ ପାରିନଥିଲା ଏବଂ ଟୁର୍ଣ୍ଣାମେଣ୍ଟରେ ଦ୍ୱିତୀୟ ପରାଜୟର ସାମ୍ନା କରିବାକୁ ପଡିଥିଲା।
୧୦୬ ରନର ପରାଜୟ ପରେ ଡିସି ଅଧିନାୟକ ଋଷଭ ପନ୍ତ ବହୁତ ନିରାଶ ହୋଇଥିଲେ। ମ୍ୟାଚ୍ ପରେ ପନ୍ତ କ’ଣ କହିଛନ୍ତି ଆସନ୍ତୁ ଜାଣିବା:-
ମ୍ୟାଚ୍ ପରେ ଋଷଭ ପନ୍ତ କହିଛନ୍ତି ଯେ ଆମେ ଭଲ ବୋଲିଂ କରିନାହୁଁ। ଆମ୍ଭେ ଆହୁରି ଭଲ କରି ପାରିଥାନ୍ତୁ। ଏତେ ବଡ ଟାର୍ଗେଟକୁ ପିଛା କରିବା ସମୟରେ ଆମ୍ଭେ ପ୍ରଥମରୁ ବଡ଼ ସଟ୍ ଖେଳିବାକୁ ଯୋଜନା କରିଥିଲୁ ଏବଂ ଆମେ ଏହି ଯୋଜନାରେ ଆଗକୁ ବଢିଥିଲୁ। ପ୍ରଶଂସକଙ୍କ ଶବ୍ଦ ଏବଂ ସ୍କ୍ରିନ ଟାଇମରରେ କିଛି ଯାନ୍ତ୍ରିକ ସମସ୍ୟା ହେତୁ DRS ନେବାରେ ଅସୁବିଧା ହୋଇଥିବା ସେ କହିଛନ୍ତି। ସେ ଆହୁରି କହିଛନ୍ତି ଯେ ପରିସ୍ଥିତି ଅନୁଯାୟୀ ଆମକୁ ଆଗକୁ ଯିବାକୁ ପଡିବ। ବର୍ତ୍ତମାନ ସମୟ ଆସିଛି ଯେ ଆମକୁ ବ୍ୟକ୍ତିଗତ ଭାବରେ ଏବଂ ଏକ ଦଳ ଭାବରେ ଦୃଢ଼ ହୋଇ ଆଗକୁ ଆସିବାକୁ ହେବ। ମୁଁ ମୋର ଖେଳକୁ ବହୁତ ଉପଭୋଗ କରୁଛି। କ୍ରିକେଟ୍ ମୋତେ ଅନେକ ଉତ୍ଥାନ-ପତନ ଦେଖାଇଛି ବୋଲି ଋଷବ କହିଛନ୍ତି।
ଦିଲ୍ଲୀ କ୍ୟାପିଟାଲ୍ସ ନିଶ୍ଚିତ ଭାବେ ଏହି ମ୍ୟାଚ୍ ହାରିଛି କିନ୍ତୁ ଋଷଭ ପନ୍ତ ଭଲ ବ୍ୟାଟିଂ କରିଛନ୍ତି। ସେ ପୁଣି ଥରେ ପ୍ରମାଣ କରିଛନ୍ତି ଯେ ସେ କେବଳ ଫିଟନେସ ନୁହେଁ ବରଂ ଫର୍ମ ସହିତ କ୍ରିକେଟ ଦୁନିଆକୁ ଫେରିଛନ୍ତି। ପନ୍ତ କ୍ରମାଗତ ଦ୍ୱିତୀୟ ଅର୍ଦ୍ଧଶତକ ହାସଲ କରିଥିଲେ। ଗତମ୍ୟାଚରେ ୩୨ ବଲରେ ଅର୍ଦ୍ଧଶତକ ହାସଲ କରିଥିବା ପନ୍ତ ପୁଣିଥରେ ୨୫ ବଲରେ ୫୫ ରନ୍ ସଂଗ୍ରହ କରିବା ସହିତ ୫ ଛକା ଓ ୪ ଛକା ମାରିଥିଲେ।
ଭେଙ୍କଟେଶ ଆୟରଙ୍କ ଗୋଟିଏ ଓଭରରେ ୨ଟି ଛକା ଓ ୪ଟି ଚୌକା ସହିତ ପନ୍ତ ୨୮ ରନ୍ ସଂଗ୍ରହ କରିଥିଲେ। ଏହାପୂର୍ବରୁ ସିଏସକେ ବିପକ୍ଷରେ ପନ୍ତ ୩୨ ବଲରେ ୫୧ ରନ୍ ସଂଗ୍ରହ କରିଥିଲେ। ପ୍ରଥମେ ବ୍ୟାଟିଂ କରି କେକେଆର ୭ ୱିକେଟ୍ ହରାଇ ୨୭୨ ରନ୍ ସଂଗ୍ରହ କରିଥିଲା। କେକେଆର ପାଇଁ ସୁନୀଲ ନାରିନ ୩୯ ବଲରେ ୮୫ ରନ, ଅଙ୍ଗକ୍ରିଶ ରଘୁବନ୍ସି ୨୭ ବଲରେ ୫୪ ରନ୍, ଆଣ୍ଡ୍ରେ ରସେଲ ୧୯ ବଲରେ ୪୧ ରନ୍ ଏବଂ ରିଙ୍କୁ ସିଂ ୮ ବଲରେ ୨୬ ରନ୍ ସ୍କୋର କରିଥିଲେ। ୨୭୩ ରନ୍ର ବଡ଼ ଲକ୍ଷ୍ୟକୁ ପିଛା କରି ଦିଲ୍ଲୀ ଦଳ କ୍ରମାଗତ ଭାବେ ୱିକେଟ୍ ହରାଇଥିଲା ଏବଂ ୧୭.୨ ଓଭରରେ ୧୬୬ ରନରେ ଅଲଆଉଟ ହୋଇଯାଇଥିଲା।
ଅଧିନାୟକ ପନ୍ତଙ୍କ ୫୫ ରନ୍ ବ୍ୟତୀତ ଟ୍ରିଆଷ୍ଟ ଷ୍ଟବ୍ସ ମଧ୍ୟ ଦିଲ୍ଲୀ ପାଇଁ ୫୪ ରନ୍ ସଂଗ୍ରହ କରିଥିଲେ। କେକେଆର୍ ପାଇଁ ଷ୍ଟାର୍କ ୨ଟି ୱିକେଟ୍ ନେଇଥିଲେ, ବୈଭବ ଅରୋରା ୩ଟି ୱିକେଟ୍, ବରୁଣ ଚକ୍ରବର୍ତ୍ତୀ ମଧ୍ୟ ୩ଟି ୱିକେଟ୍ ନେଇଥିଲେ ଏବଂ ସୁନୀଲ ନାରିନ ୧ ୱିକେଟ୍ ପାଇଥିଲେ। ଏହି ମ୍ୟାଚରେ ଭଲ ପ୍ରଦର୍ଶନ ପାଇଁ ସୁନୀଲ ନାରିନଙ୍କୁ ପ୍ଲେୟାର୍ ଅଫ୍ ଦ ମ୍ୟାଚ ଦିଆଯାଇଥିଲା।