ଗମ୍ଭୀର ଆସିବା ପରେ ଏହି ଫର୍ମାଟରୁ ବିଦା ହେବେ ପନ୍ତ! କୋଚ୍ ତିଆରି କରିବେ ସ୍ପେଶାଲ ଟିମ୍…

ଗୌତମ ଗମ୍ଭୀର ପ୍ରଶିକ୍ଷକ ହେବା ପରେ ବିଭିନ୍ନ ପ୍ରକାର ଆକଳନ କରାଯାଉଅଛି। ଗମ୍ଭୀରଙ୍କ ଅଧୀନରେ ଟିମ୍ ଇଣ୍ଡିଆରେ ପରିବର୍ତ୍ତନ ଦେଖିବାକୁ ପ୍ରଶଂସକମାନେ ଚାହିଁ ବସିଛନ୍ତି।  ଆଗାମୀ ଦିନରେ ସ୍ପେଶାଲ ଟିମ୍ ପଲିସି କାର୍ଯ୍ୟକାରୀ ହୋଇପାରେ, ଯେଉଁ କାରଣରୁ ଟିମ୍ ଇଣ୍ଡିଆର ମାନଚିତ୍ର ଆଗାମୀ ସମୟରେ ସମ୍ପୂର୍ଣ୍ଣ ବଦଳିଯିବ। ଶ୍ରୀଲଙ୍କା ଗସ୍ତ ପାଇଁ ଟିମ୍ ଇଣ୍ଡିଆ ବିଷୟରେ ଆଲୋଚନା ତୀବ୍ର ହୋଇଛି। ଏହି ଗସ୍ତ ଠାରୁ ଗମ୍ଭୀରଙ୍କ କାର୍ଯ୍ୟକାଳ ଆରମ୍ଭ ହେବ। 

୨୦୨୨ ଶେଷରେ ଟିମ୍ ଇଣ୍ଡିଆର ଯୁବ ତାରକା ଋଷଭ ପନ୍ତଙ୍କ ବିଷୟରେ ଗମ୍ଭୀରଙ୍କ ଯାହା କହିଥିଲେ, ତାହା ଆଖିଆଗରେ ରଖିଲେ ବର୍ତ୍ତମାନ ମୁଖ୍ୟ ପ୍ରଶିକ୍ଷକଙ୍କ ମାଷ୍ଟରପ୍ଲାନ ସ୍ପଷ୍ଟ ଭାବରେ ଜଣାପଡିବ ନିଶ୍ଚିତ। ଟେଷ୍ଟ କ୍ରିକେଟରେ ଋଷଭ ପନ୍ତ ଚମତ୍କାର ପ୍ରଦର୍ଶନ କରି ଆସିଛନ୍ତି। ସେ ଅଷ୍ଟ୍ରେଲିଆ ଯାଇ ଟିମ୍ ଇଣ୍ଡିଆର ଐତିହାସିକ ବିଜୟରେ ନିଜର ଚମତ୍କାରିତାର ପ୍ରମାଣ ଦେଖାଇଥିଲେ। ଟେଷ୍ଟରେ ପନ୍ତ ବ୍ୟାଟିଂରେ ଏକାକୀ ମ୍ୟାଚ ଜିତାଇବାର ଦକ୍ଷତା ରଖନ୍ତି। କିନ୍ତୁ ଯଦି ଆମେ ୨୦୨୨ ବିଷୟରେ କଥା କହିବା, ଧଳା ବଲ୍ କ୍ରିକେଟରେ ପନ୍ତ ଆଶାନୁରୂପ ପ୍ରଦର୍ଶନ କରିପାରିନଥିଲେ। ଯାହାକୁ ନେଇ ଭେଟେରାନ୍ ଗୌତମ ଗମ୍ଭୀର ନୀରବତା ଭାଙ୍ଗିଥିଲେ। ଟେଷ୍ଟ କ୍ରିକେଟ୍ ଉପରେ ଧ୍ୟାନ ଦେବାକୁ ସେ ପନ୍ତଙ୍କୁ ପରାମର୍ଶ ଦେଇଥିଲେ। 

ଗମ୍ଭୀର ପନ୍ତଙ୍କ ବିଷୟରେ କହିଥିଲେ, 'ଋଷଭ ପନ୍ତଙ୍କୁ ସୀମିତ ଓଭରରେ ଅନେକ ସୁଯୋଗ ମିଳିଥିଲା ​​ଏବଂ ସେ ଏହାର ଫାଇଦା ଉଠାଇ ପାରିନଥିଲେ।  ତେଣୁ ସେ ଦୋଷ କିମ୍ବା ଅଭିଯୋଗ କରିପାରିବେ ନାହିଁ। ୩-୪-୫-୬ ନମ୍ବରରେ ଖେଳିବା ବ୍ୟତୀତ ତାଙ୍କୁ ଓପନିଂ କରିବାକୁ ସୁଯୋଗ ମିଳିଛି। ଧଳା ବଲ୍ କ୍ରିକେଟ୍ ରେ ସଫଳ ହେବା ପାଇଁ ମ୍ୟାନେଜମେଣ୍ଟ ତାଙ୍କୁ ସମସ୍ତ ସୁଯୋଗ ଦେଇଛି, କିନ୍ତୁ ସେ ତାହା କରିପାରିଲେନାହିଁ। ମୁଁ ଭାବୁଛି ସେ ଟେଷ୍ଟ କ୍ରିକେଟ୍ ଉପରେ ଧ୍ୟାନ ଦେବା ଉଚିତ୍, ଯାହା ତାଙ୍କ ପାଇଁ ଭଲ ହେବ”।

ଗମ୍ଭୀରଙ୍କ ବିବୃତ୍ତିରୁ ଏହା ସ୍ପଷ୍ଟ ଯେ ଟିମ୍ ଇଣ୍ଡିଆକୁ ସମାନ ଶୈଳୀରେ ଚୟନ କରାଯିବ। ଖେଳାଳି କେଉଁ ଭୂମିକାରେ ପାରଦର୍ଶୀ, ସେ ସେଠାରେ ବ୍ୟବହୃତ ହେବେ। ଯେଉଁ ଖେଳାଳି ଯେଉଁ ଫର୍ମାଟ ପାଇଁ ଉପଯୁକ୍ତ ସେ ସେହି ଫର୍ମାଟ ହିଁ ଖେଳିବେ। କହିବାକୁ ଗଲେ ଭାରତର ତିନୋଟି ଫର୍ମାଟ ପାଇଁ ଅଲଗା ଅଲଗା ଦଳ ଚୟନ କରାଯିବ।