IPL 2024: ଆହତ ଏବଂ ବାଦ୍ ପଡିଥିବା ଖେଳାଳିମାନେ କଣ ପୁରା ଦରମା ପାଇବେ? ଜାଣନ୍ତୁ ଅଛି ନିୟମ

ଇଣ୍ଡିଆନ୍ ପ୍ରିମିୟର ଲିଗ୍ ୨୦୨୪ର ସଂସ୍କରଣ ୨୨ ମାର୍ଚ୍ଚ ଠାରୁ ଆରମ୍ଭ ହେବାକୁ ଯାଉଛି। ସମସ୍ତ ୧୦ ଟି ଫ୍ରାଞ୍ଚାଇଜ୍, ଖେଳାଳୀ ଏବଂ ପ୍ରଶଂସକମାନେ ଉତ୍ସାହର ସହିତ ଟୁର୍ଣାମେଣ୍ଟକୁ ଅପେକ୍ଷା କରିଛନ୍ତି। ଖେଳାଳିମାନେ ମଧ୍ୟ ଏହି ଲିଗ୍ ପାଇଁ ଅପେକ୍ଷା କରିଥାନ୍ତି କାରଣ ୨ ମାସ ମଧ୍ୟରେ ସେମାନେ କେବଳ ଉତ୍କୃଷ୍ଟ କ୍ରିକେଟ୍ ଖେଳିବାର ସୁଯୋଗ ପାଇଥାନ୍ତି ତାହା ନୁହେଁ ବରଂ ବିପୁଳ ଅର୍ଥ ଏବଂ ଲୋକପ୍ରିୟତା ମଧ୍ୟ ପାଇଥା’ନ୍ତି।

କିନ୍ତୁ କିଛି ଖେଳାଳି ଆଘାତ କିମ୍ବା ଅନ୍ୟ କାରଣ ବଶତଃ ଲିଗରେ ନିଲାମ ହୋଇଥିଲେ ହେଁ ଖେଳିବାକୁ ସକ୍ଷମ ହୋଇନଥାନ୍ତି। ଏଠାରେ ପ୍ରଶ୍ନ ଉଠେ ଯଦି ନିଲାମ ହୋଇଥିବା ଖେଳାଳି ଲିଗରେ ଭାଗ ନେଇନଥାଏ ତେବେ ତାଙ୍କୁ କଣ ଅର୍ଥ ମିଳେ? ଯଦି ମିଳେ ତେବେ କେତେ ଟଙ୍କା ମିଳିଥାଏ। ଫ୍ରାଞ୍ଚାଇଜ୍ ଆଇପିଏଲ୍ ନିଲାମରେ ଖେଳାଳିଙ୍କ ପାଇଁ କୋଟି କୋଟି ଟଙ୍କା ଖର୍ଚ୍ଚ କରିଥାଏ, କିନ୍ତୁ ଯଦି ଖେଳାଳିମାନେ ଆହତ ହୁଅନ୍ତି କିମ୍ବା ସିଜନ ଅଧାରୁ ବାଦ୍ ପଡନ୍ତି, ତେବେ ସେମାନଙ୍କ ଦେୟ ମଧ୍ୟ କଟାଯାଇଥାଏ। ଯଦି କୌଣସି ଖେଳାଳି ସିଜନ ଆରମ୍ଭ ପୂର୍ବରୁ ଆଘାତ କିମ୍ବା କୌଣସି ବ୍ୟକ୍ତିଗତ କାରଣ ହେତୁ ତାଙ୍କ ନାମ ପ୍ରତ୍ୟାହାର କରନ୍ତି, ତେବେ ନିୟମ ଅନୁଯାୟୀ ଫ୍ରାଞ୍ଚାଇଜ୍ ତାଙ୍କୁ ଟଙ୍କାଟିଏ ମଧ୍ୟ ଦେଇନଥାଏ।

ହଁ, ଫ୍ରାଞ୍ଚାଇଜ୍ କିଛି ବିଶେଷ ଖେଳାଳିଙ୍କ ପାଇଁ ସେମାନଙ୍କର ନିୟମ ପରିବର୍ତ୍ତନ କରିଥାନ୍ତି। ଉଦାହରଣ ସ୍ୱରୂପ, ଆଇପିଏଲ୍ ୨୦୨୩ ରେ ଋଷଭ ପନ୍ତ ଏବଂ ଜସପ୍ରୀତ ବୁମ୍ରା ଆହତ ହୋଇଥିଲେ ତେଣୁ ନିଜ ନିଜ ଫ୍ରାଞ୍ଚାଇଜ୍ ପାଇଁ ଖେଳିନଥିଲେ। କିନ୍ତୁ ରିପୋର୍ଟ ଅନୁଯାୟୀ, MI ଏବଂ DC ଏହି ଖେଳାଳିମାନଙ୍କୁ ସେମାନଙ୍କ ମ୍ୟାଚ୍ ଫି ପ୍ରଦାନ କରିଥିଲେ। ଯେଉଁ ଖେଳାଳିମାନେ ଆଘାତ କିମ୍ବା ବ୍ୟକ୍ତିଗତ କାରଣରୁ IPL ୨୦୨୪ ରୁ ସେମାନଙ୍କର ନାମ ପ୍ରତ୍ୟାହାର କରନ୍ତି, ସେମାନେ ମଧ୍ୟ ନିୟମ ଅନୁଯାୟୀ ଟଙ୍କା ପାଇବେ ନାହିଁ, କିନ୍ତୁ ଅନ୍ତିମ ନିଷ୍ପତ୍ତି କେବଳ ଫ୍ରାଞ୍ଚାଇଜ୍ ଦ୍ୱାରା ନିଆଯିବ। ଯଦି କୌଣସି ଖେଳାଳି ସିଜନ ମଧ୍ୟରେ ଆହତ ହୁଅନ୍ତି କିମ୍ବା ବ୍ୟକ୍ତିଗତ କାରଣରୁ ତାଙ୍କ ନାମ ପ୍ରତ୍ୟାହାର କରନ୍ତି, ତେବେ ତାଙ୍କୁ ଦରମା ଦିଆଯାଏ। ଫ୍ରାଞ୍ଚାଇଜ୍ ଖେଳାଳୀଙ୍କୁ ତାଙ୍କ ମ୍ୟାଚ୍ ଫି ଅନୁପାତରେ ପ୍ରଦାନ କରେ।

ଉଦାହରଣ ସ୍ୱରୂପ, ଯଦି ଜଣେ ଖେଳାଳି ଫ୍ରାଞ୍ଚାଇଜ୍ ଦ୍ୱାରା ୫ କୋଟି ଟଙ୍କାରେ କିଣାଯାଇଥାଏ ଏବଂ ସେ ମୋଟ ୧୪ ଟି ଲିଗ୍ ମ୍ୟାଚ୍ ମଧ୍ୟରୁ ମାତ୍ର ୬ ଟି ମ୍ୟାଚ୍ ଖେଳିବାକୁ ସକ୍ଷମ ହୋଇଥିଲେ ଏବଂ ଆହତ ହୋଇଗଲେ। ତେବେ, ୧୪ ଟି ମ୍ୟାଚର ତାଙ୍କ ଫି ବାଣ୍ଟିବା ପରେ ପ୍ରତି ମ୍ୟାଚ୍ ତାଙ୍କର ଯେତିକି ଫି ହେଉଥିବ ସେତିକି ପ୍ରଦାନ କରାଯାଇଥାଏ। ତେବେ ଶେଷ ନିଷ୍ପତ୍ତି ଫ୍ରାଞ୍ଚାଇଜ୍ ନେଇଥାଏ।  ଯଦି ପ୍ରଭାବଶାଳୀ ଖେଳାଳି ହୋଇଥାଏ ତେବେ ତାଙ୍କୁ ପୁରା ସିଜନର ଟଙ୍କା ମଧ୍ୟ ମିଳିପାରେ।

IPL ୨୦୨୪ ଆରମ୍ଭ ପୂର୍ବରୁ, ଅନେକ ଖେଳାଳି ସେମାନଙ୍କ ନାମ ପ୍ରତ୍ୟାହାର କରି ନେଇଛନ୍ତି। କେତେକ ଆଘାତଜନିତ ସମସ୍ୟା କାରଣରୁ ସେମାନଙ୍କ ନାମ ପ୍ରତ୍ୟାହାର କରି ନେଇଛନ୍ତି ଏବଂ କେତେକ ବ୍ୟକ୍ତିଗତ କାରଣ ଦର୍ଶାଇ ସେମାନଙ୍କ ନାମ ପ୍ରତ୍ୟାହାର କରି ନେଇଛନ୍ତି।  ଆହତ କାରଣରୁ ଟୁର୍ନାମେଣ୍ଟରୁ ବାଦ ପଡିଥିବା ଖେଳାଳିଙ୍କ ମଧ୍ୟରେ ଗୁଜୁରାଟ ଟାଇଟାନ୍ସ ଫାଷ୍ଟ ବୋଲର ଏବଂ ଗତ ସିଜିନର ପର୍ପଲ କ୍ୟାପ ବିଜେତା ମହମ୍ମଦ ଶାମି ମଧ୍ୟ ଅଛନ୍ତି।  ସିଏସକେ ଓପନର୍ ଡିଭନ୍ କନୱେ, ଦିଲ୍ଲୀ କ୍ୟାପିଟାଲ୍ସ ଫାଷ୍ଟ ବୋଲର ଲୁଙ୍ଗି ନିଗିଡି, ଏମଆଇ ଫାଷ୍ଟ ବୋଲର ଜେସନ ବେହେରେଣ୍ଡୋରଫଙ୍କ ନାମ ସାମିଲ ରହିଛି।

ଏହା ବ୍ୟତୀତ ବ୍ୟକ୍ତିଗତ କାରଣରୁ କେକେଆର୍ ଓପନର୍ ଜେସନ୍ ରୟ, ଦିଲ୍ଲୀ କ୍ୟାପିଟାଲର ବ୍ୟାଟ୍ସମ୍ୟାନ୍ ହ୍ୟାରି ବ୍ରୁକ୍ ଏବଂ ଲଖ୍ନୌ ଫାଷ୍ଟ ବୋଲର ମାର୍କ ଉଡ୍ ମଧ୍ୟ ଆଇପିଏଲ୍ ୨୦୨୪ ରୁ ସେମାନଙ୍କ ନାମ ପ୍ରତ୍ୟାହାର କରିଛନ୍ତି।  ଏକ ନିୟମ ଅନୁଯାୟୀ, ଏହି ଖେଳାଳୀମାନଙ୍କୁ ସେମାନଙ୍କର ମ୍ୟାଚ୍ ଫି ପ୍ରଦାନ କରାଯିବ ନାହିଁ କିନ୍ତୁ ମହମ୍ମଦ ଶାମିଙ୍କ କ୍ଷେତ୍ରରେ ଗୁଜୁରାଟ ଟାଇଟାନ୍ସ କିଛି ନିଷ୍ପତ୍ତି ନେଇପାରେ। ଏହା ସମ୍ଭବ ଯେ ଗତ ସିଜନ ଦଳ ତାଙ୍କର ସେବାକୁ ବିଚାର କଲେ ତାଙ୍କୁ ଏହି ସିଜନ ମଧ୍ୟ ମ୍ୟାଚ ଫି ପ୍ରଦାନ କରାଯାଇପାରେ। 

ଏଠାରେ ଉଲ୍ଲେଖଯୋଗ୍ୟ ଯେ ଦୁନିଆର ସବୁଠାରୁ ଲୋକପ୍ରିୟ ଟି-୨୦ ଲିଗ୍ ବ୍ୟତୀତ ଆଇପିଏଲ୍ ମଧ୍ୟ ସବୁଠାରୁ ମହଙ୍ଗା ଲିଗ୍ ଅଟେ। ଏହି ଲିଗରେ ମାତ୍ର ୨ ମାସ ଖେଳିବା ପାଇଁ ଖେଳାଳିମାନେ ଯେତିକି ଟଙ୍କା ପାଆନ୍ତି, କୌଣସି ବୋର୍ଡ କିମ୍ବା ଏପରିକି ଅନେକ ଲିଗ୍ ଏକ ବର୍ଷରେ ଖେଳାଳିଙ୍କୁ ସେତେ ଅଧିକ ଦେବାକୁ ସକ୍ଷମ ହୋଇନଥାନ୍ତି। ମିଚେଲ ଷ୍ଟାର୍କ ଆଇପିଏଲ୍ ୨୦୨୪ରେ ୨୪.୭୫ କୋଟି ଏବଂ ପ୍ୟାଟ୍ କମିନ୍ସ ୨୦.୫୦କୋଟି ଟଙ୍କା ପାଇଛନ୍ତି ଯାହା ଏହାର ଉଦାହରଣ ଅଟେ।