ଏହି IPL ଖେଳାଳିଙ୍କୁ ମିଳିଛି ମ୍ୟାଚ ଫିକ୍ସିଂ କରିବା ପାଇଁ ଲକ୍ଷ ଲକ୍ଷ ଟଙ୍କାର ଅଫର୍ , ପୋଲିସ କରୁଛି ଯାଞ୍ଚ
କ୍ରିକେଟ ଖବର : ଭାରତରେ କ୍ରିକେଟର କ୍ରିକେଟର କ୍ରେଜ୍ କିପରି ରହିଥାଏ , ତାହା ସାରା ବିଶ୍ୱରେ ଅଛପା ନୁହଁ। କ୍ରିକେଟ୍ ଖେଳୁଥିବା ଖେଳାଳିମାନେ ଭାରତରେ ବହୁତ ଟଙ୍କା, ଖ୍ୟାତି ଏବଂ ସମ୍ମାନ ପାଆନ୍ତି ଏହା ସମଗ୍ର ବିଶ୍ୱ ଜାଣିଛି। ଏହାର ସବୁଠାରୁ ବଡ ଉଦାହରଣ ହେଉଛି ଇଣ୍ଡିଆନ ପ୍ରିମିୟର ଲିଗ୍ ବା ଆଇପିଏଲ୍। ଗୋଟିଏ ପଟେ ଭାରତରେ କ୍ରିକେଟ ଯେଉଁଭଳି ଆଗେଇ ଚାଲିଛି ଠିକ ସେହିପରି ଫିକ୍ସିଂର ଅନ୍ଧକାର ପୃଷ୍ଠାଗୁଡ଼ିକ ମଧ୍ୟ ପୁଣିଥରେ ଲୋକଲୋଚନକୁ ଆସିଛି। ପୁଣି ଥରେ କ୍ରିକେଟ ଫିକ୍ସିଂର କାରବାର ଭାରତୀୟ କ୍ରିକେଟରେ ପହଞ୍ଚିଛି। ଭାରତର ଅନେକ ପ୍ରତିଭାଶାଳୀ ଖେଳାଳିଙ୍କ କ୍ୟାରିୟର ଫିକ୍ସିଂ ଫାଶରେ ପଡ଼ି ନଷ୍ଟ ହୋଇଯାଇଛି। ଏଭଳି ପରିସ୍ଥିତିରେ ଭାରତୀୟ କ୍ରିକେଟରେ ପୁଣି ଥରେ ଫିକ୍ସିଂ ହେବା ଚିନ୍ତାର ବିଷୟ ପାଲଟିଛି।
ବାସ୍ତବରେ ମ୍ୟାଚ୍ ଫିକ୍ସିଂ କରିବା ପାଇଁ ଜଣେ ପୂର୍ବତନ ଆଇପିଏଲ୍ ଖେଳାଳିଙ୍କୁ ବୁକି ଦ୍ୱାରା ୪୦ ଲକ୍ଷ ଟଙ୍କାର ଫିକ୍ସିଂ ଅଫର୍ ଦିଆଯାଇଥିଲା। ଗଣମାଧ୍ୟମ ରିପୋର୍ଟ ଅନୁଯାୟୀ, ପୂର୍ବତନ ଆଇପିଏଲ୍ ଖେଳାଳି ରାଜାଗୋପାଲ ସତୀଶ ଅଭିଯୋଗ କରିଛନ୍ତି ଯେ ସୋସିଆଲ ମିଡିଆ ମାଧ୍ୟମରେ ମ୍ୟାଚ୍ ଫିକ୍ସିଂ କରିବା ପାଇଁ ତାଙ୍କୁ ୪୦ ଲକ୍ଷ ଟଙ୍କା ଅଫର୍ କରାଯାଇଥିଲା। ତେବେ ସତିଶ କହିଛନ୍ତି ଯେ ସେ ଏହି ଅଫରକୁ ପ୍ରତ୍ୟାଖ୍ୟାନ କରି ବାଙ୍ଗାଲୋର ପୋଲିସକୁ ଏହାର ସୂଚନା ଦେଇଥିଲେ। ଆଉ ବର୍ତ୍ତମାନ ବାଙ୍ଗାଲୋର ପୋଲିସ ଏହାର ଯାଞ୍ଚ କରୁଛି।
ଏହି ପୁରା ଘଟଣା ବିଷୟରେ ପୋଲିସକୁ କହିବା ପୂର୍ବରୁ ସତୀଶ କ୍ରିକେଟ୍ ବୋର୍ଡ ଅଫ୍ ଇଣ୍ଡିଆ (ବିସିସିଆଇ) କୁ ଏ ବିଷୟରେ ସୂଚନା ଦେଇଥିଲେ। କିନ୍ତୁ ବିସିସିଆଇର ଦୁର୍ନୀତି ନିବାରଣ ଏଜେନ୍ସିର ଏପରି ଅନୁସନ୍ଧାନ କରିବାର କ୍ଷମତା କିମ୍ବା ଅଧିକାର ନାହିଁ। ଏହା ପରେ ଘଟଣାର ତଦନ୍ତ ଦାୟିତ୍ୱ ପୋଲିସକୁ ହସ୍ତାନ୍ତର କରାଯାଇଛି।ପୋଲିସର ଅନୁସନ୍ଧାନରୁ ଜଣାପଡିଛି ଯେ ବନି ଆନନ୍ଦ ନାମକ ଜଣେ ବ୍ୟକ୍ତି ଇନଷ୍ଟାଗ୍ରାମରେ ୪୦ ଲକ୍ଷ ଟଙ୍କା ନେଇ ମ୍ୟାଚ୍ର ଫିକ୍ସିଂ କରିବା ପାଇଁ ସତୀଶଙ୍କୁ ପ୍ରଲୋଭିତ କରିଥିଲେ। ଏହା ସହିତ ବନି ଆନନ୍ଦ ସତୀଶଙ୍କୁ କହିଥିଲେ ଯେ ଅନ୍ୟ ଦୁଇ ଜଣ ଖେଳାଳି ପୂର୍ବରୁ ଏହି ଅଫରକୁ ଗ୍ରହଣ କରିସାରିଛନ୍ତି। ତେବେ ବର୍ତ୍ତମାନ ଘଟଣାର ତଦନ୍ତ ଆହୁରି ଦୃଢ କରିବା ପାଇଁ ପୋଲିସ ଏକ ସ୍ୱତନ୍ତ୍ର ଟିମ୍ ଗଠନ କରିଛି।
ସୂଚନାଯୋଗ୍ୟ ଯେ ରାଜାଗୋପାଲ ସତୀଶ ଆଇପିଏଲ ଟୁର୍ନାମେଣ୍ଟର ଜଣେ ଜଣାଶୁଣା ଖେଳାଳି। ସେ ନିଜର ଆଇପିଏଲ କ୍ୟାରିୟରରେ କୋଲକାତା ନାଇଟ୍ ରାଇଡର୍ସ, ମୁମ୍ବାଇ ଇଣ୍ଡିଆନ୍ସ ଏବଂ ପଞ୍ଜାବ କିଙ୍ଗ୍ସ ସହିତ ଆଇପିଏଲ୍ ଖେଳିଛନ୍ତି। ସେ ତାଙ୍କ ଆଇପିଏଲ୍ କ୍ୟାରିୟରରେ ମୋଟ ୩୫ ଟି ମ୍ୟାଚ୍ ଖେଳିଛନ୍ତି। ଏହା ବ୍ୟତୀତ ରାଜାଗୋପାଲ ସତୀଶ ମଧ୍ୟ ତାମିଲନାଡୁ ରଣଜୀ ଦଳର ଏକ ଗୁରୁତ୍ୱପୂର୍ଣ୍ଣ ଖେଳାଳି ଅଟନ୍ତି।