କିପରି ରହିବ ଚାମ୍ପିୟନ୍ସ ଟ୍ରଫି ପାଇଁ ଭାରତୀୟ ଦଳ? କିଏ ହେବ ସାମିଲ, କିଏ ପଡିବ ବାଦ୍….

ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ଟୁର୍ନାମେଣ୍ଟ ୧୯ ଫେବୃଆରୀରୁ ୯ ମାର୍ଚ୍ଚ ପର୍ଯ୍ୟନ୍ତ ଖେଳାଯିବ। ୫୦ ଓଭର ବିଶ୍ୱକପ ପରେ ଆଇସିସି ଚାମ୍ପିଅନ୍ସ ଟ୍ରଫି ସବୁଠାରୁ ବଡ ମାନ୍ୟତା ପାଇଛି। ଏକ ଉପାୟରେ ଏହାକୁ ମିନି ବିଶ୍ୱକପ୍ ମଧ୍ୟ କୁହାଯାଏ। ଫେବୃଆରୀ ୨୦ରେ ବାଂଲାଦେଶ ବିପକ୍ଷ ମ୍ୟାଚ୍ ସହିତ ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ଟୁର୍ନାମେଣ୍ଟରେ ଭାରତ ଡେବ୍ୟୁ କରିବ। ଚାମ୍ପିଅନ୍ସ ଟ୍ରଫିରେ ଭାରତ ଏବଂ ପାକିସ୍ତାନ ମଧ୍ୟରେ ମହାମୁକାବିଲା ୨୩ ଫେବୃଆରୀରେ ଦୁବାଇ ଠାରେ ଖେଳାଯିବ। ମାର୍ଚ୍ଚ ୨ ତାରିଖରେ ଟିମ୍ ଇଣ୍ଡିଆ ବିପଜ୍ଜନକ ଦଳ ନ୍ୟୁଜିଲାଣ୍ଡକୁ ଭେଟିବ।

ଇଂଲଣ୍ଡ ବିପକ୍ଷ ଏକଦିବସିୟ ଏବଂ ଚାମ୍ପିଅନ୍ସ ଟ୍ରଫି ପାଇଁ ଭାରତୀୟ ଦଳରେ ସ୍ପିନର ବରୁଣ ଚକ୍ରବର୍ତ୍ତୀ ସାମିଲ ହୋଇପାରନ୍ତି। କିଛି ଖାସ୍ ସୂତ୍ରରୁ ଏଭଳି ସୂଚନା ମିଳୁଛି। ଜାନୁଆରୀ ୨୨ରେ କୋଲକାତାରେ ଇଂଲଣ୍ଡ ବିପକ୍ଷରେ ପାଞ୍ଚଟି ଟି-୨୦ ଏବଂ ତିନୋଟି ଏକଦିବସିୟ ମ୍ୟାଚ୍ ଜରିଆରେ ଭାରତ ଅନ୍ତର୍ଜାତୀୟ କ୍ରିକେଟକୁ ଫେରିବ। ଏହା ପରେ ଦଳ ଚାମ୍ପିଅନ୍ସ ଟ୍ରଫି ଅଭିଯାନ ପାଇଁ ଦୁବାଇ ଯିବ। ଟୁର୍ଣ୍ଣାମେଣ୍ଟର ଅବଶିଷ୍ଟ ମ୍ୟାଚ ଗୁଡିକ ପାକିସ୍ତାନ ଆୟୋଜନ କରିବ।

ଅଜିତ ଅଗରକରଙ୍କ ନେତୃତ୍ୱରେ ଚୟନ କମିଟି ଶନିବାର ଦିନ ବୈଠକ କରି ପୂର୍ବରୁ ଉଲ୍ଲେଖ କରାଯାଇଥିବା କାର୍ଯ୍ୟଗୁଡିକ ପାଇଁ ଦଳ ଚୟନ କରିବ, ବିଶେଷ କରି ଚାମ୍ପିଅନ୍ସ ଟ୍ରଫି ପାଇଁ ଅନ୍ତିମ ଦଳ ଘୋଷଣା କରିବାର ଶେଷ ତାରିଖ ରବିବାର ଅଟେ। ବିଶେଷ ସୂତ୍ରରୁ ପ୍ରକାଶ ଯେ ଚକ୍ରବର୍ତ୍ତି ଟି-୨୦ ଦଳରେ ସ୍ଥାନ ପାଇବା ନିଶ୍ଚିତ ଅଟେ। ଏହା ବ୍ୟତୀତ ଏକଦିବସିୟରେ ତାଙ୍କର ଭାରତ ପାଇଁ ମନୋନୀତ ହେବାର ସମ୍ଭାବନା ରହିଛି, ଏହି ସମୟରେ ସେ ବିଜୟ ହଜାରେ ଟ୍ରଫିରେ ସେ ୧୮ ଟି ୱିକେଟ୍ ନେଇଛନ୍ତି। ବାଂଲାଦେଶ ଏବଂ ଦକ୍ଷିଣ ଆଫ୍ରିକା ବିପକ୍ଷରେ ଭାରତର ଟି-୨୦ ସିରିଜ ବିଜୟରେ ଚମତ୍କାର ପ୍ରଦର୍ଶନ କରିଥିବା ଚକ୍ରବର୍ତ୍ତୀ ବିଜୟ ହଜାରେ ଟ୍ରଫିର କ୍ୱାର୍ଟର ଫାଇନାଲ ମ୍ୟାଚରେ ତାମିଲନାଡୁ ପାଇଁ ୫୨ ରନ ଦେଇ ୫ ଟି ୱିକେଟ୍ ନେଇଥିଲେ।

ଅନ୍ୟପକ୍ଷରେ କୁଲଦୀପ ଯାଦବ ହର୍ନିଆ ଅସ୍ତ୍ରୋପଚାରରୁ ସୁସ୍ଥ ହୋଇ ପ୍ରତିଯୋଗୀତା ମୂଳକ କ୍ରିକେଟକୁ କେବେ ଫେରିବେ ସେଥିନେଇ ସନ୍ଦେହ ରହିଛି। ତାଙ୍କ ସ୍ଥାନରେ ବରୁଣ ସୁଯୋଗ ପାଇବେ ବୋଲି ଆଶାକରାଯାଉଛି। ଚାମ୍ପିଅନ୍ସ ଟ୍ରଫି ପାଇଁ ତାଙ୍କୁ ସତେଜ ରଖିବାକୁ ନିଷ୍ପତ୍ତି ନିଆଯାଇଥିବାରୁ ଇଂଲଣ୍ଡ ବିପକ୍ଷ ତିନିଟି ମ୍ୟାଚରୁ କେ.ଏଲ୍ ରାହୁଲଙ୍କୁ ବିଶ୍ରାମ ଦିଆଯିବ ବୋଲି ଜଣାପଡିଛି। ରାହୁଲ ଅଷ୍ଟ୍ରେଲିଆରେ ପାଞ୍ଚଟି ଟେଷ୍ଟ ମ୍ୟାଚ୍ ଖେଳିଥିଲେ, ଯେଉଁଠାରେ ସେ ପର୍ଥ ଏବଂ ବ୍ରିସବେନରେ ଗୁରୁତ୍ୱପୂର୍ଣ୍ଣ ଓପନିଂ ଇନିଂସରେ ପ୍ରଭାବିତ କରିଥିଲେ।

ରାହୁଲଙ୍କୁ ବିଶ୍ରାମ ଦିଆଯିବାର ଅର୍ଥ ହେଉଛି ୬-୧୨ ଫେବୃଆରୀରୁ ନାଗପୁର, କଟକ ଏବଂ ଅହମ୍ମଦାବାଦରେ ଖେଳାଯିବାକୁ ଥିବା ଇଂଲଣ୍ଡ ବିପକ୍ଷ ଘରୋଇ ଏକଦିବସିୟ ମ୍ୟାଚରେ ଭାରତ ତାଙ୍କ ପାଇଁ ଏକ ବ୍ୟାକ୍ ଅପ୍ ଖେଳାଳି ବାଛିବାକୁ ଯାଉଛି। ଗତ ବର୍ଷ ଶ୍ରୀଲଙ୍କା ବିପକ୍ଷ ଏକଦିବସିୟ ରେ ଭାରତ ୨-୧ରେ ହାରିଥିବା ବେଳେ ରାହୁଲ ଏବଂ ଋଷଭ ପନ୍ତ କିପର-ବ୍ୟାଟ୍ସମ୍ୟାନ୍ ରହିଥିଲେ। ସୂତ୍ର ଏହା ମଧ୍ୟ କହୁଛି ଯେ ଉଭୟ ଦଳରେ ୱାଶିଂଟନ୍ ସୁନ୍ଦରଙ୍କ ଚୟନ ମଧ୍ୟ ନିଶ୍ଚିତ ହୋଇଥିବାବେଳେ ମେଲବୋର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ୧୧୪ ରନ୍ ସ୍କୋର କରି ପ୍ରଭାବିତ କରିଥିବା ଅଲରାଉଣ୍ଡର ନୀତୀଶ ରେଡ୍ଡୀ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ଟି-୨୦ ସିରିଜ୍ ଖେଳିବାକୁ ପ୍ରସ୍ତୁତ ଅଛନ୍ତି।  ଭାରତ ଦୁଇଥର ଚାମ୍ପିଅନ୍ସ ଟ୍ରଫି ଜିତିଛି।